Ɛksodɔs 10

Lokɔs Bɔs Ɔlsay

1So PAPA GƆD tɛl Mozis. I se, “Go mit di kiŋ. A dɔn mek in ɛn in ɔfisa dɛn at traŋa so dat a go pafɔm ɔl dɛn mirekul dɛn ya so usay dɛn de. 2Ɔl dis na fɔ mek una tɛl una pikin dɛn ɛn grampikin dɛn aw a mek di Ijipshian dɛn to fulman di tɛm we a pafɔm dɛn mirekul dɛn ya. Una ɔl go no se mi na PAPA GƆD.”

3So Mozis ɛn Erɔn go mit di kiŋ ɛn se, “Di Ibru dɛn PAPA GƆD se, ‘aw lɔŋ yu nɔ go gri fɔ put yusɛf dɔŋ ɛn obe am. I se mek yu lɛf in pipul dɛn mek dɛn go wɔship am. 4If yu nɔ gri fɔ mek dɛn go, in go mek bɔku lokɔs bɔs na di kɔntri tumara.

5Di lokɔs dɛn go so bɔku dat dɛn go kɔba di grɔn ɛn nɔbɔdi nɔ go ebul si di grɔn. Dɛn go it ɔl di tin dɛn we da ren, we bin fɔdɔm lɛkɛ grabul-grabul nɔ bin pwɛl. Wan plant nɔ go lɛf na di fam. 6Dɛn go de ɔlsay na yu os ɛn yu ɔfisa ɛn pipul dɛn os dɛn ɛn na tin we una papa dɛn nɔ wande si frɔm we dɛn kam na ya.” We Mozis tɔk dɔn i tɔn in bak ɛn go.

7Di kiŋ in ɔfisa dɛn aks am aw lɔŋ Mozis go de briŋ waala pan dɛn. Dɛn tɛl am se lɛ i lɛf di pipul dɛn mek dɛn go wɔship dɛn PAPA GƆD. Dɛn aks di kiŋ se if i nɔ si se Ijipt de pwɛl.

8Dɛn go briŋ Mozis ɛn Erɔn kam bak to di kiŋ. Di kiŋ tɛl dɛn se mek dɛn go wɔship dɛn PAPA GƆD, bɔt i go lɛk fɔ no udat ɛn udat de go.

9Mozis ansa di kiŋ se na dɛn ɔl de go. Dɛn se dɛn de go wit dɛn pikin dɛn, yɔŋ bɔy ɛn yɔŋ gyal, olpa ɛn ol mami, ship, got, ɛn ɔl di ɔda animal dɛn we dɛn gɛt bikɔs dɛn go gɛt fɔ mek fɛstival fɔ ɔna PAPA GƆD.

10Di kiŋ tɛl dɛn se PAPA GƆD riali gɛt fɔ de wit dɛn fɔ mek in gri fɔ mek dɛn kɛr dɛn lili pikin dɛn go. I se in kin si se dɛn de plan fɔ du bad, 11ɛn o nɔ go bi. I tɛl dɛn se na di man dɛn nɔmɔ fɔ go wɔship PAPA GƆD as na dat Mozis bin de aks fɔ. Di kiŋ drɛb Mozis ɛn Erɔn kɔmɔt nain os.

12Na de PAPA GƆD tɛl Mozis se, “Tret yu an oba Ijipt so di lokɔs dɛn go kam. Dɛn go it di plant na di fam we da big big ren, bin lɛf” 13So Mozis pɔynt in tik oba Ijipt ɛn PAPA GƆD mek briz bigin blo frɔm di ist kam na di kɔntri. Di briz blo di ol de ɛn di nɛt. Bay mɔnin tɛm di briz bigin briŋ di lokɔs dɛn kam. 14Di lokɔs dɛn kam bɔku bɔku wan ɛn sidɔm ɔlsay na di kɔntri. Dis kayn tin nɔ wande bi ɛn i nɔ go ɛva bi. 15Di lokɔs dɛn bin so bɔku ɔlsay na di grɔn, dat i blak. Dɛn pwɛl ɔl di plant dɛn ɛn ɔl di frut dɛn we da ren, we bin fɔdɔm lɛkɛ grabul-grabul bin lɛf. Dɛn nɔ lɛf wan grin lif sɛf pan ɛni tik ɔ plant insay Ijipt.

16Di kiŋ sɛn kwik kwik wan go kɔl Mozis ɛn Erɔn ɛn se, in dɔn sin to dɛn PAPA GƆD ɛn to dɛnsɛf. 17I se mek dɛn fɔgiv am wan tɛm mɔ ɛn pre to dɛn PAPA GƆD fɔ mek i pul pan waala. 18So Mozis lɛf di kiŋ ɛn i pre to PAPA GƆD. 19PAPA GƆD ansa Mozis in prea. I chenj di we aw di briz bin de blo. I mek di briz bigin blo traŋa traŋa wan frɔm di wɛst ɛn blo di lokɔs dɛn kɔmɔt na di kɔntri ɛn kɛr dɛn go na di Rɛd si. Wan lokɔs sɛf nɔ lɛf na Ijipt. 20Bɔt PAPA GƆD mek di kiŋ traŋa in at ɛn nɔ gri fɔ mek di pipul dɛn go.

Di Wan Ol Ples Dak

21Afta dat PAPA GƆD tɛl Mozis se, “Es yu an ɔp to di skay ɛn di kɔntri go dak bad bad wan we go mek pipul dɛn fred.” 22So Mozis es in an ɔp to di skay ɛn ɔlsay na Ijipt bin dak bad bad wan fɔ tri de. 23Dɛn nɔn nɔ bin ebul fɔ si dɛn kɔmpin ɔ go ɛnisay fɔ tri de. Bɔt layt bin de usay di Izrɛlayt pipul dɛn tap.

24Di kiŋ sɛn kɔl Mozis ɛn tɛl am se mek dɛn go wɔship una PAPA GƆD. I se dɛn uman dɛn ɛn dɛn pikin dɛn kin go wit dɛn bɔt dɛn fɔ lɛf dɛn ship, got ɛn kaw.

25Mozis ansa di kiŋ se i fɔ lɛf dɛn fɔ kɛr dɛn animal dɛn go bikɔs dɛn gɛt fɔ ɔfa dɛn as sakrifays we dɛn go bɔn na faya to dɛn PAPA GƆD. 26I se dɛn jɛs gɛt fɔ tek ɔl dɛn animal dɛn go wit dɛn ɛn dɛn nɔ go lɛf wan biɛn. Mozis tɛl di kiŋ se dɛn gɛt fɔ chuz di wan dɛn we dɛn go tek wɔship wi PAPA GƆD. Ɛn na pas dɛn go nain dɛn go no uswan pan dɛn, dɛn go yuz.

27PAPA GƆD stil mek di kiŋ gɛt traŋa at ɛn nɔ gri fɔ mek di pipul dɛn go. 28Di kiŋ ala pan Mozis fɔ Kɔmɔt bifo am. I se i nɔ want fɔ si Mozis in fes igen, bikɔs di de we Mozis go go bifo am Mozis go day.

29So Mozis gri ɛn se i go du wetin di kiŋ se ɛn i nɔ go go bifo am igen

Currently Selected:

Ɛksodɔs 10: KRIO13

Highlight

Copy