Luk 6
6
1Ka pə re yi ka asabath alɔm ma ɔ thas ka atɔr-e, aŋkarande ŋɔŋ aŋ siməth magbas, aŋ nɔtha ma ka mȧta maŋ, kaŋ di ma. 2Kɛrɛ aŋFarisi alɔm aŋ pa, kɔyɛŋ mə nə yɔ ȧte aŋthɔ aŋ bɛnt tə kəyɔ ka ȧŋrey ŋa aŋsabath-e? 3Ɔwa Yisɔsȧŋ ɔ gbakia ŋa, ɔ pa, Nə la hɛ karaŋ ȧte Debid ɔ yɔ ma dor rə wop kɔ yi aŋa paya kɔ-i? 4Ɔ wɔŋ ka ȧŋseth ŋa Kuru, kɔ gbasi, ɔ di tabo təsəm ȧte aŋfode, ŋa gbo son aŋ ba mamari tə kədi, ɔwa ɔ di ti kɔ sɔŋ sɔ aŋfəm aŋa yi yi kɔnɔ. 5Ɔ pa sɔ ro ŋaŋ, ɔWan ka wuni ɔ yi ɔMarki ka aŋsabath sɔ.
6Ka pə kȧl sɔ yi ka aŋsabath alɔm-e, ɔ wɔŋ ka ȧŋseth agbanɛ, kɔ thəksa aŋfəm. Ka wuni ɔ yi ri ɔwe pə yi-e, kȧta kɔŋ kədiɔ kə yi kəfi. 7Ɔwa aŋkarmɔkɔ yi aŋFarisi aŋ kəli kɔ, bepi ɔ tə gbəli yenkəs kɔ ka aŋsabath, kȧmȧ aŋ gbəli fir roŋ tə kəgbanthir kɔ. 8Kɛrɛ Yisɔs ɔ tȧrȧ ɛnanɛ yaŋ, kɔ pa ka ɔwuni ɔwe ba kȧta kəfi, Yokanɛ, mə təmȧ su ratɔŋ. Kɔ yokanɛ, ɔ təmȧ. 9Ka Yisɔsȧŋ ɔ pa ro ŋaŋ, I yif nu, ɔlompi tə kəyɔ ɔfinɔ ka ȧŋsabath-i, thalɔm ɔləs-i? Tə kəkisis aŋesəm-i, thalɔm tə kələsər ŋi-e? 10Ma ɔ po kəli ŋa bɛ-e, ɔ pa ka ɔlaŋgba. Thanthi kȧta ka mu. Kɔ yɔ ti, ɔwa kȧta kɔŋ kə kȧl yeŋk. 11Kɛrɛ aŋkarmɔkɔ yi aŋFarisi aŋ la məbaŋ, ka aŋ nəŋkanɛ ta ȧte aŋ gbəli yɔ Yisɔsȧŋ.
12Ka pə re yi ka mȧrey mati-e, ɔ kɔ ka kateŋ tə kəramnɛ. Ɔwa ɔ sɔkɔ ramnɛ ka Kuru gbɛs. 13Ma pə sɔk-e, ɔ tela aŋkarande ŋɔŋ, kɔ thith tɔfɔt ŋarəŋ kətɔŋ ka ŋaŋ, kɔ bont ŋa asom. 14Saymɔnȧŋ, (ɔwe a bont Pita) Andrɔŋ, ɔwɔnt kɔŋ uruni, Yeməsȧŋ yi Yɔnȧŋ, Filipȧŋ yi Barthɔlɔmiyuȧŋ, 15Mathiu dɛ yi Thɔmɔsȧŋ, Yeməsȧŋ ɔwan uruni ka Alfiɔs, Saymɔnȧŋ ɔwe a bont Selɔt, 16Yudasȧŋ ɔwan uruni ka Yeməs, yi Yudas Iskariyɔt ɔwe sɔnd Yisɔs. 17Ɔ thor yi ŋaŋ ka abɛthkɔ, kɔ bəp ȧruniya ra aŋkarande ŋɔŋ yi afəm agbȧthi aŋa wur ro Yudia bɛ yi ro Yerusalɛm, yi ka ȧŋthɔf ŋa ro Tair yi ro Sidon, aŋa der tə kətəla kɔ, ɔwa kȧmȧ ɔ damər tatu taŋ. 18kɔ yenkəs aŋfəm aŋa akərəfi aləs aŋ sɔmpa-e. 19Ɔwa aŋfəm bɛ aŋ mɛm tə kəgboŋ kɔ, pəkasifɛ afɔsɔ aŋ wur kɔ, aŋ yenkəs ŋa bɛ.
20kɔ ŋata ɛfɔr yɔŋ ka aŋkarande ŋɔŋ, ɔ pa, Naŋ amɔnɛ nə ba aruba, kotȧy-e na ba rȧbȧy ra Kuru. 21Naŋ aŋa yi ador ka-ake nə ba aruba, kotȧy-e nə ba kənamra. Naŋ aŋa kulɔ ka-ake nə ba aruba, kotȧy-e nə ba kəsel.
22Na aruba, ma afəm aŋ gbɛŋa nu, ɔwa maŋ gbaskinɛ nu, ɔwa aŋ sambos nu, aŋ wurɔ ames ma nu mɔ tȧy tələs salata ɔWan ka wuni. 23Tə pə bɔnɛ nu ka ȧŋrey ŋati, ɔwa pais nu yi məbɔnɛ; ȧtesoma-e ȧŋrȧm a nu aŋ yi abana ro riyana. Kotȧy-e ya aŋkas a ŋaŋ aŋ yɔ aŋnabi. 24Kɛrɛ mɔnɛ ro nu na yi ayola, kotȧy-e nə po thɔŋ sɔthɔ kȧbɛfəth ka nu. 25Mɔnɛ ro nu aŋa namra ka-ake, kotȧy-e dor rə tə wop nu. Mɔnɛ ro nu aŋa sel ka-ake, kotȧy-e nə tə saŋ amɔl, ɔwa nə tə kulɔ. 26Mɔnɛ ro nu ma afəm bɛ aŋ fɔf nu ɔfinɔ, kotȧy-e ya aŋkas a ŋaŋ aŋ yɔ aŋnabi ayem.
27Kɛrɛ ka ŋaŋ aŋa təl i pa, Bɔthər aŋtheranɛ a nu, yɔ ɔfinɔ ka ŋaŋ aŋa mə gbɛŋa nu, 28ruba ŋaŋ aŋa mə nal nu, ramnɛ nu ta ŋaŋ aŋa mə yɔ nu ɔləs. 29Ma wuni ɔ gbantha mu ka aŋkos ŋin-e, laŋklia kɔ sɔ aŋlɔm; ɔwa ɔwe mə nɔy aruma ra mu rəbana-e, te bɛnt kɔ aruma ra mu rəratha sɔ. 30Sɔŋ wuni o wuni ɔwe tholir mu, ɔwa ma wuni o wuni ɔ nɔy ɛyɛt ɛ mu-e, te yif kɔ ti sɔ. 31Mɔ mȧ nə yema aŋfəm aŋ yɔ nu yaŋ sɔ mə nə yɔ ŋa. 32Bepi nə bɔthər gbo ŋaŋ aŋa bɔthər nu-e, ko mɔmɔ mȧ nə ba-e? kotȧy-e hali aŋfəm aləs aŋ bɔthər ŋaŋ aŋa mə bɔthər ŋa. 33Ɔwa bepi nə yɔ ɔfinɔ gbo ka ŋaŋ aŋa mə yɔ nu ɔfinɔ-e, ko mɔmɔ mə nə ba-e? Hali aŋfəm aləs aŋ yɔ yi. 34Bepi nə bɔ yɛt ka ŋaŋ gbo aŋa əŋ nanɛ tə kəkal sɔthɔ yi sɔ-e, ko mɔmɔ mə nə ba-e? Hali aŋfəm aləs aŋ bɔ afəm aləs, tə kəkal sɔthɔ amɔlɔ mati sɔ. 35Tiyȧŋ bɔthər aŋtheranɛ a nu, yɔ ŋa ɔfinɔ, bɔ ŋa kate gbak ȧmerȧ tə kəkal sɔthɔ; ɔwa ȧŋrȧm a nu aŋ tə yi abana, ɔwa nə tə yi aŋwuth ŋa ɔBɔli rəkɔm. Kotȧy-e ɔ yɔ ɔfinɔ ka aŋfisrəwali yi aŋləs. 36Ba ȧney mɔ mə ɔKas ka nu ɔ ba ȧney. 37Te nu thonkas apa, ɔwa a ba hɛ tə kəthoŋkas nu. Te sɔŋ wuni mətheri. Ɔwa a ba hɛ tə kəsɔŋ nu mətheri. Tera, ɔwa a tə tera nu. 38Sɔŋ, ɔwa a tə sɔŋ nu, kəthunth kəfinɔ, kəthiŋkər, kəyinktha, kəloŋ, a tə sɔŋ yi ka mȧta mȧnu. Kotȧy-e, ka aŋthuntha aŋa mə nə thunth-e, ŋa mə a kȧl thuntha nu.
39kɔ fɔf alomɔ ro ŋaŋ, ɔ pa, Ɔfith ɔ gbəli kɔtha ufith-i? Ŋa ŋarəŋ aŋ fumpɔ hɛ ro fo-i? 40Ukarande ɔ thas hɛ ɔkarmɔkɔ kɔŋ, kɛrɛ wuni o wuni ɔwe pons kətara, ɔ tə yi mɔ ɔkarmɔkɔ kɔŋ. 41Ɔwa to som mə nə nənk ȧŋpol aŋa yi ka rafɔr ra ɔwɔnt mu-e, kɛrɛ mə nənk hɛ kagboŋ ȧke yi ka rafɔr ra mu-e? 42To mə gbəli pa ka ɔwɔnt mu, Wɔnt mi, yɔ kȧmȧ i wurɔ ȧŋpol ka rafɔr ra mu, ma mə te nənk kagboŋ ȧke yi ka rafɔr ra mu-e? Mun munafaki, mɔtha wurɔ kagboŋ ka rafɔr ra mu, ɔwa mə tə nənk gbəraŋ tə kəwura ȧŋpol aŋa yi ka rafɔr ra ɔwɔnt mu. 43kotȧy-e, ŋənt ȧfinɔ aŋ kom hɛ məkomi mələs, thalɔm ŋənt ələs aŋ kom hɛ məkomi məfinɔ. 44Ɔwa a tȧrȧ ŋənt o ŋənt ka mȧkomi mati. Afəm aŋ pim hɛ məgbɔnɔ rə təbaŋk, ɔwa mətiti rə təsenduku. 45Wuni finɔ ka ɛbɛnɛ ɛfinɔ ya ȧŋmerȧ ŋɔŋ ɔ wurɔ ȧte yi təfinɔ; ɔwa wuni ləs ka ɛbɛnɛ ɛləs ya ȧŋmerȧ ŋɔŋ ɔ wurɔ ȧte yi tələs. Kotȧy-e ka kala ka ȧŋmerȧ kȧsəŋ kɔŋ kə tə fɔf.
46To som nə bont mi, Pa, Pa, kədarəŋ ka nə yɔ hɛ ȧte i kanɛ nu-e? 47Wuni o wuni ɔwe der ro rɔmi, ɔ təl ȧsim ta mi, ɔ wop ti, i ti tɔri nu ɔwe ɔ bȧlȧnɛ. 48Ɔ yi mɔ wuni ɔwe mə təmər aseth. Ɔ bɛs ɔbɔlɔŋ, ɔ raf ɔtəmər wa ȧŋseth rə agbalaŋ. Ma ȧmȧnt məfɔl mə der-e, mə sap ȧŋseth ŋati, kɛrɛ mə gbəli hɛ yiŋktha ŋi, ȧtesoma-e a po təmər ŋi ɔfinɔ. 49Kɛrɛ kɔnɔ ɔwe mə təl, ɔ wop hɛ, ɔ yi mɔ wuni ɔwe təmər aseth ka ȧŋthɔf kəte bɛs. Ma ȧmȧnt məfɔl mə sap ŋi-e, ka ɔlɛmp wati aŋ fumpɔ, ɔwa kafumpɔ ka ȧŋseth ŋati kə yi kəbana.
Currently Selected:
Luk 6: TMNNT
Highlight
Share
Copy
Want to have your highlights saved across all your devices? Sign up or sign in
Themne New Testament © The Bible Society of Sierra Leone, 2009.
