Ɛksodɔs 9
9
Di Animal Dɛn Day
1PAPA GƆD tɛl Mozis se, “Go to di kiŋ ɛn tɛl am se, mi, we na Ibru dɛn PAPA GƆD se, fɔ i lɛf mi pipul dɛn, mek dɛn go wɔship mi. 2If i nɔ gri fɔ mek dɛn go dis tɛm, 3a go mek in animal dɛn, in ɔs, dɔŋki, kamɛl, in man ɛn uman kaw, ship ɛn got dɛn gɛt bad bad sik we go mek dɛn day. 4Bɔt a nɔ go trit di Izrɛlayt dɛn animal dɛn so. Wan pan di Izrɛlayt dɛn animal sɛf nɔ go day. 5Wetin a dɔn tɔk so, nɛf kɔt. Tumara nɔ go pas.”
6Di nɛks de, jɛs lɛk wetin PAPA GƆD bin dɔn se, ɔl di Ijipshian dɛn animal dɛn day, bɔt wan pan di Izrɛlayt dɛn yon nɔ day. 7Di kiŋ sɛn in ɔfisa dɛn fɔ go chɛk if na tru se nɔn pan di Izrɛlayt dɛn animal dɛn nɔ day. Bɔt ivin we i gɛt fɔ no se na tru, dat nɔ mek i chenj. I stil traŋayes ɛn nɔ gri fɔ mek di pipul dɛn go.
Bwɛl Bɔsawt Na Ijipt
8So PAPA GƆD tɛl Mozis ɛn Edrɔn se mek dɛn gɛda sɔm asis na fayasay wit dɛn wan an ɛn mek Mozis sɛn di asis ɔp usay di kiŋ de si am. 9Di asis go skata lɛkɛ fayn dɔst ɔlɔbɔt na Ijipt ɛn dis go mek di pipul dɛn ɛn di animal dɛn go gɛt bwɛl na dɛn bɔdi we go bɔs ɛn tan lɛkɛ sofut. 10So dɛn tek sɔm asis na wan fayasay ɛn go mit di kiŋ. Mozis sɛn di asis ɔp di klawd usay di kiŋ de. Bwɛl bigin fɔ kɔmɔt pan di pipul ɛn di animal dɛn ɛn we dɛn bɔs dɛn bin tan lɛkɛ sofut.
11Di majikman dɛn nɔ bin ebul fɔ kam tinap bifo Mozis bikɔs dɛnsɛf bin gɛt bwɛl lɛkɛ ɔl di Ijipshian dɛn. 12Bɔt PAPA GƆD mek di kiŋ stil mek traŋayes ɛn nɔ gri fɔ lisin to Mozis ɛn Erɔn jɛs lɛkɛ aw PAPA GƆD bin dɔn tɛl Mozis.
Ren We Tan Lɛkɛ Grabul-grabul Fɔdɔm
13PAPA GƆD tɛl Mozis I se, “Grap ali mɔnin go mit di kiŋ ɛn tɛl am se, di PAPA GƆD we di Ibru dɛn de wɔship se lɛ i lɛf mi pipul dɛn mek de go wɔship mi. 14Dis tɛm if i nɔ gri a go du sɔntin we go mek in, in ɔfisa dɛn ɛn in pipul dɛn ɔl no se nɔbɔdi nɔ de we tan lɛk mi na di wanol wɔl. 15Tɛl di kiŋ se, a bin fɔ dɔn put sik pan in ɛn in pipul dɛn we bin fɔ mek dɛn day kɔmɔt na di wɔl. 16Bɔt a nɔ mek dɛn day bikɔs a gɛt mi rizin. A want sho dɛn mi pawa so pipul dɛn ɔlsay na di wɔl go yɛri bɔt mi. 17Bɔt in stil de mek traŋayes ɛn nɔ gri fɔ lɛ mi pipul dɛn go. 18Go tumara bay dis tɛm a go sɛn big big tinada blo, dɔn di ren we go fɔdɔm go fiba grabul-grabul. Dis kayn ren ya nɔ wande fɔdɔm na Ijipt. 19Tɛl di kiŋ mek i gi ɔda lɛ dɛn kɛr ɔl in animal dɛn ɛn in savant dɛn we de na dɛn fam go na sef ples so dat dɛn nɔ go day we di tinada go blo ɛn ren we fiba grabul-grabul go fɔdɔm.
20Sɔm pan di kiŋ i ɔfisa dɛn biliv wetin PAPA GƆD se, sɛn go pul dɛn animal dɛn ɛn dɛn slev dɛn kɔmɔt na dɛn fam ɛn kɛr dɛn go na sef ples wantɛm. 21Bɔt di ɔda wan dɛn jɛs nɔ bisin bɔt wetin PAPA GƆD se so dɛn lɛf dɛn animal dɛn ɛn dɛn slev dɛn na dɛn fam.
22PAPA GƆD tɛl Mozis se fɔ es in an ɔp to di skay ɛn lɛ ren we fiba grabul-grabul fɔdɔm ɔlsay na Ijipt. Lɛ i fɔdɔm pan mɔtalman, pan animal ɛn ɔl di plant dɛn na di fam dɛn. 23So Mozis pɔynt in tik to di skay, ɛn PAPA GƆD sɛn di ren we i bin dɔn tɔk bɔt ɛn di ren fɔdɔm wit tɛnda, ɛn laytin. Na so PAPA GƆD tek sɛn dis kayn ren ya na Ijipt. 24As di ren de fɔdɔm na so i laytin de flash. Wande dis kayn ren nɔ fɔdɔm na Ijipt. 25Di ren pwɛl ɔltin we bin lɛf na di fam dɛn ɔlsay na Ijipt. Mɔtalman ɛn animal day ɛn i pwɛl ɔl di plant dɛn na di fam ɛn di tik dɛn we de bin de gro.
26Bɔt wan ren lɛkɛ dat nɔ fɔdɔm na di aria we di Izrɛlayt dɛn bin de na Goshɛn.
27Di kiŋ sɛn kɔl Mozis ɛn Erɔn ɛn mek se i se in gri se a dɔn du bad ɛn di Ibru dɛn PAPA GƆD gɛt rayt, bɔt mi ɛn mi pipul rɔŋ. 28I beg dɛn fɔ pre to PAPA GƆD fɔ mek dis ren go tap. I se di ren dɔn pasmak ɛn prɔmis se in go lɛf dɛn fɔ go, ɛn dɛn nɔ go tap de igen
29Mozis ansa di kiŋ se, we i kɔmɔt na dis siti, in go es mi an ɔp ɛn pre to PAPA GƆD. Di tinada go tap fɔ blo ɛn di kayn ren we fiba grabul grabul nɔ go fɔdɔm igen I se dat go mek dɛn nɔ se dis wɔl na PAPA GƆD gɛt am. 30Mozis se, in no se, di kiŋ ɛn in ɔfisa dɛn stil nɔ gɛt fred fɔ PAPA GƆD.
31Ɔl di plant dɛn we dɔn rɛp pwɛl na di fam. 32Bɔt di wam dɛn we nɔ bin rɛp yet nɔ pwɛl.
33Mozis lɛf di kiŋ ɛn kɔmɔt na de siti. I es in an ɔp ɛn pre to PAPA GƆD ɛn wantɛm wantɛm di tɛnda lɛf fɔ blo ɛn di ren we fiba grabul-grabul tap. Di ren nɔ kam igen 34We di kiŋ si wetin apin, i sin bak ɛn in ɔfisa dɛn mek traŋayes ɛn nɔ gri fɔ du wetin dɛn prɔmis. 35Di kiŋ nɔ gri fɔ mek di Izrɛlayt dɛn go jɛs lɛk aw PAPA GƆD bin dɔn tɛl Mozis.
Currently Selected:
Ɛksodɔs 9: KRIO13
Highlight
Share
Copy
Want to have your highlights saved across all your devices? Sign up or sign in
Krio Bible © The Bible Society of Sierra Leone, 2013.
