ƐSITA 3
3
Haman Hugbatei Wienga Juubleisia Waa va
1Hindei jisia ti lewengɔi wooma, Mahei Aasuɛlɔsi i Haman yalɛilɔ Hamidata hindoloi, Agagaitimɔi, i ngi loo mahangeisia gbi mahu ti yɛ ngi gama. 2Tawao mahei bɔilopoisia gbi nasia ti yɛ mahei gɔlɔi lama ti wɛlɛlɔ Haman gɔwɔbu ti baagɔma ve ngi wɛ; ajifa hi mia mahei i yɛ ndeni kɔlooni ngi ma. Kɛɛ Mɔldekai ii mawɛlɛni tawao ii baagɔma veni. 3Na wooma mahei bɔilopoisia nasia ti yɛ gɔlɔi lama ti ndeilɔ Mɔldekai ma tɛɛ, “Gbɛ va mia bi mahei layei gbuanga hu?” 4Ji ti yɛpɛni ngi gama folo gbi taa ngi nda volo ii wolooni ti ma, ti ndeilɔ Haman ma, kɔɔ ti tɔ ina Mɔldekai yɛpeisia ta lolɔ ma; ajifa i yɛ ndenga ti ma yɛ Juumɔ mia a ngie. 5Ji Haman tɔni kɛ Mɔldekai ii mawɛlɛni tawao ii baagɔma veni ngi wɛ, Haman liilewelɔ. 6Kɛɛ i gililɔ kɛ ma ii houni Mɔldekai yakpe waa va. Fale ji ti ndeni ngi ma yee mia Mɔldekai nungeisia a tie, Haman hinda hugbatɛlɔ Juubleisia kpɛlɛɛ waa va, Mɔldekai nungeisia, Aasuɛlɔsi mahawui hu gbi.
7Ngawui yee halayei hu, na Nisani yawui le, fooi yee puu mahu felei Mahei Aasuɛlɔsi maha gbeemei, ti hu gbɛkpɛ wielɔ na ta toli a Puli, na yɛni a “tɔtɔ gbɛla,” Haman gulɔ foloi na va kɛ yee ngawui na va, kɛ tɔtɔi gulani foloi yee puu mahu sawei lɔ ma, ngawui yee puu mahu fele hu, na yɛni a Adaa yawui. 8Na wooma Haman ndeilɔ Mahei Aasuɛlɔsi ma yɛɛ, “Nungaa lɛnga lɔna ti vayafayangɔ hu tawao ti luahu gɔlɛkɔlɛngɔ nungeisia lia kpaalateisia gbi hu bi mahawui hu; ti jaweisia ti gba ti gbuangɔ nungaa yekeisia ti jaweisia ma, tawao tɛɛ mahei jaweisia hou, fale ii nyandeni kɔɔ mahei i ti wu yakahu. 9Ina i nɛɛlɔ mahei wɛ, sawa la ti waa va, tawao nga pawa velɔ a kanigole taosin puu (10,000) nasia wɛ ti looni mahei hindeisia mahu, kɔɔ nahi ti pu mahei lamagbatɛmeisia.” 10Fale mahei i ngi lokohu gani gbuailɔ kɛ i fenga Haman wɛ Hamidata Agagaitimɔi hindoloi, Juubleisia ti juwui. 11Mahei ndeilɔ Haman ma yɛɛ, “Ti navoi ve na ma bi wɛ, kɛ nungeisia bɛ, kɔɔ bi na wie a tie ba tɔ nyandengɔ bi gama.”
12Na wooma ti mahei gɔlɔnyɛinbleisia lolilɔ foloi yee puu mahu sawei ma, haala yawui hu, kɛ mahei wowili, kɔlooni na gbi ma Haman ndeni, ti nyɛinlɔ mahawu gbakoisia gama kɛ gɔmineisia gama nasia ti loni kpaalateisia gbi mahu kɛ nungeisia ti mahangeisia, kpaalata gbi ngi nda gɔlɔnyɛinyii hu kɛ ngi nda layei hu; ti nyɛini Mahei Aasuɛlɔsi biyei hu lɔ kɛ ti ndagbɔnga a mahei lokohu gani. 13Ti kɔlei jisia yoyoilɔ a tutuisia mahei gbaalateisia gbi hu, nde va Juubleisia gbi jukuu va, ti waa va, kɛ ti lɛvu nyani va foningeisia ɔɔ numu woveisia, nyahangeisia kɛ ndopoisia, foloi yakpe gohu, foloi yee puu mahu sawei ma ngawui yee puu mahu fele hu, na yɛni a Adaa yawui, tawao ti ti hakeisia gapu. 14Kɔlɔ nyɛingɔ yɛlɔ na dava a sawa kpaalata gbi hu na ndeni yɛɛ, ta nungeisia gbi loli kɔɔ ti ti magbatɛ foloi na va. 15Tutuisia ti lilɔ kaka a na mahei i ndeni, kɛ ti sawei venga Susa la wai hu. Mahei taa Haman ti heilɔ kɔɔ ti kpɔli hinda wie; kɛɛ ji wailɔ a hinda huwungɔ Susa la wai hu.
Currently Selected:
ƐSITA 3: RMB
Highlight
Share
Copy
Want to have your highlights saved across all your devices? Sign up or sign in
Mende Bible Portions © Bible Society in Sierra Leone and Lutheran Bible Translators, 2020.
