Mathiu 22
22
1Ka Yisɔsȧŋ ɔ wosa, ɔ fɔf ro ŋaŋ rǝ ɛlomɔ, kǝpa ye, 2Rȧbȧy ra ro riyana rǝ yi mɔ ubȧy ulɔm ɔwe bɛmpa met ma kanantǝ ta ɔwan kɔŋ uruni, 3kɔ som ɛbɔy yɔŋ tǝ kǝtela ŋaŋ aŋa a muti ka amet ma kanantǝ. Kɛrɛ aŋ selɔ hɛ der. 4kɔ kȧl som ɛbɔy alɔm, ɔ pa, Kanɛ ŋaŋ aŋa a muti kǝpa ye, Kǝla, i po bɛnɛnɛ aŋfantha a mi. A po fai tana ta mi yi ɛsɛm ɛ mi ɛboy, ɔwa ɛyɛt bɛ ɛ po bɛnɛnɛ. Der nu ka amet ma kanantǝ. 5Kɛrɛ aŋ sai ti, aŋ kɔnɛ ka ȧtȧy taŋ, ukin ka akɔr kɔŋ, ulɔm ka mȧsǝkinɛ mɔŋ. 6Ɔwa aŋa tia-e, aŋ lɛsa ɛbɔy yɔŋ, kaŋ sambos ŋa, aŋ difǝth ŋa. 7Ma ɔbȧy ɔ tǝl ti-e, ɔ bansȧ, ɔ somra asǝfȧ tɔŋ, kɔ dim aŋfǝm aŋa difǝth ɛbɔy yɔŋ, kɔ thɔi kȧpet ka ŋaŋ. 8Kǝdarǝŋ kati ɔ pa ka ɛbɔy yɔŋ. A po bɛnɛnɛ aŋfantha ta kanantǝ, kɛrɛ aŋa a muti-e, aŋ yi hɛ amari ti. 9Tiyȧŋ kɔ nu ka asoŋ tǝsakanɛ kȧmȧ nǝ muti ŋaŋ bɛ aŋa mǝ nǝ bǝp ri ka amet ma kanantǝ. 10Ɛbɔy ŋati aŋ kɔnɛ ka asoŋ tǝsakanɛ, kaŋ thoŋkla aŋa aŋ bǝp ri bɛ, aŋlǝs-o, aŋfinɔ-o; ka ȧŋseth ro amet ma kanantǝ mǝ yi aŋ la yi afǝm. 11Ma ɔbȧy ɔ wɔŋ tǝ kǝkǝli aŋa a muti-e, ɔ nənk ri wuni ɔwe te wɔŋ ruma ra kanantǝ. 12kɔ pa ro ŋɔŋ, Yathki, kɔyɛŋ mǝ mǝ wɔŋ nɔ, mǝ te wɔŋ ruma ra kȧnȧntȧ-e? kɔ taŋk thǝm. 13Ka ɔbȧy ɔ pa ka ɛbɔy yɔŋ, Sek kɔ nu mȧta yi ȧtȧtək, kȧmȧ nǝ fitha kɔ rokaŋ ka ȧŋsum, ro kǝkulɔ yi kǝŋȧkŋȧk ɛsek kǝ yi. 14kotȧy-e a muti agbȧthi kɛrɛ a thith athȧn.
15Ka aŋFarisi aŋ kɔnɛ aŋ nǝŋkanɛ to mǝ aŋ gbǝli sapǝs kɔ ka kafɔf kɔŋ. 16kaŋ som aŋkarande ŋaŋ yi aŋHerodian ro ŋɔŋ, aŋ pa, Karmɔkɔ sǝ tȧrȧ kǝpa mǝ yi utǝteŋ, ɔwa mǝ thǝksa aroŋ da Kuru tǝteŋ. Mǝ ba hɛ agbȧy kotȧy-e mǝ kǝli hɛ ȧder ra wuni. 17Tiyȧŋ kanɛ su ba ȧte mǝ nanɛ. Pǝ yi ɔlompi tǝ kǝsɔŋ ɛfȧk ka Sisar-i, thalɔm pǝ lomp hɛ ti-i? 18Kɛrɛ Yisɔsȧŋ ɔ nənk mȧlǝs maŋ, kɔ pa, kɔyɛŋ mǝ nǝ gbɔns mi naŋ amunafaki-i? 19Tɔri mi nu aŋkala ŋa ɛfȧk. Kaŋ kȧrȧ kɔ akɔpǝr ŋin. 20kɔ pa ro ŋaŋ, Kanɛ ba mȧbȧlȧnɛ yi mȧgbal ame-e? 21kaŋ pa ro ŋɔŋ, Sisarȧŋ. Kɔ pa ro ŋaŋ, Ɔwa sɔŋ nu Sisarȧŋ mȧtȧy ma Sisar, ɔwa sɔŋ nu Kuru mȧtȧy ma Kuru. 22Maŋ tǝl ȧte-e, aŋ kabanɛ, kaŋ tey kɔ, aŋ kɔnɛ.
23Ka ȧŋrey ŋati gbeŋ, aŋSadusi aŋa pa kǝyokanɛ kǝ yi hɛ, aŋ der, kaŋ pa ro ŋɔŋ, 24Karmɔkɔ, Mosis ɔ pa, Bepi wuni ɔ fi ɔ ba hɛ awuth-e, ɔwɔnt kɔŋ uruni ɔ ba tǝ kǝnantǝ ɔrani kɔŋ kȧmȧ ɔ komǝs awuth ta ɔwɔnt kɔŋ. 25Ɔwa sǝ sa ba awɔnt aruni tamthǝdɛrǝŋ. Ka ɔtɔtɔkɔ ma ɔ nȧntȧ-e, ɔ fi, ɔwa ma ɔ te ba awuth-e, ɔ tey ɔrani kɔŋ ka ɔwɔnt kɔŋ. 26Ya pǝ yi sɔ ɔwe bekȧ ŋarǝŋ, yi ɔwe bekȧ asas, haŋ kǝbek ka ɔwe bekȧ tamthǝdɛrǝŋ. 27Ɔwa ɔbɛra ɔ fi kǝdarǝŋ ka ŋaŋ bɛ. 28Tiyȧŋ, ka kȧyokanɛ, ureke kǝtɔŋ ka aŋtamthǝdɛrǝŋ mǝ ba ɔbɛra-e, ma pǝ yi ŋaŋ bɛ aŋ la po ba kɔ-e? 29Kɛrɛ Yisɔsȧŋ ɔ wosa ɔ pa ro ŋaŋ, Nǝ yɛthȧ ma nǝ te tȧrȧ mȧgbal thalɔm aŋfɔsɔ ŋa Kuru. 30kotȧy-e ka kȧyokanɛ aŋ nȧntȧ hɛ, ɔwa a sɔŋ hɛ kǝnantǝ, kɛrɛ aŋ yi gbo mɔ aŋmȧleka ro riyana. 31Kɛrɛ ta kȧyokanɛ ka aŋfi-e, nǝ karaŋ hɛ ȧte Kuru ɔ pa ro nu mǝ ɔ pa, 32Minɛ yi ɔKuru ka Ebraham, ɔKuru ka Aysak yi ɔKuru ka Yekɔb-i? Kuruȧŋ ɔ yi hɛ ɔKuru ka aŋfi kɛrɛ ɔka aŋkǝli. 33Ma ȧsuniya tǝ tǝl ȧte-e, aŋ kabanɛ ta kathǝksa kɔŋ.
34Ma aŋFarisi aŋ tǝl kǝpa Yisɔsȧŋ ɔ po yɔ aŋSadusi aŋ taŋk-e, aŋ thoŋklanɛ dɛr rɔkin. 35Ka ukin ka ŋaŋ ɔwe tȧrȧ aŋthɔ ɔ yif kɔ ȧyif kȧmȧ ɔ mɛm kɔ, ɔ pa, 36Karmɔkɔ, areke yi aŋyamari ȧbana thɔŋ bɛ ka aŋthɔ-e? 37Ka Yisɔsȧŋ ɔ pa ro ŋɔŋ, Mǝ yi tǝ kǝbɔthǝr ɔMarki ɔKuru ka mu yi ȧŋmerȧ a mu bɛ, dɛ yi aŋesǝm a mu bɛ, dɛ yi ananɛ a mu bɛ. 38Aŋe, ŋǝ yi aŋyamari ȧbana ȧtɔtɔkɔ ŋa aŋthɔ. 39Ɔwa, aŋa bekȧ yɛrǝŋ-e aŋ bȧlȧnɛ ŋi, ŋi aŋe, Mǝ yi tǝ kǝbɔthǝr ɔfatanɛ ka mu mɔ mǝ mǝ bɔthǝrnɛ. 40Ka ɛyamari yɛrǝŋ ɛye rǝ aŋthɔ yi ȧsim ta aŋnabi bɛ tǝ gbasa.
41Ma aŋFarisi aŋ po thoŋklanɛ dɛr rɔkin-e, Yisɔs ɔ yif ŋa, 42kɔ pa, To nǝ nanɛ ta Kraist-e? Wan uruni ka kanɛ-e? kaŋ pa ro ŋɔŋ, Ɔwan ka Debid. 43kɔ pa ro ŋaŋ, To som Debidȧŋ, ka aŋfɔsɔ ŋa ɔYina ɔ tela kɔ Mariki ma ɔ pa,
44ƆMariki ɔ pa ka ɔmarki kȧmi,
Yirȧ ka kȧta kȧmi kǝdiyɔ
Haŋ i bot aŋtheranɛ a mu roratha ka ȧtȧtək ta mu-e? 45Bepi Debidȧŋ ɔ bont kɔ Mariki, to ɔ gbǝli yi ɔwan kɔŋ-e? 46Ɔwa wuni o wuni ɔ gbǝli hɛ sɔ gbakia kɔ dim din. Ɔwa kǝtǝp ka ȧŋrey ŋati wuni o wuni ɔ mintha hɛ sɔ yif kɔ ȧyif o yif.
Currently Selected:
Mathiu 22: TMNNT
Highlight
Share
Copy
Want to have your highlights saved across all your devices? Sign up or sign in
Themne New Testament © The Bible Society of Sierra Leone, 2009.
