Bɔ-Koe-Iyipiti 18

Musa Hɛnkili Kɔ-Koe A Biran-Kei Bolo#18.1 Sura 18 kɛ bɛnta Yilan-Yilan-Koe sura 10 wara la.

1Nba, Mari ya min bɛɛsi ma Musa anubɛ ala mɔgɛnu ye ka anu nabɔ Iyipiti nyamanɛ rɔ, Musa biran-kei, Yɛtiro, Midiyan saraka-masɔlɛ, kɔni, wo ya wo lamɔɛn.

2-6 # Bɔ-Koe-Iyipiti 2.21-22 #Kɛwɔlɛnu 7.29Musa biran-kei, Yɛtiro ya kilayɛ lata ka a fɔ Musa ye ko, “N bi nala ila denbayɛnu tola i ma.” Musala musi ye Yɛtiro bolo bawo wo ya a taran, Musa ara a lata ale ma nun, anubɛ ala den-kei filɛ. Den-kei kelan tɔgɛ Kɛrisɔn. Tɔgɛ wo kɔrɛ le, “Sundan mɔgɔ nyamanɛ rɔ.” Den-kei doi tɔgɛ le Ɛliyasa. Tɔgɛ wo kɔrɛ le, “N fata Alla mara n dɛnbɛnɛ la min ya n kisi Iyipiti mansɛ ma.” Yɛtiro tara Musata musi anubɛ ala den-kei filɛ to a ma wulɛ rɔ, Sinayi kɔnkɛ dafɛ, anu daga makɛnɛ kan tinɛ min, kɔni.

7Musa tara a biran-kei labɛn tinɛ kilɛ la ka a kɔndɔn. A ya a nyɛnkin a kɔrɔ ka a sunbu. Anu donta fani-bɔn la. 8Mari ya koe min bɛɛsi sigi Iyipiti mansɛ anubɛ ala mɔgɛnu na, Musa ya wo bɛɛsi dantɛgɛlɛ sa a biran-kei wo ye. Anu ya tɔrɔyɛ sɔrɔn nya min kilɛ la, a ya wo rakaran a biran-kei wo ye. Mari ya anu kisi nya min, a ya wo fanan takaran a ye.

9Mari ya Isirɛla mɔgɛnu bɔ Iyipiti kɛnu bolo tɔ min kɛ ka anu kisi, wo mara sewa-koe la Yɛtiro ye. 10A ko, “Tabarakala Mari ma min bara wo kisi ka wo labɔ yɔɔnyɛ rɔ Iyipiti mansɛ anubɛ ala mɔgɛnu bolo. 11N ya a lɔn kaka ko Mari kolo bɛsɛ bɛɛ ko bawo Iyipiti kɛ minnu tɛgɛnɛ Isirɛla mɔgɛnu tɔ, a ara wonu tɔrɔ kosɛbɛ!” 12Musa biran-kei, Yɛtiro ya saraka-mintantɛ anubɛ sarakɛ donu bɔ Alla ye. Aruna anubɛ Isirɛla mɔgɔ-ba bɛɛsi tara ka fen-dɔn-kɛ Musa biran-kei fɛ Alla yala.

Kiti-Salɛnu Wara-Koe

(Tɔn-Fɔɛ-Fila-Nyɔgɛ 1.9-18)

13Wo banda kɛ, mɔgɛnu nara anuna kumɛnu na Musa wara. Telen-gbɛn, anu bi kiti rɔ. 14Yɛtiro ya Musata yakɔrɔ-mamɔɛ yen tumɛ min, a ya a fɔ a ye ko, “Nfen ya a to, ile kelan ye mɔgɔ-siyamɛ kɛnuna kiti sala? Ka a bi sɔgɔmɛ ma ha wurɛ la, i kinkinɛ anu bolo.”

15Musa ya a fɔ a biran-kei wo ye ko, “Ni i ya a yen n bi wo mala bawo mɔgɛnu bi nala n bara ka Alla sako lɔn. 16Ni kiti ye anu bolo, anu si na nde wara. N si kiti tɛgɛ mɔgɛnu tɛma. N si Allata kumɛnu anubɛ ata tɔnnu fɔ anu ye.”

17Yɛtiro ya a fɔ Musa ye ko, “I ye wɔlila nya min, wo gbɛlɛ. Ni i wɔlita wo nya na, wo ma kin. 18Ile anubɛ ila mɔgɛ kɛnu si bandan yati kamasɔrɔn wɔlɛ kɛ, a kolo i ko. I kelan ti ke wo bɛɛsi nɔla. 19I tole masɔ n kuman-kan la, n si hɛnkili di i ma. I ni i tunadiya ka Isirɛla mɔgɛnuna koe lake Alla ma. Alamɛ Alla tora i fɛ. 20I ni mɔgɛ kɛnu karan Allata kumɛnu anubɛ ata tɔnnu na. A bɛnta, anu ni kilɛ min tagama anubɛ ka koe minnu kɛ, i ni wonu yira anu na. 21Wo kɔma, i ni hɛnkilimɛnu nyini mɔgɛ wonu tɛma, minnu kilannɛ Alla la, ado anu si tonyɛ fɔ, kensunyɛ ma di anu ye. I ni mɔgɔ-sufa wonu sigi anu kuma. I ni donu sigi mɔgɔ waga kelen-kelannu kun na. I ni donu sigi mɔgɔ kɛmɛ-kɛmɛnu kun na. I ni donu fanan sigi mɔgɔ bi-loli bi-lolɛnu kun na ka donu sigi mɔgɔ tan-tannu kun na. 22-23Wonu si to mɔgɛnuna kitinu sala. Ni anu ti ke kuma-gbɛlɛmɛ minnu fɔla, anu si na wonu na ile wara. Kɔnɔ anu denu si kiti-nɛnu tɛgɛ anu nyɛrɛ ma. Ni i ya kɛ ma iko Alla ya a fɔ nya min, wo si dunɛ do bɔ i kuma. I si ke le wo rɔ ka ila wɔlɛ kɛ a kilɛ fɛ, ado mɔgɛ bɛɛ si sɛgi a warɛ yisi-kimɛ rɔ.”

24Woletɔ Musa ya a biran-keila kumɛ bira iko a ya a fɔ a ye nya min. 25A ya hɛnkilimɛnu yabɔ Isirɛla mɔgɛnu tɛma ka anu ma kun-tiginu na mɔgɛnu kun na. 26Wo kɔma, wonu tora mɔgɛnuna kiti-nɛnu tɛgɛla ka ta kiti-gbɛlɛmɛnu na Musa wara.

27Wo kɔma, Musa ya a biran-kei masara. Wo tara a warɛ nyamanɛ rɔ.

Currently Selected:

Bɔ-Koe-Iyipiti 18: KCLB

Highlight

Copy