Bɔ-Koe-Iyipiti 7
7
1Mari ya a fɔ Musa ye ko, “N si ile ma mansɛ wo yala iko nde, Alla. I kɔrɔ-kei si ma ita nɛbi la. 2N ba min fɔ i ye, i si wo fɔ Aruna ye. Wo si i kuman-kan latenbi mansɛ wo ma alako a ni Isirɛla mɔgɛnu nabɔ ata nyamanɛ rɔ. 3#Kɛwɔlɛnu 7.36 N si ale mansɛ yisi gbɛlɛya alako n ni nta kabana-ko-siyamɛ yira a la Iyipiti nyamanɛ rɔ. 4Kɔnɔ ale mansɛ ti a tole masɔ wola kumɛ la. N si n bole fara Iyipiti nyamanɛ la. N si nna mɔgɛnu nabɔ Iyipiti nyamanɛ rɔ kabana-koenu fɛ. 5N ba ban n bole farala Iyipiti kɛnu na tumɛ min ka nna mɔgɛnu nabɔ anu tɛma, Iyipiti kɛnu si a lɔn ko nde le Mari la.”
6Musa anubɛ Aruna ya Marita kuman-kan latɔnbagaya iko a ya a fɔ anu ye nya min. 7Wo wati rɔ, Musa sɔrɔn ara san bi-segin bɔ. A kɔrɔ Aruna wo ara san bi-segin ani san sawa bɔ.
Kabana-Koe Fɔlɔtɛ Musa Bolo
8Mari ya a fɔ Musa anubɛ Aruna ye ko, 9“Mansɛ wa a fɔ wo ye tumɛ min ko wo ni kabana-koe do kɛ, i ni a fɔ Aruna ye ko a ni ala sewuri#7.9 Sewuri: Sewuri min bi Musa bolo wulɛ rɔ nun wo tumɛ Alla ye kumala a ye, ha bi, wo le sewuru kelan ye Aruna bolo kɛ la. lakɛ dugi ma mansɛ yakɔrɔ. Kɔlɔma wo si yɛlɛma duguma-fan la.”
10Musa anubɛ Aruna sɔra Mansɛ yakɔrɔ ka wo ma iko Mari ya anu sɔ nya min. Aruna ya ala sewuri wo bi ka a lakɛ dugi ma mansɛ anubɛ ala mɔgɔ-banu yakɔrɔ. Sewuri wo mara duguma-fan la anu yala. 11Mansɛ ya ala hɛnkilimɛnu anubɛ kofo-dannu kele. Ale mansɛla kofo-dannu fanan ya a ma wo nya na le anuta kofo-denyɛ rɔ. 12Kofo-dan wonu ya anuta sewurinu nakɛ dugi ma. Wonu fanan yɛlɛmanta duguma-fannu na. Kɔnɔ Arunata sewuri min yɛlɛmanta duguma-fan la, wo ya anutɛnu makunu. 13Hali wo, mansɛ yisi gbɛlɛyara ka tenbi a fɔlɔtɛ la. A ya a tengberenya. A ma a tole masɔ anuna kumɛ la iko Mari ya a fɔ Musa ye nya min.
Iyipiti Mɔgɛnu Tɔrɔ-Koe
(1) Yinu Yɛlɛma-Koe Yele La
14Mari ya a fɔ Musa ye ko, “Mansɛ yisi gbɛlɛyanɛ. A ara a ban mɔgɛnu boloka-koe ma. 15Sɔgɔma wo ni ta mansɛ taran Nayɛli bɛ dala. I ni ta sewuri wo la i bolo min yɛlɛmanta duguma-fan la nun. 16I ni a fɔ ale mansɛ ye ko nde, Hiburunuta Mari Alla ara i sɔ nun ale wara nta mɔgɛnu boloka-koe rɔ alako anu ni ta n bato wulɛ rɔ. Kɔnɔ ha bi, ale mansɛ ma a yisi yɛlɛma.” 17#Lankɛnimayɛ 16.4 Mari ko tun, “Ale mansɛ si a lɔn kɛ le ma ko nde le Mari la. Sewuri min bi i bolo, i ni Nayɛli bɛ gbesi wo la. Bɛ wo si yɛlɛma yele la. 18Yɛgɛ minnu bi bɛ wo rɔ, wonu si faga. Bɛ si kasa bɛrɛkɛ! Iyipiti kɛnu si nyima a rɔ.”
19Mari ya a fɔ Musa ye tun ko, “A fɔ Aruna ye ko a ni ala sewuri wo bi ka a rasagan Iyipiti yinu kuma, anuta bɛnu wo, yi-bolɔnnu wo, anuta dalɛnu wo, anubɛ yi minnu bi yi-dagɛnu tɔ, wonu si ma yele la. Yi siginɛ kan-bo-kan, hali a taranta yi-dagɛ le tɔ, wo bɛɛ si yɛlɛma yele la.”
20Mari ya a fɔ Musa anubɛ Aruna ye nya min, wo banda kɛ, anu ya a ma wo nya na le. Aruna ya sewuri wo bi ka bɛ wo gbesi a la mansɛ ani ala mɔgɔ-banu yala. Nayɛli bɛ wo yɛlɛmanta yele la. 21Yɛgɛ wonu fagara. Bɛ wo kasara warawara! Yi ye kan tinɛ minnu bɛɛsi rɔ Iyipiti nyamanɛ rɔ, wonu yɛlɛmanta yele la. Iyipiti kɛnu ma ke yi wonu minna kasɛ bolo.
22Ale mansɛla kofo-dannu fanan ya a ma wo nya anuta kofo-denyɛ rɔ. Hali wo, mansɛ yisi gbɛlɛyara ka tenbi a fila nyɔgɛ la. A ma sɔn Musa anubɛ Arunata kumɛ birala. Iko Mari ya a fɔ nya min, Mari kuman-kan bɔra-a-la. 23Wo bɔrɔ ma taran ale mansɛ ye. A ya a kan-kɔ sɔ ka sɛgi ala bɔn la. 24Iyipiti kɛnu ya kɔlɔnnu sin Nayɛli bɛ dafɛ alako anu ni min-kɛ-yi sɔrɔn bawo anu ti ke ba-yi wo minna kasɛ bolo.
(2) Turukɔɔkɔnu Bara-Koe
25Tele wɔrɔnfilɛ kɛ kɔma,
Currently Selected:
Bɔ-Koe-Iyipiti 7: KCLB
Highlight
Share
Copy
Want to have your highlights saved across all your devices? Sign up or sign in
Kuranko Common Language Bible © The Bible Society in Sierra Leone, 2006.
