ƐSITA 2
2
Ɛsita Wotenga a Nyaha Mahei
1Ji hindei jisia ti leweni, Mahei Aasuɛlɔsi liilewe mahu yeilɔ, i gililɔ a Vasti kɛ gbɔɔ i yɛ pienga kɛ na ti yɛ ndani a sawa ngi va. 2Na wooma mahei bɔilopoisia ti ndeilɔ tɛɛ, “A mu nyahalengaa lɔgbɛ nyandengɔngaa gɔkɔli mahei va. 3Tawao mahei i loko loo kpakoisia ma kpaalateisia gbi hu ngi mahawui hu kɔɔ ti nyahalengaa lɔgbɛ nyandeisia lɛma nyahangeisia ti wɛlei bu Susa la wai hu ti loko wangɔ Hegai yeya, mahei numu nuningɔi na looni nyahangeisia mahu; tawao ti na gbi ve ti wɛ a pie ti nyandei maa i to. 4Kɛ nyahaloi na ngi hinda a nɛɛ mahei wɛ i wote a nyaha mahei Vasti loomei.” Ji nɛɛlɔ mahei wɛ, tawao hi mia i pieni.
5Watii na Juumɔ yila i yɛlɔ ta wai na hu Susa ngi laa a Mɔldekai, Jail hindoloi, Simei hindoloi, Kisi hindoloi, Bɛnjaminaitimɔi. 6Ti Kisi gbuailɔ Jelusalɛmi taa Juda Mahei Jɛkɔnaya, nasia lia Babilɔn Mahei Nɛbukadnɛsa, yɛ ti houni. 7Mɔldekai mia i yɛ Hadasa makɛni, na yɛni a Ɛsita ngi ndewei nyahaloi, ajifa ngi kɛkɛ ii yɛna tawao ngi nje bɛɛ i yɛna; ngi luma yilangɔ yɛla tawao ngi nyandengɔ, tawao ji ngi kɛkɛ kɛ ngi nje ti haani, Mɔldekai i ngi wumbuilɔ a ngi nda nyahalo. 8Fale ji ti mahei yɛpei leni, tawao ji ti foninge nyahangaa gbotongaa lɛnima Susa la wai hu ti Hegai mahugbee bu, ti liilɔ a Ɛsita bɛ mahei yee pɛlɛ la kɛ ti ngi loko wanga Hegai yeya, na i yɛ nyahangeisia mahu. 9Nyaha lopoi ji hinda nɛɛlɔ ngi wɛ kɛ i ngi yauwandei majɔɔnga, kɛ i hakei nasia venga ngi wɛ a ngi nyandei mato kɛ ngi mɛhɛɛ, kɛ nyahabɔilopo wɔfilei nasia ti ti wumbuni mahei maha wɛlei hu, kɛ ti ngi loonga kɛ ngi nyahabɔilopoisia hinda yekpe maha wɛlei bu, nyahangeisia ti wɛlei bu. 10Ɛsita ii ngi nungaa ɔɔ ngi bondaa gɛni ajifa Mɔldekai yɛ ndenga yɛ aa hungɛ. 11Folo gbi Mɔldekai yɛlɔ a lewe kitilewe gatei gulɔ nyahangaa ti wɛleisia lia, kɔɔ i tɔ kia Ɛsita yee na tawao kia i wie ma a ngie.
12Watii hitilɔ nyaha loo gbi va li va Mahei Aasuɛlɔsi gama, ngawu puu mahu fele wooma nasia ti nyahangeisia ti jaweisia bu, kia ji mia i yɛni a watii ti nyande majɔɔ va, ngawu weita ta ti mali a simiji wulɔ, kɛ ngawu weita a kunɛɛ hanisia kɛ nyande mato hanisia nyahangeisia va. 13Ji nyahaloi a jɔkɔ mahei gama, ti na gbi velɔ ngi wɛ a mɔli na kɔɔ i gbua la nyahangaa ti wɛlɛbu li va la mahei wɛlei bu. 14A jɔkɔlɔ a kpɔkɔi; na wooma a walɔ gbɔma a ngendei nyahangeisia ti wɛlei yee felei bu Sasigasi mahugbee bu, mahei numu nuningɔi, na i yɛ looni mahei nyapoisia mahu; ɛɛ yaa jɔkɔ gbɔma mahei gama, kɛ lekee mahei i lo a ngie tawao ta ngi biyei lolilɔ.
15Ji Ɛsita watii hitini, Abihaili nyahaloi, Mɔldekai kenya, na i yɛ ngi wumbunga a ngi nda nyahaloi li va mahei gama, ii gbɛogbɛ mɔlini kɛ lekee ndahin na Hegai mahei numu nuningɔi, na i yɛ looni nyahangeisia mahu i feni. Kiahuna Ɛsita hinda i nungeisia gbi yaun houilɔ ji ti ngi lɔni. 16Ji ti liini a Ɛsita Mahei Aasuɛlɔsi gama ngi maha gatei hu ngawui yee puui hu, na yɛni Tebɛti yawui, fooi yee wɔfilei hu ngi mahayei hu, 17mahei loilɔ a Ɛsita i lewe nyahalengei nasia gbi ma; nyahalengeisia gbi lia ngi hinda i ngi yaun houilɔ kɛ i loonga a ngie. Fale i maha bɔlei wɛlɛlɔ ngi wumba, kɛ i ngi wotenga a nyaha mahei Vasti loomei. 18Na wooma mahei mɛhɛɛ mɛ gomɛ waa hugbatɛlɔ ngi mahangeisia kɛ nasia va ta yenge ngi va, “Ɛsita mɛhɛɛ mɛ gomei.” I ndɛvu volo veilɔ kpaalateisia wɛ kɛ i boya hakangaa venga ti wɛ kia ngi maha gbatei i yɛ na.
Mɔldekai i Mahei Lɛvui Mabawonga
19Ji ti nyahalengeisia lɛnima hinda yila, Mɔldekai yɛ heini mahei gɔlɔi lama lɔ. 20Kiahuna Ɛsita ii yaa bonda wui gɛni i gbuani na ɔɔ ngi nungaa, kia Mɔldekai i yɛ ndeni ngi ma; ajifa Ɛsita goloilɔ Mɔldekai bu kia lekee i ngi makɛni la. 21Yee foloi nasia hu, sia Mɔldekai i yɛ heini mahei gɔlɔi lama, Bigitana kɛ Tɛlɛsi, mahei numu nuningɔ feleisia, nasia ti yɛ katei lamei mahugbee ti lii lewelɔ kɛ ti hugbatɛ wienga Mahei Aasuɛlɔsi waa va. 22Kɛɛ Mɔldekai i yee hindei ji hugɔi lɔ, kɛ i hugɛnga a nyaha Mahei Ɛsita, kɛ Ɛsita ndenga mahei ma kia Mɔldekai i yɛ ndeni la ngi ma. 23Kia ti yee hindei hu gbɛkpɛni ti tɔilɔ kɛ tɔnya mia, ti yee hingaa felei jisia hɛlɛlɔ numu hɛlɛ wuli ma. Ti nyɛinlɔ njia wova gɔlei hu mahei yama.
Currently Selected:
ƐSITA 2: RMB
Highlight
Share
Copy
Want to have your highlights saved across all your devices? Sign up or sign in
Mende Bible Portions © Bible Society in Sierra Leone and Lutheran Bible Translators, 2020.
