Ko-Dabirɛnu 50

1Yusufu ya a du a fa furi kuma. A dira ka a fa sunbu. 2Yusufu ya a fɔ ala bɛsi-bɔlɛnu ye ko, “Wo ni n fa furi wɔli alako a kana na tuli.” Anu ya a ma iko Yusufu ya a fɔ anu ye nya min. 3Ka furi wɔli, tele bi-nani wɔlɛ le wo la. Tele bi-wɔrɔnfila kɔrɔ, Iyipiti kɛnu bi Yakoba dila.

4Diyi-kɛ wo kara-a-la tumɛ min, Yusufu ya a fɔ mɔgɔ-ba donu ye ko, “Wo ta a fɔ mansɛ ye ko 5#Ko-Dabirɛnu 47.29-31 yanni n fa ni a layigi tumɛ min, a ya a ma, n ya n keli a ye. A ara kaburu-soe min tabɛn Kenan nyamanɛ rɔ a ko n ni ta a togon nyɔ rɔ. Woletɔ n bi mansɛ madiyala ni a si sɔn, n ni ta n fa togon. N ba ban a togonna tumɛ min, n si sɛgi.” Mɔgɔ-banu tara wo fɔ mansɛ ye.

6Mansɛ ya a yabi ko, “Ta, i ni i fa togon iko i ya i keli a ye nya min.”

7-8Yusufu anubɛ a na-kelen-nyɔgɛnu anubɛ anuna denbayɛnu tara anu fa furi la a togon tinɛ. Mansɛla kun-tiginu anubɛ Iyipiti mɔgɔ-banu, wonu dama bilara anu fɛ. Fɔ anuna dannu anubɛ anuna kolo-fannu, anu ya wonu denu dɔrɔn to anu kɔma Kosɛn sigisɔn rɔ. 9Mɔgɛnu tara kirindinu anubɛ soeenu na anu bolo. A mara sɛrɛ-kɔngbɛ#50.9 Kɔngbɛ: Kurankɔɛ donu si a fɔ ko, “Sɛrɛ-belebele.” la.

10Anu kera gbere-kole do ma Yorodan bɛ dafɛ min tɔgɛ Atadi. Tele wɔrɔnfila, anu bi Yakoba dila nyɔ. 11Kenan kɛnu ya anu yen dila nyɔ min kɛ, anu ko, “Nba, hɛrɛ-di-kɛ ma kɛ la, nyɛ?” Woletɔ anu ya nyɔ tɔgɔ sa Abɛli-Misiram bawo tɔgɛ wo kɔrɛ le iko mɔgɔ wa a fɔ ko, “Iyipiti kɛnu di-kɛ-tinɛ.”

12-13 # Kɛwɔlɛnu 7.16 Yakobala den-keinu tara a furi la ha faran wo la anu benba Iburayima ya min san Hɛti kɛ do ma min tɔgɛ Ɛfirɔn. Faran wo ye Makipela tɛngbɛnya rɔ Mamireya telen tɔ Kenan nyamanɛ rɔ. Anuta kaburu-soe le faran wo la. Ala den-keinu ya a togon iko a ya a fɔ anu ye nya min. 14Yusufu anubɛ a na-kelen-nyɔgɛnu anubɛ anu gba-fɛ-bilalɛnu bɔra a fa togon tinɛ ka sɛgi Iyipiti nyamanɛ rɔ.

Yusufu Kɔrɔnu Yisi-Kima-Kumɛ Fɔ-Koe

15Nba, Yusufu na-kelen-nyɔgɛnu ya a yen tumɛ min ko anu fa ara faga, anu ya anu nyɔgɔn manyinika ko, “Ma ya ko-yogomɛ minnu ma Yusufu la, ni a ya a tayili sara ma la, wo si ma kama?” 16Woletɔ anu ya kilayɛ lata a ma, anu ko, “I wa ta, i ni a fɔ Yusufu ye ko yanni ma fa ni faga, 17a ya a fɔ ma ye ko ma ni ale Yusufu madiya alako ma ya ko-yogomɛ minnu ma a la, a ni ma makoto wo la. Kaka, male min bi a fata Alla kɔrɔ, ma ye ale madiyala, a ni ma to nyɔ a fata Alla wola ko la.” Yusufu ya kilayɛ wo lamɔɛn tumɛ min, a dira biribiri!

18A ma mɛ, a kɔrɔ wonu nyɛrɛ-nyɛrɛ tara Yusufu wara. Anu ya anu madu a kɔrɔ ka a fɔ a ye ko, “Ma nara le iko ila yɔɔnnu. Ni ko-wo-ko diyara i ye, i ni wo ma ma la.”

19Yusufu ya a fɔ anu ye ko, “Wo kana kilan. Alla ma nde la! 20Wole ya ko-yogomɛ sigi n na kɔnɔ Alla ya a yɛlɛma n ye a nyimɛ la alako mɔgɔ siyaman ni kanan n fɛ. 21Wo kana kilan fenfen na. N si wobɛ wola dannuna dunɛ bi.” A ya anu yisi-kima-kumɛnu fɔ.

Yusufu Faga-Koe

22Yusufu anubɛ a fala denbayɛ tora Iyipiti nyamanɛ rɔ. 23Yusufu kɔrɔyara ha a ya a tolo-birɛnu yen, ala den-keinu Ifɛrɛm anubɛ Manasa mamanɛnu, kɔni. Hali ala dan Manasata den Makiri, a ya wota dan yen a yɛ la.

24Yusufu ya a fɔ a na-kelen-nyɔgɛnu ye ko, “Nde fagamatoe le kɛ la. Alla si wo kandan yati, ka wo bɔ yan ka ta wo la lanyiri-nyamanɛ rɔ iko a ya lanyiri kiri ma benba-benbɛ Iburayima anubɛ ma benba Isiyaka anubɛ ma fa Yakoba ye minna ko la. 25#Bɔ-Koe-Iyipiti 13.19; Yasowa 24.32; Hiburunu 11.22 Kɔnɔ yanni n ni faga tumɛ min, wo ni wo keli n ye ko ni wo ti ta n kolenu na Kenan nyamanɛ rɔ. Woletɔ wo kana sika, Alla si wo kandan yati!”

26Yusufu-sɔrɔn ya san kɛmɛ ani san tan (110) bɔ, a nara to fagala Iyipiti nyamanɛ rɔ. Anu ya a furi wɔli alako a kana tuli. Anu ya a sa kenkirɛ rɔ.

Currently Selected:

Ko-Dabirɛnu 50: KCLB

Highlight

Copy