Bɔ-Koe-Iyipiti 6
6
Musata Sɛnbɛ-Makofu-Koe Mari Bolo
1Mari ya a fɔ Musa ye ko, “N si na min ma ale mansɛ la, i si wo yen i nyɛrɛ yɛ la kaka. Nta sɛnbɛ si a ma, a ni wo boloka, ado a si wo gben ka wo labɔ ata nyamanɛ rɔ.”
2 #
Ko-Dabirɛnu 17.1; 28.3; 35.11; Bɔ-Koe-Iyipiti 3.13-15 Alla ya a fɔ Musa ye ko, “Nde le wota Mari la. 3Nde, Alla Sɛnbɛ-Bɛɛ-Tigi ara n nyɛrɛ yira Iburayima anubɛ Isiyaka anubɛ Yakoba la kɔnɔ n ma n nyɛrɛ tɔgɛ ratɛgɛ anu ye ka a fɔ ‘MARI,’ n habadan-tɔgɛ wo, kɔni. 4N bara nta sarama-kan kiri anu ye ko n si Kenan nyamanɛ di anu ma anu benbanu bi sundanyɛ la nyamanɛ min tɔ nun. 5Iyipiti mɔgɛnu ya Isirɛla mɔgɛ minnu bira yɔɔnyɛ la, n bara wonu di-kɛ-kan lamɔɛn. N bi n hɛnkili lamirila nta sarama-kan ma n ya min kiri anu benbanu ye.
6“Woletɔ a fɔ Isirɛla mɔgɛnu ye ko nde le anuta Mari la min si anu bɔ Iyipiti kɛnuna wɔlɛ kɔrɔ. N si anu bɔ yɔɔnyɛ rɔ ka anu kunka nta sɛnbɛ-makawanɛ la. N si Iyipiti mɔgɛnu tɔrɔ bɛrɛkɛ! 7N si Isirɛla mɔgɛ wonu ma nta mɔgɛnu na. Nde si ma anuta Alla la. N ba anu nabɔ yɔɔnyɛ rɔ Iyipiti kɛnu kɔrɔ tumɛ min, anu si n lɔn anuta Mari Alla la. 8N ya lanyiri kiri nyamanɛ min di-koe rɔ Iburayima anubɛ Isiyaka anubɛ Yakoba ma, n si a ma, anu ni ta anu sigi nyamanɛ wo rɔ. N si nyamanɛ wo ma anu halalɛ la.”
9Musa ya Mari kuman-kan wo latenbi Isirɛla mɔgɛnu ma kɔnɔ mɔgɛ wonu ma anu tole masɔ Marita kumɛ wo la Musa bolo kamasɔrɔn anu niyi ragbɛrɛnnɛ anu ma yɔɔnyɛ bolo.
10Mari ya a fɔ Musa ye ko, 11“I ni ta a fɔ Iyipiti mansɛ ye ko a ni Isirɛla mɔgɛnu boloka ka anu nabɔ ala nyamanɛ rɔ.”
12Musa ya a fɔ Mari ye ko, “Isirɛla mɔgɛnu sa anu tole masɔla nta kumɛ la. Nba, mansɛ wo si a tole masɔ nna kumɛ la kama worɔ, ado n da ra ma di kuma tinɛ?”
13Mari ya a fɔ Musa anubɛ Aruna ye ko, “Wo ta a fɔ Isirɛla mɔgɛnu anubɛ Iyipiti mansɛ ye ko nde le ya ile Musa sɔ ko ile ni ma Isirɛla mɔgɛnu yarɔ-sɔlɛ la ka anu nabɔ Iyipiti nyamanɛ rɔ.”
Aruna anubɛ Musa Benbanu Bɔnsɔn Dan Lɔn-Koe
14Anu benbanu bɔnsɔn-kun-tiginu tɔgɛ le kɛnu na, Yakobala den-kei fɔlɔtɛ tɔgɛ le Rubɛn. Rubɛn wota den-keinu tɔgɛ le kɛnu na, Hanoki wo, Palu wo, Hɛsirɔn wo, anubɛ Karimi. Rubɛnta denbayɛ le wonu na. 15Simiyɔn ya den-kei minnu sɔrɔn, wonu tɔgɛ le kɛnu na, Yɛmuwɛli wo, Yamin wo, Ohadu wo, Yakin wo, Sohari wo, anubɛ Seyuli, Kenan musi do ya min sɔrɔn. Simiyɔnta denbayɛ le wonu na. 16Lifayita den-keinu tɔgɛ le kɛnu na, Kɛrisɔn wo, Kohati wo, anubɛ Mɛrari. Wonuta bɔnsɔn tɔgɛ tora anu kuma. Lifayi siyi ya san kɛmɛ, san bi-sawa, ani san wɔrɔnfila bɔ (137). 17Kɛrisɔn ya den-kei filɛ min sɔrɔn, wonu tɔgɛ le kɛnu na, Libini anubɛ Simayi. 18Kohati ya den-kei nanɛ minnu sɔrɔn, wonu tɔgɛ le kɛnu na, Amiram wo, Yisihari wo, Hiburɔn wo, anubɛ Yusiyɛli. Kohati siyi ya san kɛmɛ, san bi-sawa, ani san sawa bɔ (133). 19#Yilan-Yilan Koe 3.17-20; 26.57-58; 1 Ko-Kɔrɔta-Karan 6.16-19 Mɛrari ya den-kei filɛ minnu sɔrɔn, wonu tɔgɛ le Mehali anubɛ Muhusi. Lifayita dannu bɔnsɔn le wonu na.
20Kohatila dan Amiram ya a tɛnɛ-musi do furu min tɔgɛ Yakabɛdi. Wo ya Aruna anubɛ Musa sɔrɔn a ye. Amiram siyi ya san kɛmɛ, san bi-sawa, ani san wɔrɔnfila bɔ (137). 21Kohatila dan doi, Yisihari ya den-kei sawɛ minnu sɔrɔn, wonu tɔgɛ le kɛnu na, Kora wo, Nɛfɛki wo, anubɛ Sikiri. 22Kohatila dan doi Yusiyɛli ya den-kei sawɛ minnu sɔrɔn, wonu fanan tɔgɛ le kɛnu na, Misɛyɛli wo, Ɛlisafan wo, anubɛ Sitiri. 23Amiramta dan Aruna ya Aminadabula dunmusi Ɛlisiba furu. Neson tirisan-musu-bɛrɛbɛrɛ le Ɛlisiba wo la. Musi wo ya Nedabu wo, Abaihu wo, Ɛliyasa wo, anubɛ Itamarayi sɔrɔn Aruna ye. 24Yisiharila dan Kora wo ya den-kei sawɛ min sɔrɔn, wonu tɔgɛ le kɛnu na, Asiri wo, Ɛlakena wo, anubɛ Abiyasafi. Korata dannu bɔnsɔn le wonu na. 25Arunala den-kei Ɛliyasa ya Putiyɛlila dunmusi do furu. Wo ya Finihasi sɔrɔn a ye.
Ma ara minnu madan kɛnu na, bɔnsɔn-kun-tigi le wonu na. 26Mari kumara Aruna anubɛ Musa ye ka a fɔ anu ye ko anu ni Isirɛla mɔgɛnu nabɔ Iyipiti nyamanɛ rɔ iko anuna bɔnsɔnnu bi nya min. 27Musa anubɛ Aruna le kumara Iyipiti mansɛ ye Isirɛla mɔgɛnu nabɔ-koe ma Iyipiti nyamanɛ rɔ.
Aruna anubɛ Musa Sɔ-Koe Mari Bolo
28-29Mari ya a fɔ Musa ye Iyipiti nyamanɛ rɔ ko, “Nde le wota Mari la. N bi min bɛɛ fɔla i ye, i ni wo fɔ Iyipiti mansɛ ye.”
30Musa ya a fɔ Mari ye ko, “I ya a lɔn ko nde ma kusan kumala. Mansɛ si a tole masɔ nta kumɛ la kama?”
Currently Selected:
Bɔ-Koe-Iyipiti 6: KCLB
Highlight
Share
Copy
Want to have your highlights saved across all your devices? Sign up or sign in
Kuranko Common Language Bible © The Bible Society in Sierra Leone, 2006.
