Bɔ-Koe-Iyipiti 15

Musata Bɛti

1 # Lankɛnimayɛ 15.3 Nba, Musa anubɛ Isirɛla mɔgɛnu ya bɛti kɛ bɔ Mari ye ko,

“Ma si bɛti bɔ Mari ye

kamasɔrɔn a ara nɔ-ko sɔrɔn a nyɛrɛta sɛnbɛ la.

A ara kɛlɛ-dannu anubɛ anuna soeenu natuntun Kɔgɔ-Yi-Wulan wo rɔ.

2 # Yaburi 118.14; Aiseya 12.2 Ma kisilɛ le mata Mari la min si ma kunyɛ bɔ gbaran rɔ.

Ma fanuta Alla le, ma si min gbiliya.

Ma nyɛrɛta Alla le, ma si min tanto.

3Mata kɛlɛ-kurugbɛ le ale la.

A tɔgɛ le Mari.

4“Mansɛ wola kɛlɛ-nyananu,

Mari ara wonubɛ anuna kirindinu nafili yi wo rɔ.

5Ale mansɛla mɔgɔ-ba wonu tora yi wo rɔ.

Anu yigira yi kɔrɔ iko kuru-kundi.

Yi ya anu yamatogon.

6“E, Mari, i wara ko-makawani-belebele kɛ ma ye i kɔɛn-nyimɛ la.

I kɔɛn-nyimɛ ara i yogenu bunden ma ye.

7Minnu wulita ila mɔgɛnu kan ma,

i wara wonu nabui ka anu dɛ ragborokan ita sɛnbɛ-makawanɛ la.

I ya ila diminyɛ lana anu kuma ka anu mintan iko bin-gbalɛ.

8I ya fɔnyɔ min nabɔ i karɛ rɔ,

wo ya yi kɛ fara fila la ka anu nadɛn anu nyɔgɔn kuma tala iko dandan.

Yi-ladɛnnɛ wo gbɛlɛyara gbon, iko dandan!

9I yogenu ko anu si ma sagaran ka ma bira ka mata nɔnfuli rafara anu nyɔgɔn tɛma.

Anu ko anu si anuna faannu sagan anu lɛɛ rɔ ka bui ma ma.

10Kɔnɔ i karatɔ-fɔnyɔ ya Kɔgɔ-Yi-Wulan latugu anu kuma.

Yi sara anu kuma.

Anu yigira yi kɔrɔ iko nɛgɛ-kundi.

11“E, Mari, nfen sifa ye duninya rɔ mɔgɛnu si min bato iko ile Mari.

Yon sɛninyanɛ iko ile?

Ma si i tanto ila kɛwɔli-makilannɛnuna ko la.

Yon si ke kabana-koenu kɛla iko ile?

12I ya i kɔɛn-nyimɛ rasagan dɔrɔnni,

dugu-kole ya Iyipiti mɔgɛnu nakunu.

13I ya male min kunka, i si ta ma yarɔ ita keninteya-banbɛlɛ la

ka sɔ ma yarɔ ita sɛnbɛ la ha ma si ke nyamanɛ wo rɔ i ye i mayigila kan min.

14Mɔgɛnu ba kɛ lamɔɛn tumɛ min, anu si yɛrɛyɛrɛn kilan bolo.

Filisitinu kun ma si kɔ.

15Idɔm kɛnu si kilan ha ka a dan-natenbi.

Mohabu mɔgɔ-banu si yɛrɛyɛrɛn.

Kenan kɛnu mankulan si bɔ anu ma kilan bolo.

16Kilan si wara anu tɔ.

Anu ta si faga kuluba!

Anu bi ita sɛnbɛ yenna min kɛ,

anu si to anu gbɛ rɔ iko kuru-kundi ha ma ni ban tenbila,

i wara male minnu kunka yɔɔnyɛ rɔ kɛ la, kɔni.

17Mari, i wara kan tinɛ min yabɔ ka a ma i nyɛrɛ mayigi tinɛ la,

i nyɛrɛ si ita bato-bɔn sɔ ma ye nyɔ.

I si ta ma sigi ita kɔnkɔ-sɛnimɛ wo kuma nyɔ.

18Ile Mari si to ila mansayɛ la habadan habadan!”

Musa Kɔrɔ Miriyamta Bɛti

19Isirɛla mɔgɛnu tagamanta kɛn-gbalanɛ kuma Kɔgɔ-Yi-Wulan tɛma nun. Kɔnɔ ale mansɛla kɛlɛ-dannu bi tenbila anuna kirindinu na anu bolo tumɛ min kɛn wo ma, Mari ya Kɔgɔ-Yi-Wulan keri anu kuma. 20Woletɔ Aruna kɔrɔ musi Miriyam, nɛbi-musi, kɔni, wo ya ata wasanbɛnu bi anubɛ Isirɛla musinu ka dɔn kɛ buta a ma. 21Miriyam ya bɛti bɔ Isirɛla mɔgɛnu ye ko,

“Ma ni bɛti bɔ Mari ye kamasɔrɔn a ara nɔ-ko sɔrɔn a nyɛrɛta sɛnbɛ la.

A ara kɛlɛ-dannu anubɛ anuna soeenu nato kɔgɔ-yi rɔ.”

Yi-Kunamɛ Wara-Koe

22Musa sɔra Isirɛla mɔgɛnu yarɔ ka bɔ Kɔgɔ-Yi-Wulen bolɔn wo dafɛ. Anu wulita ka tele sawa tagama kɛ ka ta ke wulɛ wo kan tinɛ do rɔ min tɔgɛ Sura kɔnɔ anu ma yi taran nyɔ. 23Tɔ-a-la, anu kera yi do ma min kunayanɛ kelele! (Woletɔ anu ya nyɔ kele ko Yi-Kuna.#15.23 Yi-Kuna: Ni i ya a taran Hiburu-kan rɔ ko, “mara,” wo kɔrɛ le “kuna.”) 24Anu gbunyara Musa kɔrɔ ko, “Male si ma min mintɔ gbɛ?”

25Musa dira Mari dala, woletɔ Mari ya kɔn-kundi do yira a la. Musa ya kɔlɔma wo bi ka a lakɛ yi wo rɔ. Yi wo diyara kɔikɔi!

Anu bi nyɔ wati min, Alla ya tɔn di anu ma, anu si minnu bira. Wo kɔma, a ya anu kɔrɔbɔ nyɔ. 26Mari ko, “Wo ni wo tole masɔ n kuman-kan la a kin na! Koe minnu telennɛ nde, Mari Alla yala, wo ni wonu ma ka nta tɔn bɛɛ bira. Ni wo ya wo ma, n ya kirayɛ minnu sigi Iyipiti kɛnu ma nun, n ti wo fenfen sigi wole ma bawo nde, Mari le wo rakɛndɛyalɛ la.”

27Anu kera Tamaro Kɔrɔ tenke tan-ni-filɛ anubɛ tin-kuru bi-wɔrɔnfilɛ ye kan min. Anu ya anu daga makɛ yi wonu dafɛ nyɔ.

Currently Selected:

Bɔ-Koe-Iyipiti 15: KCLB

Highlight

Copy