Yɔni 21

Yisa Bɔ-Koe Gbɛ rɔ Karan-Den Wɔrɔnfilɛ Ye

1Wo kɔma, Yisa ya a nyɛrɛ yira ala karan-dannu na tun Taibiriya dalɛ dafɛ. A ya a nyɛrɛ yira anu na nya min, wo le kɛ la. 2Yisala karan-dan minnu nadɛnnɛ nun, wo le kɛnu na—Saimon Pita wo, Tamasi wo (anu bi min kelela ko, “Fɛran”), Nataniyɛli wo (min bɔra Kalili-Kena soe burɔ), Sɛbɛdila dannu wo, anubɛ ala karan-den fila gbɛrɛ fanan.

3 # Luka 5.5 Saimon Pita ya a fɔ a ta-nyɔgɛnu ye ko, “N bi tala yɛgɛ bira tinɛ.”

Anu ya a fɔ a ye ko, “Male fanan bi tala le i fɛ.”

Anu bilara a fɛ kulɔn rɔ. Kɔnɔ anu ma fenfen bira suyi wo rɔ. 4Sun-tele-tumɛ, Yisa sɔra yi da la kɔnɔ ala karan-dannu ma a lɔn Yisa la.

5Yisa ya anu manyinika ko, “Nna dannu, wo ma fenfen bira?”

Anu ya a yabi ko, “Ma ma fenfen bira de!”

6 # Luka 5.6 A ya a fɔ anu ye ko, “Wo ni wola yalɛ lakɛ wo bolo-nyimɛ rɔ. Woletɔ wo si do bira.” Anu ya yalɛ lakɛ nyɔ. Nba, anu ma ke a saganna bawo yalɛ lafanɛ yɛgɛ la pen!

7Yisa diyana-karan-dan, wo ya a fɔ Pita ye ko, “Mari le.” Saimon Pita ya wo lamɔɛn tumɛ min ko Mari le, a ya ala duruku-ba mamɔrɔ a ma bawo a ara a labɔ a ma nun. A gbanta ka yigi yi rɔ. 8Karan-den-doinu nara kulɔn la gbele ma. Anu bi yalɛ saganna min fanɛ yɛgɛ la. Anu fɛ ma yan gbele la, nunkan-nya kɛmɛ fila nyɔgɔn le nun.

9Anu kera gbele ma tumɛ min, anu ya ta-wɔlɔn ladɛnnɛ taran, yɛgɛnu bi ta-wɔlɔn wo kuma. Biredi fanan bi nyɔ.

10Yisa ya a fɔ anu ye ko, “Yɛgɛ min bira-san wo bolo wo la, wo na do la wo bolo.” 11Saimon Pita donta kulɔn rɔ ka yalɛ masagan gbele ma. A lafanɛ yɛgɛ-kinamɛ-gbansan la, yɛgɛ kɛmɛ ani yɛgɛ bi-loli ani yɛgɛ sawa (153). Yɛgɛ siyamɛ wo bɛɛ ma yalɛ rafara.

12Yisa ya a fɔ anu ye ko, “Wo na wo da raka.” Ala karan-dan fenfen ma sisi a manyinikala ko, “Yon bi ile la,” bawo anu ya a lɔn ko Mari le. 13Wo kɔma, Yisa tara biredi anubɛ yɛgɛ do bi ka wo di anu ma.

14Yisa lawuli kɔmɛ ka bɔ furinu tɛma, a sawa nyɔgɔn le kɛ la, a ya a nyɛrɛ yira ala karan-dannu na.

Yisa anubɛ Pita Wara-Koe

15Anu banta anu da-rakɛ la tumɛ min, Yisa ya Saimon Pita manyinika ko, “Saimon, Yɔnila dan, ila keninteyɛ tenbira ala karan-den-doi kɛnutɛ la, wa?”

A ya a yabi ko, “Ɔnde, Mari, i ya a lɔn ko i keninɛ n bolo.”

Yisa ya a fɔ a ye worɔ ko, “I ni nna mɔgɛnu fɛ-bira iko mɔgɛ si sagɛnu fɛ-bira nya min.”

16Yisa ya a manyinika tun ko, “Saimon, Yɔnila dan, i ya n keni, wa?”

A ya a yabi ko, “Ɔnde Mari, i ya a lɔn ko i keninɛ n bolo.”

Yisa ya a fɔ a ye worɔ tun ko, “I ni nna sagɛnu de-nyini.”

17A kinyama sawa nyɔgɛ, Yisa ya nyinikalɛ kɛ, a ko, “Saimon, Yɔnila dan, n di i ye, wa?”

Pita ya a funu bawo Yisa ya a manyinika. A ko, “Mari, i ya koe bɛɛ lɔn, i ya a lɔn ko i keninɛ n bolo.”

Yisa ya a fɔ a ye ko, “Nna sagɛnu fɛ-bira. 18N bi tonyɛ fɔla i ye, i ye fonikeyɛ rɔ tumɛ min, i duruta i nyɛrɛ mabɛnna ka ta kan tinɛ rɔ min di i ye. Kɔnɔ i wa kɔrɔya tumɛ min, i si i bolenu tasagan. Mɔgɔ-gbɛrɛ si i mabɛn ka ta i la kan tinɛ do rɔ min ma di i ye.” 19(Yisa ya kɛ fɔ ka a mayira Pita faga-nya si Allala gbiliyɛ mayira nya min.) Wo kɔma, Yisa ya a fɔ Pita ye ko, “Bila n fɛ!”

Yisa anubɛ Karan-Dan Donu Bara-Koe

20Pita ya a tintan ka Yisa diyana-karan-dan yen a kɔma, ado wo siginɛ Yisa dafɛ fen dɔn tinɛ nun. Ale le ya nyinikali kɛ nun ko, “Mari, yon si i maburi?” 21Pita ya wo yen tumɛ min, a ya a fɔ Yisa ye ko, “Mari, kei kɛ don?”

22Yisa ya a yabi ko, “Ni n bi a fɛ, ale ni to ha n ni na, ila ko le wo rɔ? Bila n fɛ tun!” 23Nba, kumɛ kɛ nyɛnsɛnta Yisala karan-dannu tɛma ko ala karan-dan doi kɛ ti faga. Kɔnɔ Yisa ma a fɔ ko a ti faga. A ko, “Ni n bi a fɛ, ale ni to ha n ni na, ila ko le wo rɔ?”

24Karan-dan wo ara koe kɛnu fɔ ka anu sɛbɛ fanan. Ma ya a lɔn ko a ya min fɔ, tonyɛ le.

Kuma-Laban

25Nba, Yisa ya ko siyaman kɛ. Ni wo bɛɛ sɛbɛra nun kelen-kelenyɛ ma, n bi n mirila ko kitabu minnu si sɛbɛ nun, wonu ti kun hali duninya kɛ bɛɛ rɔ nun.

Currently Selected:

Yɔni 21: KCLB

Highlight

Copy