Lɛvitikɔs 19
19
Aw Fɔ Biev To PAPA GƆD Ɛn To Mɔtalman
1Dɔn PAPA GƆD tɛl Mozis bak se, 2mek i tɛl ɔl di Izrɛlayt dɛn se, dɛn fɔ oli bikɔs PAPA GƆD we na dɛn GƆD oli. 3I se ich wan pan dɛn fɔ rɛspɛkt in mama ɛn papa, du wetin in we na PAPA GƆD se fɔ du di de we mek sɛvin we na fɔ blo bikɔs nain na PAPA GƆD we na dɛn GƆD.
4I se nɔ fɔ lɛf am go wɔship dɛn ɔda gɔd dɛn we nɔ min natin we dɛn mɛlt ayɛn fɔ mek bikɔs nain na PAPA GƆD we na dɛn GƆD.
5I se we dɛn kil animal fɔ mek sakrifays fɔ sho se dɛn want wanwɔd wit PAPA GƆD, dɛn fɔ mek shɔ se dɛn du ɔl wetin go mek PAPA GƆD gladi fɔ tek am. 6Dɛn kin it am di sem de ɛn it di wan we lɛf, di nɛks de mɔnin, bɔt if i stil lɛf fɔ di tɔd de, dɛn fɔ bɔn am na faya. 7If pɔsin it di bif we lɛf di tɔd de, na bad bad tin i du ɛn PAPA GƆD nɔ go aksɛpt in sakrifays, 8ɛn ɛnibɔdi we it am go bia wit wetin gɛt fɔ bi bikɔs i go dɔn mek wetin oli to PAPA GƆD lɛk tin we nɔ oli ɛn so i nɔ go mek da pɔsin de miks wit in pipul igen
9I se wɛn di pipul go dɔn rich na di land ɛn bigin fɔ avɛst di tin dɛn we dɛn plant, dɛn nɔ fɔ pik ɔltin we dɛn plant lɛkɛ dɛn wan we de na dɛn kɔna ɔ dɛn wan we kin fɔdɔm na dɛn an ɛn lɛf am arara. 10Ɛn ivin we na frut dɛn de pik, dɛn nɔ fɔ pik ɔltin na di tik dɛn; dɛn fɔ lɛf sɔm fɔ poman ɔ fɔ ɛni trenja: nain na PAPA GƆD we na dɛn GƆD.
11I se nɔ fɔ tif#19:11 Tif Dis kin ivin min fɔ kidnap ɔ siz ɔ mek pɔsin lɛkɛ slev. nɔ mek dabaru ɔ lay gi dɛn kɔmpin. 12Nɔ yuz PAPA GƆD in nem fɔ swɛ mek pɔsin biliv dɛn we dɛn de lay, bay dat dɛn de sho se dɛn nɔ rɛspɛkt PAPA GƆD: nain na PAPA GƆD we na dɛn GƆD.
13Nɔ ple rikishi pan yu kɔmpin ɛn tif am. If man fɔ pe pɔsin fɔ wok we i du, di man fɔ mek shɔ se i pe di pɔsin we du di wok di sem de we di wok dɔn. 14Nɔ fɔ tɔk tɔk we dɛfyes man nɔ go yɛri ɛn ansa bak ɔ put tin na rod we blɛnyay man go jam ɛn fɔdɔm.
15I se we pɔsin dɛn de jɔj kes na kot, nɔ fɔ luk fes; dat na nɔ fɔ gi pɔsin rayt bikɔs i po ɔ jɛntri bɔt fɔ trit dɛn kɔmpin fia wan. 16Nɔ fɔ sidɔm pan pwɛl nem midul pipul, ɛn nɔ mek pɔsin lɔs in layf bikɔs yu want in prɔpati.
17I se nɔ fɔ kip pɔsin na at ɛn nɔ tɛl di wan we du rɔŋ wetin i du rɔŋ ɔ nɔ so di pɔsin we nɔ tɛl am go sɔfa lɛkɛ am fɔ dat. 18Pɔsin nɔ fɔ du bad to udat du am bad ɛn i nɔ fɔ kip in kɔmpin na at bɔt i fɔ lɛk in kɔmpin lɛk aw i lɛk insɛf: i se nain na PAPA GƆD.
19I se na fɔ du wetin in se. Nɔ fɔ mek tu difrɛn animal we pɔsin de mɛn bɔn pikin togɛda; nɔ fɔ plant tu difrɛn sid na di sem fil; ɛn nɔ fɔ wɛr klos we na tu difrɛn kayn matirial dɛn tek fɔ so am.
20I se if ɛniman gɛt sɛks wit uman we na slev bɔt we man bin dɔn kɔmɔt fɔ, ivin if di man nɔ pe fɔ am yet, na fɔ pɔnish di uman slev ɛn di man we slip wit am. Bɔt dɛn nɔ go kil dɛn bikɔs di uman na slev stil; 21bɔt di man we slip wit di slev fɔ kɛr ɔfrin fɔseka wetin i fɔ sɔfa go to PAPA GƆD na di tɛnt usay dɛn kin mit am in domɔt, na man ship i fɔ gi fɔ di ɔfrin. 22Dɔn di man we de mek sakrifays fɔ pipul sin go beg PAPA GƆD padin fɔ di sin we i dɔn sin wit di man ship we i kɛr fɔseka wetin i fɔ sɔfa ɛn PAPA GƆD go fɔgiv am.
23I se, we dɛn go dɔn go insay Kenan ɛn go dɛn plant ɔlkayn tik we go bia frut fɔ it, dɛn dɛn nɔ fɔ it di ɔda pipul dɛn yon frut fɔ tri ia bikɔs i nɔ klin na PAPA GƆD yay. 24Na di ia we mek fo, ɔl dɛn frut dɛn go dɔn fit fɔ mek dɛn gi PAPA GƆD fɔ prez ɔfrin. 25Bɔt na te di ia we mek fayv, dɛn fɔ it pan dɛn frut. If dɛn du ɔl wetin PAPA GƆD se, dɛn frut dɛn we dɛn plant go bia bɔku.
26I se dɛn nɔ fɔ it bif we dɛn nɔ kɔt di animal in trot fɔ kil am. Nɔ fɔ miks pan wich ɔ ɛni majik biznɛs. 27Nɔbɔdi nɔ fɔ shev pan di ia we de nain fes in sayd, ɔ shep in biabia lɛk got biabia fɔ seka dayman.. 28Pɔsin nɔ fɔ kɔt kɔt in bɔdi se i de munin, ɔ mek tatu ɔ ɛni ɔda mak nain bɔdi fɔ seka dayman. 29Pɔsin nɔ fɔ disgres in gyal pikin ɛn mek i biev lɛk rare gyal fɔ go wɔship ɔda gɔd ɔ nɔ so, na so dɛn ɔl go biev ɛn go mek soso bad de na di land. 30Pɔsin fɔ mɛmba fɔ blo di de we mek sɛvin ɛn rɛspɛkt usay dɛn kin wɔship PAPA GƆD: i se nain na PAPA GƆD.
31I se dɛn nɔ fɔ go to dɛn wan we kin wek dayman ɔ kin tɔk bɔt wetin go apin bambay; ɔ nɔ so dɛn nɔ go klin na PAPA GƆD yay. I se nain na PAPA GƆD we na dɛn GƆD.
32I se fɔ sho se pɔsin de rɛspɛkt old pipul ɛn fred PAPA GƆD so fɔ du wetin i se: nain na PAPA GƆD.
33I se if trenja kam tap wit dɛn, dɛn nɔ fɔ trit am bad. 34Dɛn fɔ trit di trenja we tap wit dɛn lɛk wan pan dɛn; fɔ lɛk am lɛk aw dɛn lɛk dɛnsɛf bikɔs dɛnsɛf na bin trenja na Ijipt; I se nain na PAPA GƆD we na dɛn GƆD.
35We dɛn de mɛzhɔ wet ɔ aw lɔŋ tin bi ɔ ɔmɔs fɔ gi pɔsin, nɔ fɔ rog. 36I se dɛn fɔ yuz ɔnɛs skel, ɛn ɔda tin dɛn fɔ mɛnshɔ tin dɛn. I se nain na PAPA GƆD we pul dɛn kɔmɔt pan slev layf na Ijipt. 37I se dɛn nɔ fɔ fɔgɛt fɔ du ɔl wetin in dɔn se bikɔs nain na PAPA GƆD.
Currently Selected:
Lɛvitikɔs 19: KRIO13
Highlight
Share
Copy
Want to have your highlights saved across all your devices? Sign up or sign in
Krio Bible © The Bible Society of Sierra Leone, 2013.