Luk 7
7
1Ma ɔ po gbanthi kəfɔfanɛ aŋfəm bɛ-e, ɔ wɔŋ ro Kepaniyɔm. 2Ka ȧŋbɔy ŋa ukaptin ulɔm, ɔwe ɔ bɔthər, ɔ tu, kɔ fənthȧ tə kəfi. 3Ɔwa ma ɔkaptin ɔ təl ta Yisɔsȧŋ, ɔ som aŋbȧki ŋa aŋYuda tə kənɛmthɛnɛ kɔ kȧmȧ ɔ der, ɔ ramər ȧŋbɔy ŋɔŋ. 4Ɔwa maŋ bek ka Yisɔs-e, aŋ nɛmthɛnɛ kɔ tɛntɛnɛ, kaŋ pa, Kɔn ɔ yi ubeki kȧmȧ mə yɔna kɔ ȧte, 5pəkasifɛ ɔ bɔthər ȧŋbona a su, ɔwa kɔn kɔnɔnɛ ɔ po təmər su aseth agbanɛ. 6Ka Yisɔs ɔ kɔ yi ŋaŋ. Ma ɔ fatər ȧŋseth-e, ɔkaptin ubana ɔ som ayathki ro rɔŋɔŋ kəpa, Pa, te sɔmpanɛ tə kəder; kotȧy-e i bek hɛ kȧmȧ munɔ mə wɔŋ ka ȧŋseth a mi. 7Tȧsom sɔ-e, i tȧmtȧmnɛ hɛ kəpa i yi min beki tə kəder ro rɔmu, kɛrɛ pa gbo ȧrim, ɔwa ȧŋbɔy a mi ɔ tə yeŋk. 8kotȧy-e minɛ sɔ i yi wuni ka afɔsɔ ratha, ɔwa i ba atim roratha kȧmi. I kanɛ ukin ka ŋaŋ, Kɔ, ɔwa ɔ kɔnɛ; ka ulɔm, Der, ɔwa ɔ der; ka ȧŋbɔy a mi, Yɔ ȧte, ɔwa ɔ yɔ ti. 9Ma Yisɔs ɔ təl mȧtȧy ame, ɔ kabanɛ, kɔ fəlɛ ka aŋfəm aŋa tȧŋ kɔ, ɔ pa ro ŋaŋ, I tha bəp hɛ kəlanɛ kəbana mɔ ake hali kətɔŋ ka aŋIsrɛl. 10Ɔwa aŋsom-e, maŋ kȧlanɛ ro seth-e, aŋ bəp ȧŋbɔy ɔ po yeŋk.
11Ka pə re yi ka ȧŋrey alɔm ɔ kɔnɛ ka kȧpet ȧke a bont Nen, ka aŋkarande ŋɔŋ aŋ paya kɔ yi afəm agbȧthi. 12Ɔwa, ma ɔ fat ka kadare ka kapet-e, kəla, a wurɔ wuni ɔwe po fi, wan runi ukin ka ɔkara kɔŋ, ɔwa kɔnɔ ɔ yi ubora. Ka afəm agbȧthi ŋa kȧpet aŋ yi yi ɔyaŋ. 13Ma ɔMarki ɔ nənk ɔya-e, ɔ bana kɔ ȧney, kɔ pa ro rɔŋɔŋ, Te bok. 14Ka Yisɔsȧŋ ɔ fatər ŋa, kɔ gboŋ aŋgbatha, ka aŋfəm aŋa gbanɛ kabel aŋ təmȧ. Kɔ pa, Langba, i kanɛ mu, yokanɛ. 15Ɔwa kɔnɔ ɔwe po fi ɔ yokanɛ, ɔ təp kəfɔf. Ka Yisɔs ɔ lȧnki kɔ ka ɔkara kɔŋ. 16Ka rənes rə wop aŋfəm bɛ; ɔwa aŋ yikis Kuru, aŋ pa, Unabi ubana ɔ po yokanɛ kətɔŋ kȧsu, ɔwa Kuru ɔ pənɛ hɛ aŋfəm ŋɔŋ. 17Ɔwa mapa ame mə gbanthɛnɛ ro Yudia bɛ yi ka ȧŋthɔf aŋa gbətɔ ri.
18Aŋkarande ŋa Yɔn aŋ tɔri kɔ mȧtȧy ame bɛ. 19Ka Yɔnȧŋ ɔ tela akarande ŋɔŋ ŋarəŋ ɔ som ŋa ka Yisɔs tə kəyif, Munɔ yi kɔnɔ ɔwe yi tə kəder-i, thalɔm sə kəlianɛ ulɔm-i? 20Ma aŋlaŋgba aŋ bek ro ŋɔŋ, aŋ pa, Yɔn ɔbaptist ɔ som su ro rɔmu, ɔ pa, Munɔ yi kɔnɔ ɔwe yi tə kəder-i, thalɔm sə kəlianɛ ulɔm-i? 21Ka ȧŋlɔkɔ ŋati gbeŋ Yisɔs ɔ ramər afəm agbȧthi aŋa ba tətu-o, ɛsɔmpanɛ ɛbaŋ-o, yi akərəfi aləs, ɔwa ɔ sɔŋ kəkəli ka afith agbȧthi. 22Ka Yisɔs ɔ wosȧnɛ ŋa ɔ pa, Kɔnɛ nu, ɔwa tɔri Yɔn mȧtȧy ama nə po nənk yi ama nə po təl; aŋfith aŋ sɔthɔ kakəli ka ŋaŋ, aŋgbɛthkɛ aŋ kɔth, aŋa ba arom a fethər ŋa, aŋtȧŋȧ aŋ təl, aŋfi aŋ kȧl yi akəli, ɔwa a tɔri ȧkɛra kəfinɔ ka Kuru ka ȧŋmɔnɛ. 23Ɔwa wuni ka aruba wɔŋ ɔwe te fir asabu ŋa kəpənthbəla ro rɔmi. 24Ma aŋsom ŋa Yɔn aŋ kɔnɛ-e, Yisɔs ɔ təp kəfɔfanɛ aŋfəm ta Yɔn, kɔ pa, Ko tȧy tȧŋ nə kɔ ro wula tə kəkəli-e? Kəthaŋkɛ ȧke aŋfef aŋ yiŋktha-i? 25Ko tȧy tȧŋ nə wur tə kəkəli-e? Wuni ɔ lopra ɛlopra ɛnɔfthɔ-i? Aŋfəm aŋa wɔŋ ɛlopra ɛnɔfthɔ yi aŋa mə di ɛdi ɛtȧk-e aŋ yi ka ȧtama ta aŋbȧy. 26Ko tȧy tȧŋ nə wur tə kəkəli-e? Unabi-i? Yao, i kanɛ nu, uthasi unabi. 27Kɔnɔ ɔwe ta ɔwe a gbal kəpa,
I som ɔsom kȧmi rodi ka mu, ɔwe mə bɛmpa aroŋ da mu rodi ka mu. 28I kanɛ nu, kətɔŋ ka ŋaŋ aŋa afəm abom aŋ kom-e, ubana uthasi Yɔn ɔ yi hɛ; kɛrɛ kɔn ɔwe yi ulɔl thɔŋ bɛ ka rȧbȧy ra Kuru-e, ɔ yi ubana uthasi kɔ. 29Aŋfəm bɛ yi aŋthoŋkla ɛfȧk maŋ təl-e, aŋ wosa ta mȧlompi ma Kuru, maŋ po malanɛ ȧŋbaftisəm ŋa Yɔn. 30Kɛrɛ aŋFarisi yi aŋtara aŋthɔ aŋ pɛnsa tə kəwop ȧmȧŋ ŋa Kuru ta ȧte ŋaŋ, maŋ kasi ȧŋbaftisəm ŋa Yɔn. 31ƆMariki ɔ pa, Ko rəka raŋ mə i lomɔ aŋfəm ŋa rȧkomra are, mba, ko rəka raŋ mə aŋ bȧlȧnɛ-e? 32Aŋ yi mɔ afɛth aŋa yirȧ ka ɔdɛr ɔthila, aŋ mutianɛ, kaŋ pa, Sə po fɛŋa nu atuleŋ, nə thɔmɔ hɛ; sə po bok, nə kulɔ hɛ. 33Yɔn ɔbaptist ɔ der ɔ di hɛ kəbo, ɔ mun hɛ məber, ka nə pa, Ɔ ba ukərəfi. 34ƆWan ka wuni ɔ der yi kədi dɛ yi kəmunȧŋ, ɔwa nə pa, Kəli, wuni wɔnthi wɔŋ, ɔ ba kəmun kəbana, ɔwa ɔ yi uyathki ka aŋthoŋkla ɛfȧk yi aŋfəm ŋa ɛhakɛ! 35Kɛrɛ kətemp kə sɔthɔ məmari ka aŋwuth ŋɔŋ bɛ.
36Ka ukin ka aŋFarisi ɔ muti Yisɔs tə kədi yi kɔnɔ, kɔ wɔŋ ka ȧŋseth ŋa ɔFaresi, ɔ yirȧ tə kədi. 37Ɔwa kəla, wuni bom ɔ yi ka kȧpet, ɔ yi wuni ləs. Ma ɔ tȧrȧ kəpa Yisɔs ɔ yirȧ tə kədi ka ȧŋseth ŋa ɔFarisi-e, ɔ kȧrȧ ȧbithərȧ ŋȧ məsopa məfɔlfɔl, 38kɔ təmȧ rodarəŋ ka ȧtȧtək tɔŋ, ɔ bok, kɔ təp kəbɔyis ȧtȧtək tɔŋ yi ȧmȧntər mɔŋ, ɔ nasi ti yi aŋfon ŋa rȧbomp rɔŋ, ɔ muməl ȧtȧtək tɔŋ, kɔ sop ti masopa məfɔlfɔl ame. 39Ma ɔFaresi ɔwe muti kɔ ɔ nənk ti-e, ɔ fɔfnɛ ka ȧŋmerȧ ŋɔŋ kəpa, Bepi ɔwuni ɔwe ɔ yi unabi-e, ɔ tə tȧrȧ naŋ ko wuni ɔwuni bom ɔwe ɔ yi ɔwe gboŋ kɔ; ɔ tə tȧrȧ kəpa ɔ yi wuni ka ɛhakɛ. 40Ka Yisɔsȧŋ ɔ wosȧnɛ kɔ ɔ pa, Saymɔn, i ba tȧy tə kəkanɛ mu. Kɔ pa, Pa, fɔf gbo. 41Afəm ŋarəŋ aŋ ba təbey ka wuni lɔm; ɔkin ɔ ba kəram kɔ ɛpɔn tɔfɔt tȧmthədɛrəŋ, ɔwa ɔlɔm ɔ ba kəram kɔ apɔn ŋin ɛsiliŋ tɔfɔt tamath. 42Maŋ te ba rəka tə kərȧm-e, ɔ tera ŋa ŋarəŋȧŋ. Kanɛ mi ureke ka ŋa ŋarəŋȧŋ mə tha bɔthər kɔ-e? 43Ka Saymɔn ɔ lasi ɔ pa, I nanɛ kɔn ɔwe ɔ tha tera ɔgbthi. Ka Yisɔs ɔ pa, Mə po gbək ɔlompi. 44kɔ fəlɛ ka ɔya ɔ pa, Saymɔn, mə nənk ɔya ɔwe-i? I wɔŋ ka ȧŋseth a mu; mə sɔŋ hɛ mi mȧnt ta ȧtȧtək ta mi, kɛrɛ kɔnɔ ɔ po bɔyis ȧtȧtək ta mi yi mantər, ɔ nasi ti yi aŋfon ŋɔŋ. 45Mə muməl hɛ mi, kɛrɛ kɔnɔ kȧbi ma i wɔŋ nɔ-əŋ, ɔ tey hɛ kəmuməl ȧtȧtək ta mi. 46Mə sop hɛ rȧbomp ra mi mȧro, kɛrɛ ɔya ɔwe ɔ po sop ȧtȧtək ta mi yi məsopa məfɔlfɔl. 47Tiyȧŋ i kanɛ mu, ɛhakɛ yɔŋ ɛyɛ yi ɛgbathi, a po kɔ yi tera, kotȧy-e ɔ bɔthər ɔbana; kɛrɛ ɔwe a tera ɔthan, kɔnɔ bɔthər ɔthan. 48kɔ pa ka ɔya, A tera mu ɛhakɛ ɛ mu. 49Ka ŋaŋ aŋa yirȧ ka kadi yi kɔnɔ aŋ təp kəpa ka ɛmerȧ yaŋ, Kanɛ yi ɔwe ɔwe mə tera ɛhakɛ sɔ-e? 50Ɔwa ɔ pa ka ɔya, Kɔnɛ yi məthɔfəl; kȧlanɛ ka mu kə po mu kisis.
Currently Selected:
Luk 7: TMNNT
Highlight
Share
Copy
Want to have your highlights saved across all your devices? Sign up or sign in
Themne New Testament © The Bible Society of Sierra Leone, 2009.
