Bɔ-Koe-Iyipiti 5

Wɔlɛ Lagbɛlɛya-Koe a Fɔlɔtɛ Ko

1Wo kɔma, Musa anubɛ Aruna tara ka Isirɛlata Mari Alla kan latenbi ale Iyipiti mansɛ ma ko, “I ni ale Marita mɔgɛnu boloka alako anu ni ta a bato tinɛ wulɛ rɔ ka ladiyɛ kɛ a ye.”

2Mansɛ wo ko, “Mari kɛ ye yon na, n bi min kuman-kan birala ka Isirɛla mɔgɛnu boloka? N ma Mari wo lɔn hali! N ti Isirɛla mɔgɛnu boloka muk!”

3Musa anubɛ Aruna ko, “Male Hiburunta Mari Alla ara a nyɛrɛ yira ma la. Ma ye i madiyala, i ni ma boloka. Ma ni tele sawa tagama kɛ wulɛ rɔ ka sarakɛnu bɔ mata Mari Alla ye. Ni wo ma, a si ma kunyɛ to kɛlɛ anubɛ kiraya-fitinɛ rɔ.”

4-5Iyipiti mansɛ ya a fɔ Musa anubɛ Aruna ye ko, “Nfen ya a to, wole ye mɔgɛnuna wɔlɛ tinyana? Ado nfan, Hiburu wɔli-kɛlɛnu siya ma ko! Wo ni anu nasɛgi wɔli-kɛ-tinɛ!”

6Wo wati nyɛrɛ rɔ, mansɛ ya a fɔ wɔli-kunyɛnu anubɛ anu kan-kɔrɔ-sigilɛnu#5.6 Kan-kɔrɔ-sigilɛnu: Wɔli-kunyɛ wonu, Iyipiti kɛ le wonu na. Anu kan-kɔrɔ-sigilɛ wonu, Isirɛla mɔgɛ le wonu na. ye ko, 7“Wo kana kɔrɔ-fɔrɔn di Hiburu kɛnu ma tun iko fɔlɔ bulɔku-gbesi-fenyɛ la. Anu ni ta kɔrɔ-fɔrɔn nyini anu nyɛrɛ ma. 8Anu duruta bulɔku min nyɔgɔn gbesila, anu ni to wo nyɔgɔn gbesila tun. Anu kana dasa wo la. Wɔlɛ ma gbɛlɛya wɛ anu kuma min kɛ, woletɔ anu bi anu kian kun na ta-koe la saraka-bɔ-tinɛ anuta Alla ye. 9Wo ni wɔlɛ lagbɛlɛya Hiburunu kuma ko anu ni anuna wɔlɛ kɛ anu sɛnbɛ la. Wo le si a ma, anu ti fɛrɛ sɔrɔn ka anu tole masɔ kɛnuna foninya-kumɛnu na.”

10Wɔli-kunyɛnu anubɛ anu kan-kɔrɔ-sigilɛnu tara mansɛ kan kɛ rakaran Isirɛla mɔgɛnu ye ko, “Mansɛ ko a ti kɔrɔ-fɔrɔn di wo ma tun. 11Wo si kɔrɔ-fɔrɔn nyini wo nyɛrɛ ma, ado wola wɔlɛ fanka ti bɔ a la.” 12Woletɔ Isirɛla mɔgɛnu basanta Iyipiti nyamanɛ kan tinɛ bɛɛ la kɔrɔ-fɔrɔn nyini tinɛ. 13Wɔli-kunyɛ wonu ya anu natuntun, anu ko, “Wo ni bulɔku gbesi iko wo duruta a kɛla nya min wo tumɛ ma ye kɔrɔ-fɔrɔn dila wo ma.” 14Wɔli-kunyɛ minnu tugunnɛ mansɛ la, wonu ya a fɔ anu kan-kɔrɔ-sigilɛnu ye ko, “Nfen mara kunu anubɛ bi, wo ma bulɔku gbesi ka a dafa iko wo duruta a mala nya min nun?” Woletɔ kan-kɔrɔ-sigilɛ minnu bi Isirɛla mɔgɛnu kuma, anu ya wonu gbesi.

15Kan-kɔrɔ-sigilɛ wonu tara a fɔ mansɛ ye ko, “Nfenna i ye kɛ nyɔgɔn mala ila yɔɔnnu na? 16Anu bi male gbesila. Anu sa kɔrɔ-fɔrɔn dila ma ma iko fɔlɔ. Hali wo, anu bi a fɔla ma ye ko ma ni bulɔku yatɛ dafa kɔnɔ ila mɔgɛnu denu ya a ma, bulɔku wonu da ma fa.”

17Kɔnɔ mansɛ wo ko, “Wole koron. Tinya-mansɛ le wo la. Woletɔ wo ye a fɔla ko n ni sɔn wo ni ta sarakɛnu bɔ wota Mari ye. 18Wo ta gbɛ wɔli-kɛ-tinɛ. Anu ti kɔrɔ-fɔrɔn nyini wo ye tun. Woletɔ wo ta wola bulɔku dafa iko wo duruta a mala nya min.” 19Nba, mansɛ ya wo fɔ nkɛkuna, anu ya a lɔn ko anu bara nanparan-bɛrɛbɛrɛ sɔrɔn. 20Anu bɔmatoe mansɛ wo warɛ, anu ya a taran, Musa anubɛ Aruna ye anu makɔnɔna kilɛ la. 21Anu ya a fɔ Musa anubɛ Aruna ye ko, “Wo ara min ma, Mari ara wo yen. A si wo tɔrɔ kamasɔrɔn wo ara ma magboya mansɛ anubɛ ala mɔgɔ-banu bara la. Wo ara ma faga-kilɛ yira anu na.”

Musa Karanton-Koe Mari Ma

22Musa tara Mari madiya tinɛ ka a fɔ a ye ko, “Mari, i wara ko-yogomɛ ma ita mɔgɛ kɛnu na nfenna? Nfen ya a to, i ya n sɔ mɔgɛ kɛnu bara? 23Kebi n tara kuma i tɔgɛ rɔ mansɛ wara, a tora ko-yogomɛ le sigila ila mɔgɛnu na worɔ gbɛ tolon! Ile fanan ma ila mɔgɛnu bɔ kun-gbaran rɔ hali!”

Currently Selected:

Bɔ-Koe-Iyipiti 5: KCLB

Highlight

Copy