Bɔ-Koe-Iyipiti 11

Den-Kei Sarɛnu Faga-Koe Fɔ-Koe

1Wo ya a taran, Mari ara a fɔ Musa ye ko, “A ara to kasara kelen n bi min sigila ale mansɛ anubɛ ala mɔgɛnu ma tun. Wo kɔma, a si wo boloka. Wo ni wo bɔ yan, ado nfan, a wa wo boloka tumɛ min, a si wo gben feufeu! 2I ni a fɔ Isirɛla mɔgɛnu ye kaka ko kei wo, musi wo, bɛɛ ni ta sɛnɛ anubɛ wodi-gbɛ tara a sigi-nyɔgɛ ma Iyipiti mɔgɛnu, kɔni.” 3Mari ya a ma, Isirɛla mɔgɛnu diyara Iyipiti kɛnu ye kɔikɔi! Ka tenbi wo la, Musa wara-koe diyara Iyipiti mɔgɔ-banu anubɛ nyɔ-nyamanita-mɔgɛnu ye.

4Yanni Musa ni bɔ mansɛ dafɛ, a ya a fɔnɛ to ale mansɛ ye ko, “Mari ko suyi tɛma a si na ka Iyipiti nyamanɛ ratagama. 5Iyipiti kɛnuna den-kei-sarɛ bɛɛ si faga. Sayɛ si a dabira ile mansɛla den-kei-sarɛ ma. Hali yɔɔn-musi kolon-tugulɛla den-kei-sarɛ si faga. Hali wola kolo-fan den fɔlɔtɛ bɛɛ si faga, a keimɛnu, kɔni. 6Mari ko Iyipiti mɔgɛnu si belenna yirilan tɛgɛla Iyipiti nyamanɛ kan tinɛ bɛɛ rɔ min nyɔgɔn ma ke bɛ fɔlɔ, ado a nyɔgɔn ti ma tun. 7Kɔnɔ hali wulinu ti wɔnwɔn Isirɛla mɔgɛnu ma anubɛ anuna kolo-fannu.” Musa ya a fɔ ale mansɛ ye tun ko, “Wo si a lɔn wo rɔ ko Mari si dan-nafarɛ to Iyipiti mɔgɛnu anubɛ Isirɛla mɔgɛnu tɛma. 8Ila mɔgɔ-banu si na n bara. Anu si anu sa n kɔrɔ n madiya tinɛ alako mabɛ nna mɔgɛnu ni ta. Wo kɔma, ma si ta.” Musa kɔrɔtɔnɛ bɔra mansɛ yakɔrɔ.

9Mari ya a fɔ Musa ye ko, “Hali wo bɛɛ mara ale mansɛ la, a ti a tole masɔ wola kumɛ la. A makɔni fɔlɔn alako nde, Marita kabana-koenu ni to kɛla Iyipiti nyamanɛ kɛ rɔ.” 10Musa anubɛ Aruna ya kabana-koe kɛ bɛɛ kɛ mansɛ yakɔrɔ. Mari ya ale mansɛ yisi gbɛlɛya. A ma sɔn Isirɛla mɔgɛnu boloka-koe ma muk!

Currently Selected:

Bɔ-Koe-Iyipiti 11: KCLB

Highlight

Copy