Lɛvitikɔs 23
23
Aw Fɔ Sɛlibret Di Difrɛn Ju Ɔlide Dɛn
1PAPA GƆD tɛl Mozis se, 2mek i tɛl di Izrɛlayt dɛn se, na dɛn de dɛn we in PAPA GƆD dɔn pik fɔ mit am, we dɛn go gɛda fɔ wɔship PAPA GƆD, i de kam tɛl dɛn so. 3Na siks de nɔmɔ dɛn fɔ wok; bɔt di de we mek sɛvin na de fɔ blo, na de we fɔ gɛda ɛn wɔship PAPA GƆD; nɔ fɔ du nɔn wok, na di de we mek sɛvin we na de fɔ PAPA GƆD, i lɛk usay dɛn de. 4Na di fist dɛn dɛnwanya fɔ PAPA GƆD; di tɛm dɛn we dɛn fɔ gɛda bifo PAPA GƆD, we una sɔpoz fɔ du we di tɛm rich.
Pasova Ɛn Bred We Nɔ Gɛt Yist
(Di Nɔmba Dɛm 28:16-25)
5Di ivintɛm na di fotin de insay di fɔs mɔnt, dɛn fɔ sɛlibret di Pasova to PAPA GƆD. 6Di fiftin de insay da sem mɔnt de, dɛn fɔ mek gladi-gladi we dɛn fɔ it bred we nɔ gɛt yist, fɔ wɔship PAPA GƆD; na sɛvin de dɛn fɔ it bred we nɔ gɛt yist. 7Di fɔs de na di sɛlibreshɔn, dɛn ɔl fɔ gɛda fɔ wɔship am; ɛn dɛn nɔ fɔ du dɛn nɔmal wok we dɛn kin du ɛvride. 8Fɔ di sɛvin de, dɛn fɔ de mek ɔfrin na faya to PAPA GƆD; fɔ gɛda fɔ wɔship am di de we mek sɛvin ɛn dɛn nɔ fɔ du dɛn nɔmal wok we dɛn kin du ɛvride.
9PAPA GƆD tɛl Mozis se, 10mek i tɛl di Izrɛlayt dɛn se, wɛn dɛn rich na di land we i de gi dɛn, ɛn bigin avɛst di tin dɛn we dɛn plant, di fɔs bɔndul pan di bali we dɛn pul, na fɔ gi di man we de mek sakrifays fɔ pipul sin; 11ɛn in naw fɔ gi am lɛk se na spɛshal prɛzɛnt i de gi PAPA GƆD, so dat i go tek am; na di mɔnin afta dɛn dɔn blo, di man we de mek sakrifays fɔ pipul sin fɔ gi am lɛk spɛshal prɛzɛnt. 12Na da sem de de, dɛn fɔ gi wan yɔŋ man ship we nɔ gɛt bɔt as bɔn ɔfrin to PAPA GƆD. 13Ɛn di sid ɔfrin we de go wit am fɔ bi sikstin kɔp fayn flawa miks wit ɔyl ɛn dɛn fɔ mek am na faya so dat i go pul fayn sɛnt we go mek PAPA GƆD gladi; ɛn di drink ɔfrin go bi wan lita wayn. 14Ɛn nɔ fɔ it bred, pach it ɔ frɛsh it te dɛn dɔn gi dɛn ɔfrin to dɛn PAPA GƆD: na tin dis we na lɔ ɛn i fɔ bi na ɔl di jɛnareshɔn, i lɛk usay dɛn de.
Di Avɛst Sɛlibreshɔn
(Di Nɔmba Dɛm 28:26-31)
15I se fɔ kɔnt sɛvin wik frɔm di mɔnin afta di de we mek sɛvin we na fɔ blo, dat na di tɛm we dɛn bin avɛst di fɔs bali we dɛn bin gi as spɛshal prɛzɛnt, 16te fifti de to di mɔnin afta di nɔmba sɛvin tɛm we na di sɛvin de fɔ blo ɛn na da tɛm de dɛn fɔ gi PAPA GƆD di nyu sid ɔfrin. 17Fɔ pul tu lof bred we dɛn mek wit sikstin kɔp fayn flawa ɛn we dɛn bek wit yist kɔmɔt ɛnisay we dɛn de, so dat di man we de mek sakrifays fɔ pipul sin go gi am as spɛshal prɛzɛnt to PAPA GƆD as di fɔs tin we dɛn avɛst. 18Ɛn fɔ gi bred wit sɛvin yɔŋ ship we ol wan ia, wan yɔŋ man kaw ɛn tu man ship ɛn dɛn nɔn nɔ fɔ gɛt bɔt,; dɛn fɔ bi bɔn ɔfrin to PAPA GƆD wit dɛn sid ɛn drink ɔfrin dɛn wit dɛn; na ɔfrin we dɛn go mek na faya ɛn i fɔ pul fayn sɛnt we go mek PAPA GƆD gladi. 19Dɛn fɔ put wan man got de fɔ tek fɔ beg fɔ padin, ɛn tu man ship we ol wan ia, we go bi fɔ mek wanwɔd wit PAPA GƆD. 20Di man we de mek sakrifays fɔ pipul sin go gi di bred dɛn wit di tu yɔŋ ship as spɛshal prɛzɛnt to PAPA GƆD fɔseka ɔl di man dɛn we de mek sakrifays fɔ pipul sin; dɛn oli. 21Fɔ mek anawnsmɛnt da sem de de so dat pipul dɛn go gɛda fɔ wɔship PAPA GƆD; dɛn nɔ fɔ du dɛn nɔmal wok we dɛn kin du ɛvride; na tin dis we na lɔ ɛn i fɔ bi na ɔl di jɛnareshɔn, i lɛk usay dɛn de.
22I se wɛn dɛn de avɛst di tin dɛn we dɛn plant, dɛn nɔ fɔ pik ɔltin we dɛn plant lɛkɛ dɛn wan we de na dɛn kɔna ɔ dɛn wan we kin fɔdɔm na dɛn an ɛn lɛf am arara; dɛn fɔ lɛf sɔm fɔ poman ɔ fɔ ɛni trenja: I se nain na PAPA GƆD we na dɛn GƆD.
23Ɛn PAPA GƆD tɛl Mozis se, 24mek i tɛl di Izrɛlayt dɛn se, na di fɔs de na di mɔnt we mek sɛvin, fɔ blo pan ɔltin, fɔ blo trɔmpɛt dɛn we go kɔl ɔlman fɔ gɛda fɔ wɔship PAPA GƆD. 25Nɔ fɔ du dɛn nɔmal wok we dɛn kin du ɛvride; fɔ gi PAPA GƆD ɔfrin we dɛn mek na faya.
Di Big De We Na Fɔ Fɔgiv Sin
(Di Nɔmba Dɛm 29:7-11)
26PAPA GƆD tɛl Mozis se, 27di tɛn de na di sɛvin mɔnt na de we na fɔ fɔgiv sin, so i fɔ bi tɛm we dɛn fɔ gɛda fɔ wɔship PAPA GƆD ɛn na di de we dɛn fɔ fast ɛn mek ɔfrin to PAPA GƆD na faya. 28Na de we nɔ fɔ du nɔn wok bɔt na fɔ beg PAPA GƆD we na dɛn GƆD fɔ padin dɛn sin. 29Ɛnibɔdi we nɔ fast da de de, dɛn fɔ drɛb am kɔmɔt Izrɛl. 30Ɛn ɛnibɔdi we du wok da de de go lɔs in layf. 31Nɔ fɔ du nɔn wok: na tin dis we na lɔ ɛn i fɔ bi na ɔl di jɛnareshɔn, i lɛk usay dɛn de. 32Dis de fɔ tan lɛk ɛni sɛvin de we na fɔ blo, ɛn dɛn fɔ fast; frɔm di ivintɛm na di de we mek nayn te di ɔda de ivintɛm, nain dɛn fɔ blo ɛn nɔ du wok ɛn fɔ fast.
Di Tɛm We Dɛn Tap Na Bafa
(Di Nɔmba Dɛm 29:12-40)
33PAPA GƆD tɛl Mozis se, 34mek i tɛl di Izrɛlayt dɛn se, frɔm di fiftin de na di mɔnt we mek sɛvin ɛn fɔ sɛvin de, dɛn fɔ tap na bafa. 35Di fɔs de, dɛn fɔ gɛda ɔlman fɔ wɔship PAPA GƆD; nɔ fɔ du nɔn pan dɛn dɛn nɔmal wok we dɛn kin du ɛvride. 36Fɔ sɛvin de fɔ de mek ɔfrin dɛn na faya to PAPA GƆD; di de we mek et fɔ mek ɔlman gɛda bak fɔ wɔship PAPA GƆD ɛn gi wan ɔfrin na faya to PAPA GƆD; dɛn ɔl gɛda wan ples ɛn nɔ fɔ du dɛn nɔmal wok we dɛn kin du ɛvride.
37I se na di de dɛn we PAPA GƆD dɔn pik fɔ mit am, we dɛn go gɛda fɔ wɔship GƆD ɛn we dɛn go gi ɔfrin to PAPA GƆD na faya wɛda na bɔn ɔfrin ɔ na sid ɔfrin, ɔda sakrifays dɛn ɛn drink ɔfrin di de we dɛn fɔ du am. 38Ɔl dat nɔ fɔ miks pan di nɔmal ɔfrin we dɛn kin mek di de we mek sɛvin fɔ blo, dɛn ɔda prɛzɛnt dɛn, di wan we dɛn bawn fɔ mek ɛn di wan we dɛn fil fɔ mek.
39Bay di fiftin de na di mɔnt we mek sɛvin, afta dɛn go dɔn avɛst wetin dɛn plant, dɛn fɔ du wetin PAPA GƆD se fɔ sɛvin de; di fɔs de dɛn fɔ blo bɔt fɔ gɛda fɔ wɔship PAPA GƆD ɛn di de we mek et, dɛn fɔ du so bak. 40Di fɔs de, dɛn fɔ tek dɛn frut we gɛt wata, pam branch ɛn ɔda branch dɛn we gɛt lif, wit dɛn smɔl smɔl flawa we kin gro nia watasay ɛn fɔ de gladi gladi fɔ PAPA GƆD fɔ sɛvin de. 41Na sɛlibreshɔn dis fɔ PAPA GƆD ɛn fɔ de du am sɛvin de na di ia; na tin dis we na lɔ ɛn i fɔ bi na ɔl di jɛnareshɔn ɛn nainsay di mɔnt we mek sɛvin fɔ du am. 42Na fɔ tap na bafa fɔ sɛvin de wans dɛn na bɔn Izrɛlayt, 43so dat dɛn jɛnareshɔn go no se na bafa PAPA GƆD bin mek dɛn tap we i pul dɛn kɔmɔt Ijipt: i se nain na PAPA GƆD we na dɛn GƆD.
44Na so Mozis tek tɛl di Izrɛlayt dɛn wetin fɔ du di tɛm dɛn we PAPA GƆD pik fɔ mit wit am.
Currently Selected:
Lɛvitikɔs 23: KRIO13
Highlight
Share
Copy
Want to have your highlights saved across all your devices? Sign up or sign in
Krio Bible © The Bible Society of Sierra Leone, 2013.