Jɛnɛsis 28

1So Ayzak sɛn kɔl Jekɔb, i blɛs am, ɛn tɛl am se, “Nɔ mared nɔn pan dɛn Kenan gyal ya. 2Bifo dat, go na Padan Aram, usay yu grampa Bɛthuɛl kɔmɔt ɛn mared wan pan yu ɔnkul Leban in gyal pikin dɛn. 3Mek PAPA GƆD Ɔlmayti blɛs yu ɛn gi yu bɔku pikin dɛn, so dat yu go bi papa fɔ plɛnti neshɔn. 4Mek PAPA GƆD mek di blɛsin we i bin dɔn gi Ebraam fala yu ɛn yu gret grampikin dɛn, ɛn mek dis land we wi de so naw as trenja bi yu yon bikɔs PAPA GƆD bin dɔn gi Ebraam!” 5Na so Ayzak tek mek Jekɔb go na Padan Aram, to in ɔnkul Leban, in mama in brɔda, we na Bɛthuɛl di Aramean in bɔypikin.

Isɔ Mared Ɔda Wɛf

6Isɔ gɛt fɔ no se Ayzak dɔn blɛs Jekɔb ɛn sɛn am go Padan Aram fɔ go fɛn wɛf de. Ɛn we i de blɛs am i tɛl am se lɛ i nɔ mared nɔn pan dɛn Kenan gyal dɛn. 7Ɛn Jekɔb tek in mama ɛn papa dɛn wɔd ɛn go Padan Aram. 8Isɔ kam no se in papa nɔ lɛk dɛn Kenan uman dɛn at ɔl. 9So i go fɛn in ɔnkul Ishmɛl we na Ebraam in bɔypikin, ɛn mared in gyal pikin, Maalath ɛn ad pan di wɛf dɛn we i bin dɔn gɛt. Maalath na Nɛbayɔth in sista.

Di Drim We Jekɔb Drim Na Bɛthɛl

10Jekɔb lɛf Biashiba fɔ go na Eran. 11I rich na wan ples as di san de go dɔŋ ɛn bil in tɛnt de. I fɛn wan ston we i tek mek pila ɛn lidɔm de fɔ slip. 12We i de slip, i drim i si ay ay stɛp kɔmɔt na grɔn te rich ɔp na ɛvin, ɛn i si enjɛl dɛn de go ɔp ɛn dɔŋ di stɛp. 13PAPA GƆD insɛf bin tinap nia am ɛn tɛl am se, “Mi na PAPA GƆD, Ebraam yu grampa, ɛn Ayzak, yu papa dɛn PAPA GƆD, A go gi yu ɛn yu jɛnareshɔn dɛn dis land usay yu lidɔm so. 14Yu jɛnareshɔn dɛn go bɔku lɛkɛ dɔti na grɔn ɛn dɛn go de na di ist, wɛst, nɔth ɛn sawt. Na yu ɛn yu jɛnareshɔn go mek ɔl dɛn ɔda neshɔn gɛt dɛn blɛsin. 15Mɛmba se, A go de wit yu ɛnisay yu go. A go gyad yu, ɛn briŋ yu kam bak na dis land. A nɔ go kɔmɔt biɛn yu sote a dɔn du ɔl wetin a dɔn prɔmis yu.” 16Jekɔb skyad wek na di drim ɛn se, “So PAPA GƆD de na dis ples ɛn a nɔ no natin!” 17I fred ɛn tɔk se, “Dis na wɔndaful ples, I mɔs bi se na PAPA GƆD in os ɛn dis na di get fɔ go ɛvin.” 18Jekɔb grap ali mɔnin. I yuz di ston we i tek mek pila fɔ mak di ples we i bin lidɔm fɔ mek i nɔ go fɔgɛt de. I tɔn ɔliv ɔyl pan di ston. 19I kɔl di ples Bɛthɛl,#28:19 Bɛthɛl I min: PAPA GƆD in os. bɔt di siti bin nem Luz. 20Na de Jekɔb prɔmis PAPA GƆD se “If PAPA GƆD de wit mi pan dis patrol we a de go so, if i gi mi tin fɔ it ɛn klos fɔ wɛr, 21sote a tɔn bak wit wɛl bɔdi na mi papa in os, a go mek am misɛf yon PAPA GƆD. 22A go yuz dis ples usay dis ston de so fɔ wɔship am. Ɛn a go gi am wan pan tɛn pat pan ɔl wetin i go gi mi.”

Currently Selected:

Jɛnɛsis 28: KRIO13

Highlight

Copy