Ɛksodɔs 11

Di Fɔs Bɔy Pikin Dɛn Day

1PAPA GƆD tɛl Mozis se, “A go sɛn wan mɔ waala pan di kiŋ ɛn di Ijipshian dɛn. Afta dat di kiŋ go lɛf una fɔ go. Na drɛb i go drɛb una fɔ kɔmɔt na di kɔntri sɛf. 2Tɛl ɔl di Izrɛlayt man ɛn uman dɛn mek dɛn aks dɛn Ijipshian neba dɛn fɔ gi dɛn gold ɛn silva chen, yerin ɛn baŋuls, we dɛn kin wɛr.” 3PAPA GƆD mek di Ijipshian dɛn gi di Izrɛlayt dɛn wetin dɛn aks fɔ. Di kiŋ in ɔfisa dɛn ɛn di Ijipshian dɛn bin rɛspɛkt Mozis.

4So Mozis tɛl di kiŋ se, “Dis na wetin PAPA GƆD se: bay midul nɛt a go pas na Ijipt, 5ɛn ɔl di fɔs-bɔy-pikin dɛn na Ijipt go day. Frɔm di kiŋ in yon fɔs-bɔy-pikin we nain gɛt fɔ bi kiŋ afta am, rayt dɔŋ to di slev uman we de gren kɔn in yon fɔs-bɔy-pikin dɔn ɔl go day man wan dɛn we dɛn bɔn fɔs pan di kaw dɛnsɛf go day. 6Pipul dɛn go de kray lawd lawd wan ɔl say na Ijipt we nɔ wande bi ɛn nɔ go bi igen 7Bɔt dɔg sɛf nɔ go bak usay di Izrɛlayt dɛn de. Da tɛm de yu go no se PAPA GƆD de trit di Izrɛlayt dɛn difrɛn frɔm aw i de trit de Ijipshian dɛn. 8Dis go mek ɔl yu ɔfisa dɛn go kam baw to mi ɛn beg mi se mek a tek ɔl mi pipul dɛn go wit mi. Afta dat a go go. Wɛn Mozis lɛf di kiŋ go bin i vɛks bad.

9PAPA GƆD tɛl Mozis se, “Di kiŋ nɔ go gri fɔ du wetin yu se, ɛn dat go mek a go pafɔm mirekul dɛn na Ijipt.” 10Mozis ɛn Erɔn pafɔm ɔl dɛn mirekul ya bɔt PAPA GƆD bin mek di kiŋ in at traŋa so dat i stil nɔ gri fɔ mek di Izrɛlayt dɛn kɔmɔt nain kɔntri.

Currently Selected:

Ɛksodɔs 11: KRIO13

Highlight

Copy