Jɛnɛsis 27
27
Ayzak Blɛs Jekɔb
1Ayzak bin dɔn ol ɛn i nɔ bin de si fayn. Wande i sɛn kɔl in big bɔypikin Isɔ fɔ tɔk to am. We i kam i ansa am se, “Luk mi sa.”
2Ayzak se, “Yu si se a dɔn ol ɛn a kin day ɛnitɛm. 3Tek yu bo ɛn aro, go na bush, ɛn kil bif fɔ mi. 4Kuk di it we yu no se a lɛk, mek i swit ɛn briŋ am kam fɔ mi. We a it am dɔn, a go blɛs yu bifo a day.”
5We Ayzak bin de tɔk to Isɔ, Ribɛka bin yɛri wetin i se. We Isɔ go ɔntin, 6Ribɛka tɛl Jekɔb se, “A dɔn yɛri wetin yu papa tɛl yu brɔda, I tɛl am se, 7mek i kil bush bif ɛn kuk fayn it fɔ am. We i it am dɔn, i go blɛs am bifo PAPA GƆD, bifo i day. 8Naw mi pikin, lisin gud ɛn du wetin a se. 9Go pik tu fat yɔŋ got pan dɛn got dɛn mek a kuk di it we yu papa lɛk. 10Dɔn yu go kɛr am go gi am, ɛn wɛn i it dɔn, i go blɛs yu bifo i day.”
11Bɔt Jekɔb ansa in mama se, “Luk we Isɔ gɛt bɔku ia nain bɔdi, ɛn mi nɔ gɛt. 12If papa go tɔch mi naw ɛn no se a de tray fɔ trik am, bifo i blɛs mi nɔto swɛ i go swɛ mi?”
13Na de Ribɛka se, “Bɔbɔ, lɛ di swɛ kech mi; yu jɛs du wetin a se nɔmɔ ɛn go briŋ di got dɛn kam fɔ mi.” 14So Jekɔb insɛf go briŋ di got dɛn kam, ɛn in mama kuk am aw Ayzak lɛk am. 15Ribɛka tek Isɔ in bɛst klos, we bin de na os, ɛn wɛr am pan Jekɔb. 16I put sɔm pan di got ia rawnd in nɛk ɛn in an dɛn usay ia nɔ de. 17I gi am di it we de smɛl tes, ɛn sɔm bred we i bek.
18So Jekɔb kɛr di it go insay to in papa. We i kɔl in papa, in papa bin aks fɔ no uswan pan di pikin dɛn i bi.
19Nain Jekɔb se, “Mi na yu big bɔypikin Isɔ, a dɔn du wetin yu tɛl mi fɔ du, sa. Grap nɔ, sidɔm lɛ yu it di it we yu tɛl mi fɔ kuk lɛkɛ aw yu lɛk am, mek yu blɛs mi.”
20Na de Ayzak se, “Mi pikin, aw yu manej fɛn di bif kwik kwik wan so?”
Jekɔb insɛf ansa se, “PAPA GƆD we na yu PAPA GƆD nain ɛp mi fɛn am kwik kwik wan so, sa.”
21Ayzak tɛl Jekɔb se, “kam nia mi mek a tɔch yu. Fɔ tru tru yu na Isɔ?” 22So Jekɔb go nia in papa, ɛn in papa fil fil am ɛn se, “Yu vɔys fiba lɛkɛ Jekɔb in vɔys, bɔt yu an dɛn fil lɛkɛ Isɔ in yon.” 23I nɔ bin no se na Jekɔb bikɔs in an dɛn bin gɛt ia lɛkɛ Isɔ in yon. We i rɛdi fɔ blɛs am, 24i aks bak se, “Yu na Isɔ fɔ tru, tru?”
Jekɔb ansa se, “Yɛs, na mi sa.”
25Na de Ayzak se, “Gi mi sɔm pan di it. We a it am dɔn a go blɛs yu.” So Jekɔb gi di it to in papa, wit sɔm wayn fɔ drink. Ayzak insɛf it bɛlful ɛn drink di wayn we Jekɔb sav am. 26Dɔn i tɛl Jekɔb se “lɛ kis am.” 27So Jekɔb go nia am ɛn kis am. We Ayzak smɛl in klos na da tɛm de i biliv se na Isɔ, so i blɛs am. I se, “Mi pikin in sɛnt tan lɛkɛ di fayn sɛnt we de kɔmɔt na bush we PAPA GƆD dɔn blɛs. 28Mek PAPA GƆD mek ɛnitin we yu put yu an pan bɛtɛ! Mek i gi yu plɛnti it ɛn wayn! 29Mek bɔku neshɔn dɛn sav yu, ɛn lɛ pipul dɛn baw bifo yu. Mek yu rul oba yu brɔda dɛn ed, ɛn mek yu mama in jɛnareshɔn dɛn ɔl baw bifo yu. Mek swɛ de pan ɛniwan we go swɛ yu, ɛn mek PAPA GƆD blɛs dɛn wan we go blɛs yu.”
Isɔ Beg Ayzak Fɔ Blɛs Am
30We Ayzak dɔn blɛs Jekɔb dɔn so, Jekɔb de rɛdi fɔ go na do, nain Isɔ kɔmɔt ɔntin kam. 31Isɔ insɛf kuk di it we in papa lɛk ɛn kɛr am go to am, ɛn se, “papa, a dɔn kam, sidɔm nɔ lɛ yu it di it we a kuk fɔ yu fɔ lɛ yu go blɛs mi.”
32Bɔt Ayzak aks se, “Na udat de tɔk?”
Isɔ ansa se, “Na mi Isɔ yu big bɔypikin.” 33Na de Ayzak bigin trimbul bad bad wan, so i aks se, “Bɔt na udat go ɔntin we kuk it kam gi mi fɔ it jisnɔ? A jɛs it dɔn bifo yu kam ɛn a dɔn blɛs am. Natin nɔ de fɔ du igen”
34We Isɔ yɛri dis i ala big big wan ɛn kray bita bita wan ɛn se, “Papa, duya blɛs misɛf!”
35Ayzak ansa am se, “Yu brɔda dɔn kam mek mi ful. I dɔn tek yu blɛsin.”
36Isɔ se, “Dis na di sɛkɛn tɛm we i de ple mi dis trik. Nɔto dat mek dɛn de kɔl am Jekɔb. I dɔn tek mi ples lɛkɛ se in na di fɔs-bɔy-pikin, dɔn naw i dɔn tek mi blɛsin. Papa, nɔn blɛsin nɔ lɛf fɔ mi sɛf?”
37Ayzak ansa se, “A dɔn mek i bi masta oba yu, ɛn a dɔn put ɔl in fambul dɛn fɔ sav am ɛn i go gɛt bɔku fɔ it ɛn drink. Naw, mi pikin natin nɔ lɛf we a kin gi yu!”
38Isɔ tɛl in papa se: “Papa, a nɔ tink se na wangren blɛsin nɔmɔ yu gɛt? Duya blɛs misɛf” So i bigin fɔ kray bak.
39Nain Ayzak tɛl am se,
“Tin go traŋa fɔ yu na di say we yu go tap,
ɛn natin bɛtɛ nɔ go kɔmɔt na di grɔn fɔ yu.
40We yu fɛt ɛn kil yu go gɛt wetin fɔ it,
Yu go de ɔnda yu brɔda as wokman.
Bɔt wɛn yu nɔ ebul fɔ bia igen,
Yu go kɔmɔt ɔnda in kɔntrol.”
41Isɔ bin et Jekɔb bad wan, bikɔs Jekɔb dɔn gɛt di blɛsin we dɛn papa bin wan gi am. So i tɔk to insɛf se, “We mi papa day, a go kil Jekɔb.”
42Bɔt sɔmbɔdi kam tɛl Ribɛka wetin Isɔ wan du. I sɛn kɔl Jekɔb ɛn tɛl am se, “Yu brɔda Isɔ dɔn mekɔp fɔ kil yu. 43Naw, mi pikin, du wetin a de tɛl yu. Go wantɛm to mi brɔda Leban na Eran, 44ɛn tap de fɔs, sote yu brɔda in at kol, 45ɛn i fɔgɛt wetin yu dɔn du am. Dɛn a go sɛn pɔsin go briŋ yu kam bak. Wetin du a fɔ lɔs ɔl tu mi bɔypikin dɛn di sem de?”
Ayzak Sɛn Jekɔb To Leban
46Afta dat Ribɛka tɛl Ayzak se, “A dɔn gens wit aw dɛn Itayt uman ya de biev. Bifo Jekɔb mared wan pan dɛn, i go bɛtɛ mek a day.”
Currently Selected:
Jɛnɛsis 27: KRIO13
Highlight
Share
Copy
Want to have your highlights saved across all your devices? Sign up or sign in
Krio Bible © The Bible Society of Sierra Leone, 2013.
