Ɛksodɔs 12
12
Di Pasova
1PAPA GƆD bin tɔk to Mozis ɛn Erɔn we dɛn bin stil de Ijipt. I se, 2“Dis mɔnt na di fɔs mɔnt na di ia fɔ una. 3Tɛl ɔl di Izrɛlayt pipul dɛn se di de we mek tɛn na dis mɔnt ɛvri famili fɔ chuz wan yɔŋ ship ɔ yɔŋ got fɔ mek sakrifays. 4If di pipul dɛn na ɛni famili nɔ bɔku ɛn dɛn nɔ go ebul it di wanol yɔŋ ship, dɛn fɔ jɔyn wan ɔda famili we de nia dɛn ɛn di tu famili dɛn fɔ sheb am. Dɛn go sheb am mek ɔlman gɛt wetin i ebul fɔ it. 5Di animal dɛn we una pik fɔ bi wan ia ol got ɔ ship ɛn i nɔ fɔ gɛt bɔt pan in bɔdi. 6Ivintɛm na di de we mek fotin pan di mɔnt ɛvri famili na di Izrɛlayt kɔmyuniti go kil dɛn yon animal. 7Dɛn fɔ tek sɔm pan di animal in blɔd ɛn rɔb am na di domɔt in frem, di wan we krɔs pantap ɛn di tu we tinap tret. Nainsay di os dɛn de dɛn go gɛt fɔ it di animal. 8Da sem nɛt de dɛn fɔ ros di animal we dɛn dɔn kil ɛn it in bif wit bita tin dɛn ɛn bred we nɔ gɛt yist. 9Dɛn nɔ fɔ it di bif rɔ wan ɛn dɛn nɔ fɔ bwɛl am. Na ros nɔmɔ dɛn fɔ ros am ɛn dɛn fɔ ros di ed, di fut dɛn ɛn di gɔt ɔl. 10Dɛn nɔ fɔ lɛf ɛni pan di it te mɔnin. Ɛnitin we dɛn nɔ ebul fɔ it dɛn fɔ bɔn am da sem nɛt de. 11Dɛn fɔ it dis it ya kwik kwik wan. We dɛn de it am dɛn fɔ dɔn drɛs lɛkɛ udat dɔn rɛdi fɔ go patrol. Dɛn fɔ wɛr dɛn sandals na dɛn fut ɛn ol dɛn wɔkinstik. Dis pasova fɛstival#12:11 Pasova Fɛstival Na tɛm fɔ mɛmba wetin PAPA GƆD du di tɛm we i kil di fɔs-bɔy-pikin dɛn na Ijipt fɔ fri di Izrɛlayt dɛn na di kiŋ in an. na fɔ ɔna mi.
12“Da sem nɛt de a go pas na Ijipt ɛn kil ɔl di fɔs-bɔy-pikin dɛn ɛn ɔl di fɔs man animal dɛn, ɛn a go briŋ jɔjmɛnt pan ɔl di gɔd dɛn na Ijipt bikɔs mi na PAPA GƆD. 13Di blɔd we una go rɔb na una domɔt frem go bi sayn fɔ sho se na una de na dɛn os dɛn de. We a si di blɔd a go pas oba una ɛn nɔn pan una nɔ go day we dis waala kam na Ijipt. 14Una fɔ mɛmba dis de ɔltɛm, ɛn ɛvri ia una fɔ sɛlibret am as spɛshal fɛstival to mi we na una PAPA GƆD.
Di Fɛstival Wit Bred We Nɔ Gɛt Yist
15“Fɔ sɛvin de, di bred we una fɔ it na bred we dɛn bek we nɔ gɛt yist. Frɔm di fɔs de una fɔ dɔn pul ɔl di yist kɔmɔt na una os. Ɛnibɔdi we it bred we dɛn bek wit yist ɛnitɛm insay da sɛvin de de, dɛn fɔ drɛb am kɔmɔt na di Izrɛlayt kɔmyuniti. 16Di fɔs de pan di fɛstival ɛn di las de, ɔlman fɔ gɛda fɔ wɔship PAPA GƆD. Una nɔ fɔ du ɛni wok dɛn de de, pas nɔmɔ fɔ mek it fɔ una ɔl fɔ it. 17Una fɔ sɛlibret di fɛstival wit bred we nɔ gɛt yist, fɔ mek una go de mɛmba di de we a pul una kɔmɔt bay una famili na Ijipt. Una fɔ sɛlibret dis fɛstival ɔltɛm. 18Frɔm ivintɛm na di de we mek fotin pan di fɔs mɔnt sote di de we mek twɛnti-wan, na bred we nɔ gɛt yist una fɔ de it. 19Dɛn sɛvin de de, nɔbɔdi nɔ fɔ kip ɛni yist nain os. Ɛnibɔdi we it ɛnitin we yist de pan dɛn fɔ pul am kɔmɔt na di Izrɛlayt kɔmyuniti, i lɛk sɛf di pɔsin na fɔrina we tap wit una. 20Mek a tɔk am bak. Dɛn sɛvin de dɛn de una nɔ fɔ it ɛnitin we gɛt yist pan am. Una fɔ it bred we nɔ gɛt yist.”
21Dɛn Mozis sɛn kɔl ɔl di big wan dɛn pan di Izrɛlayt dɛn ɛn tɛl dɛn mek dɛn pik wan yɔŋ ship ɔ got ɛn kil am so dat dɛn famili dɛn go sɛlibret di pasova fɛstival. 22I se dɛn fɔ dren di animal we dɛn kil in blɔd insay wan bol. Dɛn dɛn fɔ tek sɔm branch pan di Isɔp tik ɛn dip am insay di blɔd. Dɔn dɛn fɔ tek di branch ɛn rɔb di blɔd na di domɔt in frem, dat na di tu we tinap tret ɛn di wan we krɔs pantap. I se nɔbɔdi nɔ fɔ kɔmɔt insay in os kam na do pas te na mɔnin, 23bikɔs PAPA GƆD pas insay Ijipt ɛn kil ɔl di Ijipshian dɛn fɔs-bɔy-pikin. I se, we PAPA GƆD si di blɔd na una domɔt nɔ go mek di enjɛl we de fɔ kil go insay una os ɛn kil una fɔs-bɔy-pikin dɛn. 24Una nɔ fɔgɛt dɛn tin dɛn ya so we a dɔn tɛl una, ɛn una ɛn una jɛnareshɔn dɛn gɛt fɔ du dɛn sote go.
25Wɛn una go na di land we PAPA GƆD dɔn prɔmis fɔ gi una, una fɔ kɔntinyu fɔ sɛlibret dis fɛstival. 26We una pikin dɛn aks una wetin na di rizin fɔ ɔl dis sɛrimɔni, 27una fɔ tɛl dɛn se, “PAPA GƆD bin pas oba di Izrɛlayt dɛn os na Ijipt ɛn i bin kil di Ijipshian dɛn bɔt i bin sɔri fɔ di Izrɛlayt dɛn.”
Dɛn ɔl di pipul dɛn baw dɛn ed ɛn wɔship PAPA GƆD.
28So di Izrɛlayt dɛn du wetin Mozis ɛn Erɔn tɛl dɛn se PAPA GƆD ɔda dɛn fɔ du.
Di Fɔs Bɔy Pikin Dɛn Ɛn Man Animal Dɛn Day
29Midul nɛt PAPA GƆD kil ɔl di fɔs-bɔy-pikin dɛn na Ijipt. Frɔm di kiŋ we de rul in yon fɔs-bɔy-pikin to di jelman we de na lɔkɔp in sɛf yon fɔs-bɔy-pikin. Ɛn i kil di animal dɛnsɛf yon fɔs man pikin. 30Da nɛt de, di kiŋ, in ɔfisa dɛn ɛn ɔl di pipul dɛn bin wek ɛn bɔku, bɔku kray bin de ɔlsay na Ijipt. Nɔn os nɔ de we dedebɔdi nɔ bin le. 31Da sem nɛt de di kiŋ sɛn kɔl Mozis ɛn Erɔn ɛn tɛl dɛn se, 32“Una kɔmɔt na ya, una ɛn di Izrɛlayt dɛn. Una kɔmɔt na dis kɔntri ɛn go wɔship una PAPA GƆD as una bin se. Una tek una ship ɛn got ɛn kaw dɛn go. Una pre mek PAPA GƆD blɛs mi as una de go!”
33Di Ijipshian dɛn beg di Izrɛlayt dɛn mek dɛn mekes kɔmɔt na dɛn kɔntri. Dɛn bin fred se if di Izrɛlayt dɛn nɔ go dɛn ɔl go day. 34Di Izrɛlayt dɛn tek dɛn flawa we dɛn bin dɔn miks fɔ bek bred we nɔ gɛt yist ɛn di tin we fɔ tek bek am, rap dɛn na klos ɛn tot dɛn na dɛn sholda. 35Di Izrɛlayt dɛn bi du ɛgzaktli wetin Mozis bin tɛl dɛn fɔ du. Dat na fɔ aks di Ijipshian dɛn fɔ gi dɛn di gold ɛn silva chen, yerin ɛn baŋuls ɛn fɔ gi dɛn klos. 36PAPA GƆD tɔch mek di Ijipshian dɛn at ɛn mek dɛn gi di Izrɛlayt dɛn ɛnitin we dɛn bin aks fɔ. Na so dɛn bin tek kɛr di Ijipshian dɛn jɛntri go.
Di Izrɛlayt Dɛn Kɔmɔt Na Ijipt
37Di Izrɛlayt dɛn waka bay fut frɔm Ramisis sote dɛn go na Sɔkɔt. Di Izrɛlayt dɛn we waka na bɔt siks ɔndrɛd tawzin man dɛn apat frɔm di uman ɛn pikin dɛn.
38Bɔku pipul dɛn we nɔto bin Izrɛlayt bin fala dɛn go ɛn dɛn bin kɛr bɔku bɔku ship, got ɛn kaw dɛn.
39Di Izrɛlayt dɛn bek bred we nɔ gɛt yist frɔm di flawa we dɛn bin dɔn miks na Ijipt. Dɛn nɔ bin put yist pan di flawa bikɔs na drɛb di Ijipshian dɛn bin drɛb dɛn ɛn tɛm nɔ bin de fɔ bek bred we gɛt yist.
40Di Izrɛlayt dɛn bin de na Ijipt fɔ fo ɔndrɛd ɛn tati ia, 41ɛn na di vɛri de we mek dɛn fo ɔndrɛd ɛn tati ia ɔl di Izrɛlayt famili dɛn kɔmɔt na Ijipt. 42PAPA GƆD bin mek wachnɛt da nɛt de fɔ mek shɔ se i pul ɔl di Izrɛlayt dɛn kɔmɔt na Ijipt. So ɛvri ia da nɛt de di Izrɛlayt dɛnsɛf fɔ kip wachnɛt fɔ mɛmba wetin PAPA GƆD du fɔ dɛn sote go.
Lɔ Dɛn Kɔnsanin Aw Fɔ Sɛlibret Pasova
43PAPA GƆD tɔk to Mozis ɛn Erɔn. I se, “Na dɛn lɔ yaso una fɔ kip we una fɔ sɛlibret pasova:
Nɔn fɔrina nɔ fɔ it pan am. 44Ɛni slev we una bay kin it pan am bɔt nɔmɔ una fɔ dɔn sakɔmsayz am fɔs, 45bɔt ɛni trenja we kam tap to una fɔ shɔt tɛm nɔmɔ ɔ ɛni wokman we una gɛt nɔ fɔ it pan am.
46“Nainsay una os una fɔ it am ɛn una nɔ fɔ kɛr nɔn pan di bif go bifo. Una nɔ fɔ brok di bon we una de it am. 47Ɛn ɔl di Izrɛlayt dɛn fɔ sɛlibret di pasova.
48“Ɛni fɔrina we de wit una we want fɔ sɛlibret PAPA GƆD in pasova fɔ sakɔmsayz ɔl di man dɛn nain os; da tɛm de naw i kin jɔyn lɛk fɔ se in na wan pan una. Ɛni man we nɔ sakɔmsayz nɔ fɔ it pan am. 49Na dis lɔ yaso dɛn fɔ yuz pan ɛni bɔdi we na Izrɛlayt ɔ fɔrina.”
50Ɔl di Izrɛlayt dɛn du wetin PAPA GƆD dɔn tɛl Mozis ɛn Erɔn, 51ɛn na di vɛri de we PAPA GƆD pul dɛn kɔmɔt na Ijipt bay fambul dɛn du am.
Currently Selected:
Ɛksodɔs 12: KRIO13
Highlight
Share
Copy
Want to have your highlights saved across all your devices? Sign up or sign in
Krio Bible © The Bible Society of Sierra Leone, 2013.
