Bɔ-Koe-Iyipiti 12

Kanan-Ko-Ladiyɛ

1 # Saraka-Masɔlɛnuta Tɔnnu 23.5; Yilan-Yilan Koe 9.1-5; 28.16; Tɔn-Fɔɛ-Fila-Nyɔgɛ 16.1-2 Mari ya a fɔ Musa anubɛ Aruna ye Iyipiti nyamanɛ rɔ ko, 2“Ka a dabira bi ma, karɛ kɛ#12.2 Karɛ kɛ: Hiburu-kan rɔ karɛ kɛ tɔgɛ le “Abibu,” Kurankɔ-kan rɔ, a si ma “Bafuyi” la. Tubabunu ko “April.” si ma wola san karɛ fɔlɛ la. 3Wo ni a fɔ Isirɛla mɔgɛ bɛɛ ye ko karɛ kɛ tele tan ma, denbaya-tigi bɛɛsi ni saga-dan, ni wo ma, baa-dan bira anu nyɛrɛ ye iko anuna kebilɛ kolo nya min. Denbaya-tigi kelen-kelan bɛɛsi ni kolo-fen kelen-kelen bi. 4Ni denbayɛ minnu ma siya, ado anu gbansan ti ke saga-dan wo banna, anu si anu sigi-nyɔgɛ do kofu anu ma. Anu si kolo-fan faga iko anu kelen-kelennamɛ-bɛɛ si ke min dɔnna wulɔn su kelan rɔ ka a ban. 5Anu ni san kelen kolo-fannu yabɔ fɛɛ sa minnu na, a saga wo, a baa wo. 6Karɛ kɛ tele tan-ni-nanɛ ma, Isirɛla mɔgɛ bɛɛ ni atɛ faga wurɛ la. 7Anu si kolo-fan wonu dɔn bɔn minnu na, anu ni kolo-fan wonu yele do bi ka a susa bonda-dɛ tɔnkɔn filɛ ma anubɛ dɛ kumɛ. 8Anu si soge wonu mintan ka anubɛ yanba-kun-kunanɛ donu dɔn anubɛ biredi-yɛlɛbɛlɛ suyi wo nyɛrɛ rɔ. 9Anu kana a kuran dɔn. Anu kana a tenɛ dɔn fɔ ka anu mintan. A kunyɛ anubɛ a kiannu anubɛ a burɔ-fan bɛɛsi ni mintan gburr! 10-11Yanni wo ni a dɔn, wo ni wola duruku-ba-wɛnu mayɛlɛ tagama-koe la, ka wola sanbarɛnu don wo kian rɔ. Wo ni wola sewuri bi. Wo tenbi soge dɔnna tumɛ min, wo ni wo lakaliya. Wo kana a toenu namara ha sɔgɔma. Kɔnɔ ni mintɛ toe kira, anu kana wo dɔn tun fɔ ka wonu mintan gburr! Nde, Marita Kanan-Ko-Ladiyɛ#12.11 Kanan-Ko-Ladiyɛ: Donu si ladiyɛ kɛ kele ko Tenbi-N-Kun-Na-Ladiyɛ. le kɛ la.”

12Mari ko tun, “N si tenbi Iyipiti nyamanɛ rɔ wulɔn suyi nyɛrɛ rɔ ka Iyipiti mɔgɛnuna den-kei-sarɛnu faga anubɛ anuna kolo-fen den fɔlɔtɛnu, a keimɛnu, kɔni. Nde le Mari la, min si Iyipiti bɛsɛ wara-koe halaki. 13Yele susanɛ bɔn minnu dɛ ma, yele wonu si ma tamasere la. Ni n ya tamasere wo yen bɔn minnu dɛ ma, n bi nta fitinɛ min nanala Iyipiti kɛnu ma, wo ti ke nyɔ. 14#Bɔ-Koe-Iyipiti 23.15; 34.18; Saraka-Masɔlɛnuta Tɔnnu 23.6-8; Yilan-Yilan Koe 28.17-25; Tɔn-Fɔɛ-Fila-Nyɔgɛ 16.3-8 Wo si to wo mirila tele kɛ ma. San-bo-san, wo si tele kɛ ma ladɛn-tele la nde, Mari ye, ka to kɛ mala habadan!”

Biredi-Yɛlɛbɛlɛ-Dɔn-Ladɛn

15Mari ko tun, “San-bo-san, wo ni to biredi-yɛlɛbɛlɛ dɔnna tele wɔrɔnfila kɔrɔ. Wo ni isiti labɔ wola bɔnnu na a tele fɔlɛ ma. Ka a bɔ tele fɔlɛ wo ma ha ka ke a tele wɔrɔnfila nyɔgɛ ma, min ba biredi-yɛlɛnɛ dɔn, wo tigi si bɔ Isirɛla mɔgɛnu kurun tɔ. 16A tele fɔlɔtɛ anubɛ a tele wɔrɔnfila nyɔgɛ ma, wo ni ladɛn kɛ ka nde, Mari bato. Wo kana wɔli mumɛ kɛ tele wonu ma fɔ dɔn-fen rabɛn-ko-wɔlɛnu, wo si wo le dɔrɔn ma.

17“Wo ni Biredi-Yɛlɛbɛlɛ wo Dɔn-Ladɛn kɛ bawo n bi wo bɔnsɔnnu nabɔla Iyipiti nyamanɛ rɔ tele wo nyɛrɛ le ma. Woletɔ san-bo-san, wo kebilɛnu anubɛ wo kegeyɛnu si tele wo bira ka a ma tele-sɛnimɛ la. 18Karɛ fɔlɛ kɛ, tele tan-ni-nanɛ wurɛ la, wo si to biredi-yɛlɛbɛlɛ dɔnna ha a tele mogan-ni-kelan wurɛ la. 19Wo kana isiti-wo-isiti lamara wola bɔnnu na tele wɔrɔnfilɛ wo kɔrɔ. Ni min ya wo dɔn, wo ni wo tigi bɔ wo kurun tɔ, a mara sundan na wo, a mara duguran na wo. 20Wo kana biredi dɔn wo wati rɔ isiti ye min tɔ. Ni karɛ kɛ ya wo taran kan-bo-kan, wo ni to Biredi-Yɛlɛbɛlɛ wo Dɔn-Ladɛn kɛla.”

Kanan-Ko-Ladiyɛ

21Musa ya Isirɛla mɔgɔ-ba damasi kele ka a fɔ anu ye ko, “Mari ko denbaya-tigi bɛɛ ni saga-den kelen-kelen bi ka anu faga Kanan-Ko-Ladiyɛ kuma wola denbayɛnu ye, ni wo ma, baa-dan. 22Kɔlɔma min tɔgɛ hisɔpu, wo ni wo bolɔn donu bi. Wo ya kolo-fen-yele minnu kɛ mirannu tɔ, wo ni hisɔpu bolɔn wonu bi ka anu nayigi yele wo rɔ ka a susa bonda-dɛ tɔnkɔn filɛ ma anubɛ dɛ kumɛ. Mɔgɔ-wo-mɔgɔ kana bɔ bɔn la ha sɔgɔma. 23#Hiburunu 11.28 Mari si tenbi Iyipiti nyamanɛ rɔ Iyipiti kɛnuna den-kei-sarɛnu halaki koe la suyi wo rɔ. Ni a ya yele yen bɔn minnu dɛ tɔnkɔn filɛ ma anubɛ a kumɛ, Mari si tenbi bɔn wonu kun na. A ti sɔn ko niyi-bilɛ ni ke bɔn wonu na.

24“Wole anubɛ wo bɔnsɔnnu ni to kɛ mala tolon. A ni ma tɔn la anu bolo. 25Mari ya lanyiri kiri wo ye nyamanɛ minna ko la, wo wa ke nyɔ tumɛ min, wo ni ladɛn kɛ dabira ka a ma tɔn la wo bolo nyɔ. 26Ni wola dannu ya ladɛn kɛ kɔrɛ manyinika wo la, 27wo ni a fɔ anu ye wo rɔ ko, ‘Wo tumɛ ma ye Iyipiti nyamanɛ rɔ, Mari ya Iyipiti kɛnu halaki kɔnɔ a ya male lakanan nyamanɛ wo rɔ. Woletɔ ma ye Kanan-Ko-Ladiyɛ kɛ kɛla san-bo-san ka sarakɛ bɔ mata Mari Alla ye.’ ” Mɔgɛnu ya anu madu dugi ma ka madiyali kɛ. 28Musa banta kɛ fɔla nya min wo, Isirɛla mɔgɛnu ya a dabira ka a ma iko Mari ya a fɔ Musa anubɛ Aruna ye nya min.

Den-Kei-Sarɛnu Faga-Koe

29 # Bɔ-Koe-Iyipiti 4.22-23 Mari ya den-kei-sarɛ bɛɛsi faga suyi tɛma Iyipiti nyamanɛ rɔ. Sayɛ ya a dabira ale mansɛla den-kei-sarɛ ma ha ka ta a sigi yelela-mɔgɛnuna den-kei-sarɛnu ma hali ka ke kolo-fannuna den fɔlɔtɛ bɛɛ ma, a keimɛnu, kɔni. 30Di-kɛ-kan bɔra Iyipiti nyamanɛ kan tinɛ bɛɛ rɔ min kɛ, mansɛ anubɛ ala mɔgɔ-banu anubɛ Iyipiti nyamanita-mɔgɛ bɛɛ ya anu kunden suyi wo rɔ. Bon-wo-bon ma to, mɔgɔ ma faga kan min.

31Mansɛ ya kilayɛnu nata Musa anubɛ Aruna ma suyi wo nyɛrɛ rɔ. Ale mansɛ ko, “Wo wuli ka bɔ nna mɔgɛnu tɛma, wobɛ wola mɔgɛnu, ka ta Mari bato iko wo ara a fɔ nya min. 32Wo ni wola kolo-fannu fanan bi iko wo ara a fɔ nya min. Wo kana nyina ka duwa nde ye.”

33Iyipiti keinu gbaranta Isirɛla mɔgɛnu na alako anu ni bɔ Iyipiti nyamanɛ rɔ tiriya bawo anu ko, “Ni kɛnu ma bɔ yan, ma bɛɛ si faga.” 34Isirɛla mɔgɛnu ya anuna biredinu bi isiti sa min tɔ ka a sa anuna biredi-ramaga-mirannu tɔ. Anu ya wonu nakiri kurɛnu tɔ ka anu sigi anu kan ma. 35#Bɔ-Koe-Iyipiti 3.21-22 Isirɛla mɔgɛnu ya a ma iko Musa ya a fɔ anu ye nya min. Anu tara sɛnɛ anubɛ wodi-gbɛ anubɛ fɛrɛya-bɔɛnu matara Iyipiti kɛnu ma. 36Mari ya a ma, Iyipiti mɔgɛnu ya Isirɛla mɔgɛnu gbiliya. Woletɔ Isirɛla mɔgɛnu ya fen minnu matara Iyipiti mɔgɛnu ma, anu ya wonu di anu ma. Anu ya Iyipiti kɛnu bolo-kolonya feufeu!

Isirɛla Mɔgɛnu Bɔ-Koe-Iyipiti

37Isirɛla mɔgɛ minnu bɔra tagamana Ramɛsisi soe burɔ ka ta ke Sukɔti soe ma, wonu yatɛ bɛnta mɔgɔ waga kɛmɛ wɔrɔ (600,000) ma kɔnɔ anu ma musinu anubɛ dennɛnu dan. 38Sibolo-gbɛrɛkɛ-mɔgɛ donu basanta anu na ta tinɛ. Anu tara anuna kolo-fannu na anu bolo. 39Anu tenbi anuna kila-fandɛnu tela kan min, anu si anuna dɛgɛ wonu mintan nyɔ isiti sa min tɔ. Anu burimatoe bɔra Iyipiti nyamanɛ rɔ min kɛ, woletɔ anu ma fɛrɛ sɔrɔn ka isiti kɛ anuna dɛgɛ lamunnɛ wo rɔ hali ka dɔn-fen-gbɛrɛkɛ rabɛn anu nyɛrɛ ye.

40 # Ko-Dabirɛnu 15.13; Kalesiya 3.17 Nba, Isirɛla mɔgɛnu ya san kɛmɛ nani anubɛ san bi-sawa (430) le bɔ Iyipiti nyamanɛ rɔ. 41A san bi-sawa nyɔgɛ wo tele laban ma yɔ, anu ya Iyipiti nyamanɛ boloka wulɔn le. 42Anu ya anu hɛnkili to wo suyi ko bawo Mari ya anu nabɔ Iyipiti nyamanɛ rɔ ka a fonde to ata mɔgɛ wonu ko suyi wo nyɛrɛ rɔ. Suyi wo nyɛrɛ rɔ, Mari kira anu kumafɛlɛnna ha anu damasi banta bɔla Iyipiti nyamanɛ rɔ. Woletɔ san-bo-san, Isirɛla mɔgɛnu si ki anu ya la tele wo nyɛrɛ suyi rɔ.

43Mari ya a fɔ Musa anubɛ Aruna ye ko Kanan-Ko-Ladiyɛ tɔn le kɛnu na.

“Sibolo-gbɛrɛkɛ-mɔgɛ minnu basannɛ wo la, wonu do-wo-do kana Kanan-Ko-Ladiyɛ dɔn-fan wonu dɔn.

44“Wo ye yɔɔn minnu sanna, wo wa wonu nakemininya tumɛ min, wonu ni na to a dɔnna.

45“Tenbi-sundannu anubɛ wola wɔli-kɛlɛnu, wonu fenfen kana a dɔn.

46 # Yilan-Yilan Koe 9.12; Yɔni 19.36 “Bɛɛ ni atɛ dɔn ata bɔn la. Mɔgɔ-wo-mɔgɔ kana ata sogo-mintannɛ wo labɔ luyi ma.

“Min tenbi ata soge dɔnna, a kana a kole rakeri.

47“Isirɛla mɔgɔ-wo-mɔgɔ kana a kunyɛ bɔ Kanan-Ko-Ladiyɛ kɛ kɔrɔ.

48“Sundan min siginɛ wo tɛma, ni a sɔgɛ ye a la ka kofu wo ma Kanan-Ko-Ladiyɛ kɛ tinɛ, fɔ wo tigi ni keinu nakemininya minnu bi ala bɔn la. Wo kɔma, wo si sundan wo bira iko wo na-kelen-nyɔgɛ. Kei min ma kemininya, wo kana a dɔn. 49Kemininya-koe kɛ, a ye dugurannu anubɛ sundannu denu kuma. A sa mɔgɔ kelen kuma.”

50Isirɛla mɔgɛnu ya wo bɛɛsi ma iko Mari ya a fɔ Musa anubɛ Aruna ye nya min. 51Wo tele nyɛrɛ rɔ, Mari ya Isirɛla mɔgɛnu nabɔ Iyipiti nyamanɛ rɔ iko anuna bɔnsɔnnu bi nya min.

Currently Selected:

Bɔ-Koe-Iyipiti 12: KCLB

Highlight

Copy