Lɛvitikɔs 20
20
Pɔnishmɛnt Fɔ Sin
1PAPA GƆD tɛl Mozis se, 2mek i tɛl di Izrɛlayt dɛn se, ɛni Izrɛlayt ɔ trenja we de na Izrɛl, we de gi in pikin fɔ sakrifays to Molɛk, dɛn fɔ kil am; di ɔda pipul fɔ ston am te i day. 3I se insɛf go dison di pɔsin ɛn i nɔ go miks wit in pipul igen bikɔs nain tɛnt usay dɛn kin mit am i go de mek nɔ klin nain yay, ɛn i go de disgres in nem. 4I se if di ɔda Izrɛlayt dɛn mek nɔ no wetin di man du, ɛn nɔ gri fɔ kil am, 5dɛn nɔto di man nɔmɔ PAPA GƆD go dison, i go dison in famili ɛn ɔl udat de fala am pan wetin i de du we i de biev lɛk rare gyal to Molɛk we na ɔda gɔd.
6I tɔk bak se if pɔsin biev lɛk rare gyal ɛn go to dɛn wan we kin wek dayman ɔ we kin tɔk bɔt wetin go apin bambay, i go dison da pɔsin de ɛn i nɔ go mek i miks wit in pipul igen 7I se so naw, dɛn fɔ mek dɛnsɛf oli to PAPA GƆD; bikɔs nain na PAPA GƆD we na dɛn GƆD. 8Dɛn fɔ du wetin i se bikɔs nain na PAPA GƆD ɛn i go mek dɛn oli.
9I se if man tɔk bad bɔt in mama ɛn papa, dɛn fɔ kil am; nain tɔk bad bɔt in mama ɛn papa, so, nain fɔ day.
10If man lɛf in wɛf go kip in kɔmpin in wɛf, dɛn fɔ kil di man ɛn di uman bikɔs na dɛn kɔmit sin. 11Man we mek in papa in wɛf pul klos fɔ am dɔn disgres in papa, dɛn fɔ kil di man ɛn di uman bikɔs na dɛn kɔmit sin. 12If man lidɔm wit in dɔtɛnlɔ, na bad bad tin; dɛn fɔ kil dɛn ɔltu bikɔs na dɛn kɔmit sin. 13If man ledɔm wit in kɔmpin man lɛkɛ se na uman, dɛn ɔltu dɔn du bad bad tin; dɛn fɔ kil dɛn bikɔs dɛn blɔd go de na dɛn yon ed.. 14If man mared uman dɔn we i dɔn, i kip in mama, na bad bad tin da wande; dɛn fɔ bɔn dɛn ɔltu na faya ɛn dat go mek nɔbɔdi nɔ dat igen 15If man lidɔm wit animal, dɛn fɔ kil am ɛn dɛn fɔ kil di animal insɛf. 16If na uman sɛf go lidɔm wit di animal, na dɛn ɔltu fɔ kil, na dɛn fɛn dɛn day fɔ dɛnsɛf. 17I se, if man tap na os wit in sista, wɛda nain papa in pikin ɔ nain mama in pikin, dɔn dɛn pul klos fɔ dɛn kɔmpin, na disgres da wande, nɔ fɔ mek dɛn miks wit di ɔda pipul igen, i dɔn mek in sista pul klos fɔ am, so dɛn go bia wetin go bi to am. 18If man mek uman we de si in piriɔd pul klos fɔ am ɛn i lidɔm wit am, i dɔn ɛkspoz am ɛn di uman dɔn ɛkspoz di blɔd. Dɛn fɔ drɛb am kɔmɔt Izrɛl. 19Pɔsin nɔ fɔ mek in mama ɔ papa sista pul klos fɔ am bikɔs nain klos fambul ɛn dɛn go bia wetin go bi to dɛn. 20If man lidɔm wit in ɔnkul in wɛf, nain ɔnkul i disgres, dɛn ɔltu dɔn kɔmit sin, so, dɛn fɔ tek ɛni pikin we dɛn bɔn na dɛn an ɛn dɛn go day lɛk udat nɔ bɔn pikin. 21If man mared in brɔda wɛf we di brɔda nɔ day yet, na dɔti gem ɛn i nɔ go klin na PAPA GƆD yay; nain brɔda i disgres, na fɔ tek ɛni pikin we dɛn bɔn na dɛn an.
22I se na dat mek dɛn fɔ du ɔl wetin PAPA GƆD se ɛn obe in lɔ dɛn so dat di land we dɛn de go nɔ go mek di pipul dɛn kɔmɔt de lɛkɛ aw pɔsin de vɔmit it. 23So dɛn nɔ fɔ biev lɛk di neshɔn we bin de de bifo dɛn as na ɔl dɛn bad tin we i dɔn tɔk bɔt so, nain dɛn bin du we mek PAPA GƆD nɔ lɛk dɛn biznɛs. 24Bɔt PAPA GƆD in dɔn tɛl dɛn se, dɛn go gɛt di land as dɛn prɔpati, dɛn go kapchɔ am, land we fayn fɔ plant ɛn mɛn animal dɛn. I se nain na PAPA GƆD we na dɛn PAPA GƆD ɛn nain dɔn mek dɛn difrɛn frɔm ɔda pipul. 25Na dat mek dɛnsɛf fɔ sho se animal we klin na PAPA GƆD yay difrɛn frɔm di wan we nɔ klin na PAPA GƆD yay, bɔd we klin na PAPA GƆD yay difrɛn frɔm bɔd we nɔ klin na PAPA GƆD yay. So, dɛn nɔ fɔ mek animal ɔ bɔd ɔ ɛni dɛn tin dɛn we de pas pas na wɔl we i se nɔ klin na PAPA GƆD yay, mek dɛn nɔ klin na PAPA GƆD yay. 26I se dɛn gɛt fɔ oli lɛkɛ aw PAPA GƆD oli ɛn dɛn na PAPA GƆD yon pipul we mek dɛn difrɛn frɔm di ɔda wan dɛn.
27I se fɔ ston dɛn wan we kin wek dayman ɔ we kin tɔk bɔt wetin go apin bambay te dɛn day; na dɛn kɔmit sin.
Currently Selected:
Lɛvitikɔs 20: KRIO13
Highlight
Share
Copy
Want to have your highlights saved across all your devices? Sign up or sign in
Krio Bible © The Bible Society of Sierra Leone, 2013.