Lɛvitikɔs 22
22
Di Kayn Ɔfrin We PAPA GƆD Want
1Ɛn PAPA GƆD tɛl Mozis, 2fɔ tɛl Erɔn ɛn in bɔypikin dɛn mek dɛn nɔ jok wit di oli tin dɛn we di Izrɛlayt dɛn dɔn pre pan so dat dɛn nɔ go put shem pan in nem: I se nain na PAPA GƆD. 3I se Mozis fɔ tɛl dɛn se if ɛniwan na dɛn jɛnareshɔn go nia di oli tin dɛn we di Izrɛlayt dɛn dɔn pre pan, we i nɔ klin na PAPA GƆD in yay, i nɔ go mek i bi man we de mek sakrifays fɔ pipul sin igen: I se nain na PAPA GƆD. 4Nɔbɔdi we de na Erɔn in jɛnareshɔn we gɛt bad sik nain bɔdi ɔ we de pul wata kɔmɔt insay am fɔ it pan di oli tin dɛn te i klin na PAPA GƆD yay. I se ɛnibɔdi we tɔch wetin nɔ klin na PAPA GƆD yay lɛkɛ if i tɔch udat dɔn tɔch dedebɔdi ɔ if nainsɛf de pul wata kɔmɔt insay am, 5ɛn ɛnibɔdi we tɔch tin we go mek i nɔ klin na PAPA GƆD yay, i lɛk wetin dat bi, 6nɔ go klin na PAPA GƆD yay te ivintɛm ɛn i nɔ go it pan di oli tin dɛn te i was in bɔdi. 7Wans san dɔn go dɔŋ, i klin na PAPA GƆD yay so i kin it pan di oli tin dɛn, bikɔs na dɛn we na man dɛn we de mek sakrifays fɔ pipul sin gɛt di it. 8Nɔ fɔ it animal we day fɔ insɛf ɔ animal we dɛn wayl bif kil bikɔs dat go mek i nɔ klin na PAPA GƆD yay: I se nain na PAPA GƆD.
9I se ɔl di man dɛn we de mek sakrifays fɔ pipul sin fɔ du ɔl wetin i tɛl dɛn fɔ du ɔ nɔ so dɛn go bia wetin go bi wit dɛn we dɛn put shem pan PAPA GƆD in nem: I se nain na PAPA GƆD we de mek dɛn oli.
10Na udat de na di man dɛn we de mek sakrifays fɔ pipul sin dɛn jɛnareshɔn nɔmɔ, fɔ it pan di oli tin dɛn. Ɛnibɔdi we na trenja nain os ɔ we de wok fɔ pe, nɔ fɔ it pan di oli tin dɛn; 11bɔt if na slev i bay, we nain prɔpati, i fɔ it de; ɛn ɛnibɔdi we bɔn nain os kin it wetin in de it. 12If i gɛt gyal pikin we dɔn mared pɔsin we nɔto man we de mek sakrifays fɔ pipul sin, i nɔ fɔ it pan di oli tin dɛn. 13Bɔt if di gyal pikin in man dɔn day, ɔ i dɔn drɛb am na os ɔ i nɔ bɔn pikin we go kia fɔ am, we mek i go bak nain papa in os, lɛkɛ se in na pikin stil, i kin it pan in papa in it bɔt nɔn ɔda pɔsin na di os we na trenja nɔ fɔ it de. 14If pɔsin it pan di oli tin dɛn we i nɔ no se nain i de it, i fɔ gi di man we de mek sakrifays fɔ pipul sin di it bak ɛn ad twɛnti pasɛnt pan di it. 15Di man dɛn we de mek sakrifays fɔ pipul sin nɔ fɔ put shem pan di oli tin dɛn we di Izrɛlayt dɛn de gi PAPA GƆD, 16we dɛn go mek udat nɔ fɔ it pan di oli tin dɛn it de ɛn dat go mek di pipul dɛn sɔfa fɔ dat: bikɔs nain na PAPA GƆD we de mek dɛn oli.
17Dɔn PAPA GƆD tɛl Mozis se 18mek i tɛl Erɔn, in bɔypikin dɛn ɛn di ɔda Izrɛlayt dɛn se, wɛn ɛniwan pan dɛn ɔ ɛni trenja we tap wit dɛn, wɛda na fɔ du wetin dɛn prɔmis ɔ na bikɔs dɛn fil fɔ du am, wans na to PAPA GƆD i de mek am as bɔn ɔfrin, 19if i wan PAPA GƆD fɔ tek am, i fɔ bi man we nɔ gɛt bɔt pan in man kaw dɛn, in ship ɔ in got dɛn. 20Nɔ fɔ gi ɛnitin we gɛt bɔt bikɔs i nɔ go tek am. 21Ɛn wɛn ɛniwan pan dɛn de gi animal fɔ sho se dɛn want wanwɔd wit PAPA GƆD, wɛda na fɔ du wetin dɛn prɔmis ɔ na bikɔs dɛn fil fɔ du am, frɔm di animal dɛn we dɛn de mɛn, dat na di kaw ɔ ship ɔ got dɛn, fɔ mek i bi wetin PAPA GƆD want; i nɔ fɔ gɛt nɔn bɔt. 22Nɔ fɔ gi animal we blɛn ɔ we ambɔg ɔ we dɛn dɔn disloket ɔ we gɛt frɛsh wund ɔ we gɛt sɔm kayn sik nain bɔdi, fɔ ɔfrin to PAPA GƆD ɔ yuz am as ɔfrin we dɛn de bɔn na ɔlta to PAPA GƆD. 23If di animal bɔn wit pat we nɔ nɔmal, pɔsin kin gi am as ɔfrin we i fil fɔ gi, bɔt PAPA GƆD nɔ go tek am if na fɔ wetin i prɔmis se i go du. 24Nɔ fɔ gi PAPA GƆD ɛni animal we in prayvet dɔn kɔt, chɛr ɔ brus as sakrifays na di land.
25Ɛn nɔ fɔ mek ɔfrin fɔ it we na frɔm fɔrina an dɛn pul am. Dɛn dɔn gɛt bɔt ɔlrɛdi sins di pipul dɛn dɔn mek dɛn nɔ fɔ bɔn igen PAPA GƆD nɔ go tek dɛn kayn sakrifays de.
26Ɛn PAPA GƆD tɛl Mozis se, 27If kaw ɔ ship ɔ got bɔn, dɛn fɔ lɛf dɛn pikin wit dɛn fɔ sɛvin de bifo dɛn pul dɛn kɔmɔt to dɛn mami dɛn; ɛn na afta i dɔn ol et de, nain PAPA GƆD go tek am as ɔfrin we dɛn go mek na faya to am. 28If di mami na kaw ɔ na ship ɔ got, na fɔ kil in ɛn in pikin di sem de. 29If di sakrifays we pɔsin de mek, na sakrifays fɔ tɛl PAPA GƆD tɛnk, na fɔ mek shɔ se, i du wetin go mek PAPA GƆD tek am. 30Na di sem de fɔ it ɔl; natin nɔ fɔ lɛf te mɔnin: I se nain na PAPA GƆD.
31I se na ɔl dat dɛn fɔ de du: nain na PAPA GƆD. 32Ɛn nɔ fɔ du ɛnitin we go put in nem pan shem bɔt we go mek di Izrɛlayt dɛn si se i oli; I se nain na PAPA GƆD we de mek dɛn oli, 33we pul dɛn kɔmɔt pan slev layf na Ijipt fɔ mek i bi dɛn PAPA GƆD: I se nain na PAPA GƆD.
Currently Selected:
Lɛvitikɔs 22: KRIO13
Highlight
Share
Copy
Want to have your highlights saved across all your devices? Sign up or sign in
Krio Bible © The Bible Society of Sierra Leone, 2013.