Ko-Dabirɛnu 49

Yakobala Wɔlɔyiya-Kumɛ Ala Dannuna Ko La

1Yakoba ya ala dannu kele. Anu ya anu nadɛn a dafɛ. A ya a fɔ anu ye ko, “Koe minnu bi nala mala wo la yarɔ, nde, Isirɛla bi nala wonu denu fɔla wo ye kɛ la.

2Nna dannu, wo ni wo madon n na ka wo tole masɔ nna kumɛ kɛnu na.

3“Rubɛn, nna sarɛ le ile la.

Ile le ya nna keiyɛ labɔ gbɛ ma.

Sɛnbɛ anubɛ gbiliyɛ ye ile bolo ka tenbi nna dan doinu na.

4 # Ko-Dabirɛnu 35.22 Kɔnɔ ni gboron-gboronna-yi si ke a nyɛrɛ marala,

mani, ile si ke i nyɛrɛ marala.

I ti ma kun-tigi la tun bawo i ya n namiliya

ka i sa nna musi do fɛ.

5“Simiyɔn anubɛ Lifayi, na-kelen-dan de wole la, ado sɔn kelen le wole la fanan.

Wo ya wola kɛlɛ-kɛ-fannu ma murutiya-fannu na ka bui mɔgɛnu ma.

6N ti basan wo la gbundu-koe fɔ tinɛ

hali ka ntɛ fɔ wota ladɛn kuma.

Ni wo yisi magboyara doni bɛrɛni, wo si mɔgɛnu faga.

Ni yɛlɛn-sɔgɛ ya wo bira, wo si turɛnu kin-kɔma-fasɛnu natɛgɛ alako wo ni anu mayɛlɛn.

Woletɔ n ti kofu wo ma mumɛ, wola gbundinu tɔ.

7Alamɛ yili kirita wola yisi-magboyɛ wo dan la bawo wo ara wotɛ latenbi.

Woletɔ wole Simiyɔn anubɛ Lifayi bɔnsɔnnu ta si nyɛnsɛn nde, Yakoba bɔnsɔnnu tɛma Isirɛla nyamanɛ rɔ.

8“Yuda, i na-kelen-nyɔgɛnu si i tanto ka anu madu i kɔrɔ.

I si i yogenu nɔ.

9 # Yilan-Yilan Koe 24.9; Lankɛnimayɛ 5.5 Yuda, i bɔnsɔn si ma iko yara-bulan min si mansayɛ kɛ soge bɛɛ kuma.

A wa ta soge bira, a ni na a la faran la ka a dɔn saa!

A wa ban a dɔnna tumɛ min, a si a nyɛrɛ rasagan nyaratata ka a sa.

Sogo-wo-sogo ti sisi a la.

10Ile Yuda, i bɔnsɔn si ma wo nya na le.

Mɔgɔ-wo-mɔgɔ ti sisi i sɔ tinɛ bɔla i bolo.

Mansayɛ ti bɔ ile Yuda bɔnsɔn bolo

ha Mansa-bɛrɛbɛrɛ si na, duninya bɛɛ si min gbiliya.

11Mansɛ wo ti kilan ala sofɛlɛ kirila nɔnbɔ-kurinu tɛma nɔnbɔ-gbɔɛnu siya kan min!

A si ala kurɛnu ku nɔnbɔ-gbɔ-yi wo la siyayɛ bolo.

12A yɛ si malan nɔnbɔ-gbɔ-yi-minyɛ bolo.

A nyin si gbɛ nono-minyɛ bolo.

13“Ile Sɛbulɔn, i bɔnsɔn si sigi kɔgɔ-yi dafɛ.

Nyɔ si ma kulun nasɔ tinɛ la.

Ita nyamanɛ si ta fɔɔ Saidon soe.

14“Ile Isakari, i bɔnsɔn si ma le iko sofɛlɛ tinya-mansɛ

min sɔnɛ ata dunu filɛ la a bolo.

15Ile Isakari, i bɔnsɔn si na nyamanɛ min sɔrɔn, wo kin.

Yanni anu ni foo anuta nyamanɛ wo la,

anu si sɔn ka yɔɔnya-wɔlɛ kɛ nyamanɛ wo rɔ.

16“Ile Dan, i bɔnsɔn si ma kiti-tɛgɛ-latelennɛ anubɛ kɛlɛ-kurugbɛ la

Isirɛla bɔnsɔn doinu tɛma.

17Anu si halliyɛ ladan anu yogenu nɔ-koe la

iko tunfi min bi a dogonna kilɛ la soeenu kin-koe la

alako so-laburilɛ wo ni bui.”

18Yakoba ya madiyali kɛ ko, “E, n Mari, mabɛ nna dannu bi ila kisi-koe makɔnɔna.” Wo kɔma, a ya wɔlɔyiya-kumɛ dabira tun.

19“Ile Kadi, mɔgɛnu si na bui i bɔnsɔn ma

kɔnɔ wo kɔma, yili si sigi a tɛrɛn na.

I bɔnsɔn ni anu gben.

20“Ile Asɛra, dɔn-fannu ti dasa i bɔnsɔnla nyamanɛ rɔ.

Mansɛnuta dɔn-fannu si bɔ ile bɔnsɔn bolo.

21“Ile Nafatali, i bɔnsɔn la si to lafɛrɛ rɔ

iko minan-musi min bi a kun fɛ.

Ko-nyimɛ si bɔ i bɔnsɔn rɔ

iko minan-musi si to den-nyimɛnu sɔrɔnna nya min.

22“Ile Yusufu, i bɔnsɔnnu si sabati iko kɔlɔma kuru-gbɔnɛ min bi tenke dafɛ.

A si nanfa kubukubu, ka a bolɔnnu nata soe tarɛ kuma.

23I yogenu si to ile Yusufu bɔnsɔnnu makeliyala ka anu kɛlɛ kalabɛn la.

24Kɔnɔ hali wo, nde, Yakobata Alla Sɛnbɛ-Bɛɛ-Tigi,

wo ya Yusufuta kalabɛn ragbɛlɛya. A ti bɔ a gbɛ rɔ.

Ma makandannɛ le ale la.

Wo le si a ma, ile Yusufu bɔnsɔnnu ti kilan. Anu si anu sɔ gben!

25Anu si anu sɔ gben, bawo ndeta Alla le wo la min bi anu dɛnbɛna.

Alla Sɛnbɛ-Bɛɛ-Tigi le wo la min bi ata duwɛ tola wo kuma

ka bandɛ lana wo kuma ka yi labɔ dugi kɔrɔ wo ye.

A si a ma, i bɔnsɔnnu ni yiri.

Ila kolo-fannu fanan ni sabati.

26N bara duwɛ minnu kɛ ile Yusufu ye kɛ la,

wo kolo ndeta duwɛ ko i benbanu ya min kɛ nde ye.

Iko kɔnkɔ-wɛnu bara mɛ dugu-kole kɛ kuma nya min,

ileta duwɛ si mɛ wo nya na le.

Ile Yusufu min bi i na-kelen-nyɔgɛnu kun na kɛ la,

alamɛ duwɛ kɛnu birara ile ma.

27“Ile Bɛnyamɛ, i bɔnsɔn si to anu yogenu birala

iko suluku-feremɛ si to sogenu birala sɔgɔma ani wurɛ la nya min.”

28Yakoba ya wɔlɔyiya-kumɛ minnu fɔ ka a masara ale Isirɛlala den tan-ni-filɛ la nya min, wo le wonu na.

Yakoba Faga-Koe

29-30 # Ko-Dabirɛnu 23.3-20 Wo kɔma, Yakoba ya a fɔ ala dannu ye ko, “N sa mɛla fagala tun ka ta n benbanu taran lakira. Kɔnɔ ni n fagara tumɛ min, n benba Iburayima ya dugi min san Hɛti kɛ Ɛfirɔn ma Makipela tɛngbɛnya rɔ Mamireta kɔlɔmanu tele bɔɛ Kenan nyamanɛ rɔ, wo ni ta n togon n benbanu fɛ faran wo la. Mala kaburu-soe le nyɔ la. 31#Ko-Dabirɛnu 25.9-10; 35.29 N benba Iburayima anubɛ ala musi Sira togonta nyɔ le. N fa Isiyaka anubɛ ala musi Rebɛka togonta nyɔ le fanan. N ya nna musi Liya fanan togon nyɔ le. 32Faran wo anubɛ dugi min bi ala foolɛ rɔ, Iburayima ya wo san Hɛtinu ma.”

33 # Kɛwɔlɛnu 7.15 Yakoba banta wonu fɔla tumɛ min, a ya a sa ka so-sɛgi-kɛ.

Currently Selected:

Ko-Dabirɛnu 49: KCLB

Highlight

Copy