Saraka-Masɔlɛnuta Tɔnnu 5
5
(5) Hakɛ-Sarakɛnu Si Bɔ Minna Ko La
1“Ni mɔgɔ ya hakɛ kɛ sufanu kɛ, a bɛnta a ni to sarakɛ kɛnu bɔla a hakɛla ko la.
“Ni anu ya mɔgɛ do kele kiti tɛgɛ tinɛ kɔnɔ a ya min namɔɛn ani a ya min tayen, ni a ma sɔn wo bɛɛsi rakaranna, wo hakɛ si to a kuma bawo a ma sɔn sereyɛ bɔla.
2“Ni a mara, mɔgɛ do ni a bole tugu fen do la min ma sɛninya iko tɔn ya a fɔ nya min iko sogo-suyi sufa, ni a ya a lɔn tumɛ min ko a ya wo ma, a ara yiliki worɔ. A sɛninyani ma worɔ.
3“Ni a mara, mɔgɛ do ni a bole tugu fenfen na min bɔnɛ hadama-dan-sɛninyabɛlɛ rɔ iko tɔn ya a fɔ nya min, ni a ya a lɔn tumɛ min ko a ya wo ma, a ara yiliki worɔ. Ale fanan sɛninyani ma worɔ.
4“Ni mɔgɛ ya kuntanya dakan-don fenfenna ko la, a mara a yogoma la, a mara a nyimɛ la, ni a banta wo lɔnna tumɛ min a ya min ma, a ara yiliki worɔ.
5-6“Ni mɔgɛ ara yiliki sufa kɛnu sɔrɔn, fɔ a ni ta a sɔn a nyɛrɛ hakɛ la gbɛ rɔ Mari ye, saraka-masɔlɛ yakɔrɔ. A si na baa-yɛrɛ la a bolo ka wo ma a hakɛ-sarakɛ la, ni wo ma, saga-yɛrɛ. Saraka-masɔlɛ si sarakɛ wo dantɛgɛ Mari ma ka wo ma a hakɛ-yamatogon-fan la.
(6) Bolo-Kolɔnta Saraka-Bɔ-Nya
7“Ni hakɛ-tigi ti ke sagɛ sɔrɔnna, ni wo ma, baa, a si na kangbo fila la a bolo. Ni kangbo sa a bolo, a si purulen fila bi. Kelan a hakɛ-sarakɛ, kelan saraka-mintantɛ. 8A wa na wonu na saraka-masɔlɛ wara tumɛ min, wo si a hakɛ-sarakɛ fɔlɔn bɔ. A si kona kan mɔrɔndɔ kɔnɔ a ti a kunyɛ bɔ a la. 9A si a yele do pusen saraka masɔ tinɛ tɔnkɔn kelan ma. A yele-toe min bi bɔla, a si wo rawuya dugi ma saraka-mintan-tinɛ kɔrɔ. Sarakɛ le kɛ la min si a hakɛ yamatogon. 10A si kona doi wo bi ka wo ma saraka-mintantɛ la iko anu si saraka-mintantɛ bɔ nya min. Mɔgɛ wota saraka-bɔ-nya le kɛ la saraka-masɔlɛ bolo. Sarakɛ kɛ si a hakɛ yamatogon. Mari si a makoto worɔ.
11“Ni a ti ke kangbo filɛ wo sɔrɔnna, ni wo ma, purulen fila, a si na dɛgɛ-munke pani-kunbɛ-nya kelen na a bolo ka wo ma a hakɛ-sarakɛ la. Kɛ sa iko dɛgɛ-munku-saraka-doi wonu bawo a ti a ramaga tuli la ani a ti isɛnti sa a kuma. Hakɛ-sarakɛ le kɛ la. 12A si na a la saraka-masɔlɛ wara. Saraka-masɔlɛ wo si a bolo-nya kelen bi ka a sa tɛ rɔ. Bolo-nya kelan wo si ma iko a ya a damasi mintan Mari ye. 13Mɔgɛ wota saraka-bɔ-nya le kɛ la saraka-masɔlɛ bolo. Sarakɛ kɛ si a hakɛ yamatogon. Mari si a makoto worɔ. Dɛgɛ-munke wo toe si to saraka-masɔlɛ bolo iko dɛgɛ-munku-saraka-doi wo mara nya min.”
Yiliki-Sarakɛnu
14Musa ya Mari kuman-kan latenbi Isirɛla mɔgɛnu ma ko, 15“Ni mɔgɔ-wo-mɔgɔ ya hakɛ kɛ bawo a bɛnta ka min di Mari ma, a ni nyina wo ko, fɔ a ni yiliki-sarakɛ bɔ a hakɛ wola ko la. A si na saga-yigi la a bolo, fɛɛ sa min na ka wo ma a yiliki-sarakɛ la. Anu si kolo-fan wo mɔlɔn tɛgɛ iko Marita Fani-Bɔnna wodi-gbɛ ye nya min. 16Ni a nyinara min ko, a si wo nyɔgɔn lasɛgi Mari ma. Ni a nyinara loli-loli le ko a bɛnta ka min di Mari ma, a si kelen-kelen sa wo kuma, a ni ma wɔrɔ-wɔrɔ. A si fan kɛ mumɛ bɛɛ bi ka a don saraka-masɔlɛ bolo. Saraka-masɔlɛ si kolo-fan wo bi ka a di Mari ma saraka-bɔlɛ hakɛla ko la. Sarakɛ kɛ si a hakɛ yamatogon. Wo le si a ma, Mari si a makoto worɔ.
17“Ni mɔgɛ do suira ko a ya Mari tanɛ do tinya kɔnɔ a ma a lɔn, wo tigi si yiliki sɔrɔn. A si sarakɛ bɔ a hakɛ wola ko la, yɔ! 18A si na saga-yigi la a bolo, fɛɛ sa min na ka wo ma a yiliki-sarakɛ la. Anu si kolo-fan wo mɔlɔn tɛgɛ iko Marita Fani-Bɔnna wodi ye nya min. Saraka-masɔlɛ si kolo-fan wo bi ka a di Mari ma saraka-bɔlɛ hakɛla ko la. Sarakɛ kɛ si a hakɛ yamatogon. Mari si a makoto worɔ.” 19Sarakɛ le kɛnu na bawo a ara hakɛ kɛ Mari la.
Currently Selected:
Saraka-Masɔlɛnuta Tɔnnu 5: KCLB
Highlight
Share
Copy
Want to have your highlights saved across all your devices? Sign up or sign in
Kuranko Common Language Bible © The Bible Society in Sierra Leone, 2006.