Mathiu 23
23
1Ka Yisɔsȧŋ ɔ fɔfȧnɛ ȧsuniya yi aŋkarande ŋɔŋ, 2kǝpa, Aŋkarmɔkɔ yi aŋFarisi aŋ yirȧ ka ɔyira wa Mosis. 3Tiyȧŋ mȧtȧy bɛ ama aŋ yamari nu-e, yɔ, ɔwa wop ma nu. Kɛrɛ te nu tansanɛ mȧyɔs maŋ, kotȧy-e aŋ pa kɛrɛ aŋ yɔ hɛ. 4Aŋ sek ɛlik ɛlel ɛtuy gbanɛ, aŋ bot yi ka tȧkǝnkla ta aŋfǝm, kɛrɛ ŋaŋ ŋanɛ aŋ yema hɛ borȧ yi hali yi ȧsel ŋaŋ ŋin. 5Mȧyɔs maŋ bɛ aŋ yɔ ma kȧmȧ afǝm aŋ nənk ma. Aŋ bondǝs mȧbani maŋ, aŋ bondǝs ɛlɛmpɛ ya ȧsuma taŋ. 6Aŋ bɔthǝr ɔdɛr ɔtɔtɔkɔ ka ɛmet, dɛ yi ɔyira ɔfinɔ ka ɛseth ɛgbanɛ, 7yi ɛkori ka ɔdɛr ɔthila dɛ yi kȧmȧ aŋfǝm aŋ bont ŋa Karmɔkɔ. 8Te nu selɔ a bont nu Karmɔkɔ, kotȧy-e ukin kɔnɔ yi ɔkarmɔkɔ ka nu, kɔnɔ yi Kraistȧŋ. Na bɛ nǝ yi awɔnt. 9Te bont wuni o wuni nɔru ukas ka nu, kotȧy-e ukin kɔnɔ yi ɔKas ka nu, kɔnɔ yi ro riyana. 10Te selɔ a bont nu amarki kotȧy-e ukin kɔnɔ yi ɔMarki ka nu, kɔnɔ yi Kraistȧŋ. 11Ɔwe yi ubana thɔŋ bɛ kǝtɔŋ ka nu-e, ɔ tǝ yi ȧbɔy a nu. 12Ɔwa wuni o wuni ɔwe mǝ ŋatanɛ, a tǝ thora kɔ, ɔwa wuni o wuni ɔwe mǝ thoranɛ, a tǝ ŋata kɔ.
13Kɛrɛ mɔnɛ ro nu naŋ akarmɔkɔ yi aFaresi, amunafaki! Ȧtesoma-e nǝ kantha rȧbȧy ra ro riyana ka aŋfǝm. Kotȧy-e naŋ nǝ wɔŋ hɛ, ɔwa nǝ selɔ hɛ ŋaŋ aŋa yema tǝ kǝwɔŋ, aŋ wɔŋ. 14Mɔnɛ ro nu naŋ akarmɔkɔ yi aFaresi, amunafaki! Ȧtesoma-e nǝ lǝsǝr ɛseth ya ȧŋbora, ɔwa rǝ kǝkɔnthɔsnɛ nǝ ramnɛ kǝramnɛ kǝbɔli. Tiyȧŋ na mǝ tha sɔthɔ mǝtheri mǝlel.
15Mɔnɛ ro nu naŋ akarmɔkɔ yi aFaresi, amunafaki! Ȧtesoma-e nǝ kɔth kɔth ro baŋ yi ro gbaŋ tǝ kǝlȧfthi ȧŋmerȧ ŋa wuni kin. Ɔwa ma ɔ po lȧfthɛ-e, nǝ sǝki kɔ wan ka yahanama marǝŋ marǝŋ pǝthasi nu. 16Mɔnɛ ro nu naŋ atǝmȧ kǝdi aŋfith! Nǝ pa, Wuni o wuni ɔwe gbiŋ ka ȧŋseth ŋa Kuru-e, tȧy thahɔ, kɛrɛ wuni o wuni ɔwe mǝ gbiŋ ka mabɔŋɔ ma ȧŋseth ŋa Kuru-e, ɔ sekǝrnɛ. 17Na apǝŋk dɛ yi afith. Areke thas-e, mabɔŋɔ thalɔm ȧŋseth ŋa Kuru aŋa sǝmǝs mȧbɔŋɔ-e? 18Ɔwa nǝ pa sɔ, Wuni o wuni ɔwe mǝ gbiŋ ka ȧŋbɛsɛ, tȧy thahɔ, kɛrɛ wuni o wuni ɔwe mǝ gbiŋ ka ȧŋboya rokɔm kati-e, ɔ sekǝrnɛ. 19Na apǝŋk dɛ yi afith. Areke thas-e, ȧŋboya thalɔm ȧŋbɛsɛ aŋa sǝmǝs ȧŋboya-e? 20Tiyȧŋ, ɔwe mǝ gbiŋ ka ȧŋbɛsɛ-e, ɔ gbiŋ ka ȧŋbɛsɛ dɛ yi ka ɛyɛt bɛ ɛyɛ yi rokɔm kati. 21Ɔwa ɔwe mǝ gbiŋ ka ȧŋseth ŋa Kuru-e, ɔ gbiŋ ka ȧŋseth dɛ yi ka kɔnɔ ɔwe yirȧ ri. 22Ɔwa ɔwe mǝ gbiŋ ka ȧriyana-e, ɔ gbiŋ ka kawaŋ ka rȧbȧy ra Kuru, yi ka kɔnɔ ɔwe yirȧ ri.
23Mɔnɛ ro nu, naŋ akarmɔkɔ yi aFaresi, amunafaki! Pǝkasifɛ nǝ sɔŋ ɛyaka ya ɛsoro yi anisi, dɛ yi kamin, kɛrɛ nǝ tey kǝyɔ mȧtȧy mǝbana ma aŋthɔ, pǝ yi mɔ-e kǝgbǝk ɛpa ɔlompi, kǝba ȧney dɛ yi kǝlanɛ. Nǝ yi tǝ kǝyɔ ȧte, ɔwa pǝ mar hɛ nǝ tey talɔm. 24Naŋ atǝmȧ kǝdi afith, nǝ sais mȧnt tǝ kǝwura amǝnthǝl, kɛrɛ nǝ mer ȧyɔkmɛ.
25Mɔnɛ ro nu, naŋ akarmɔkɔ yi aFaresi, amunafaki! kotȧy-e nǝ yak ampɔthi yi ȧŋbɔl romuth, kɛrɛ rokor ɛ la yɛt ɛnɔy rȧ ȧfɔsɔ yi mǝfela mǝlǝs. 26Munɔ ɔFaresi ufith, mɔtha gbǝrans rokor ka ampɔthi yi ȧŋbɔl, kȧmȧ kamuth kati sɔ kǝ yi kǝgbǝraŋ. 27Mɔnɛ ro nu, naŋ akarmɔkɔ yi aFaresi, amunafaki! Ȧtesoma-e nǝ bȧlȧnɛ mɔ tǝboma tǝfera ȧte tɔrinɛ ɔfinɔ romuth, kɛrɛ rokor tǝ la tǝbanth ta afǝm afi, yi mǝnɔkɔ bɛ. 28Ya pǝ yi sɔ mɔ naŋ, nǝ tɔrinɛ nɔru kǝyi na alompi ka aŋfǝm, kɛrɛ rokor nǝ la rǝmunafaki yi mǝkǝnȧ.
29Mɔnɛ ro nu, naŋ akarmɔkɔ yi aFaresi, amunafaki! Pǝkasifɛ nǝ bɛs taboma ta aŋnabi, ɔwa nǝ yesi tapali ta aŋlompi, 30nǝ pa, Bepi sǝ yi naŋ thǝpaŋ ka aŋyamana ŋa aŋkas a su-e, sǝ gbǝli hɛ naŋ kasa yi ŋaŋ tǝ kǝloŋ mȧtir ma aŋnabi. 31Tiyȧŋ nǝ gbakɛnɛ kǝpa nǝ yi awuth ŋa ŋaŋ aŋa difǝth Aŋnȧbi. 32Tiyȧŋ, lasǝr nu aŋthuntha ŋa aŋkas a nu. 33Naŋ ɛbok, naŋ rǝkomra ra ɛgbɔrɔ, to mǝ nǝ gbǝli kisi ka aŋthoŋka ŋa ro yahanama-e? 34Te ba ti, kǝla, i somra nu anȧbi, afǝm atempi yi akarmɔkɔ; alɔm ŋati nǝ tǝ dif, nǝ tǝ tȧŋ ŋa rǝ tǝnt tǝpǝŋkinɛ, alɔm nǝ tǝ sapa ŋa nǝkɛt ka ɛseth ɛ nu ɛgbanɛ, nǝ tǝ bȧl ŋa kǝwur ka kǝpet kin kǝkɔ ka kǝlɔm, 35kȧmȧ a reŋ nu mathɛkɛ ma mȧtir mǝpaŋi tȧy bɛ ama a loŋ ka ȧŋthɔf kǝtǝp ka mȧtir ma Ebɛl ɔlompi haŋ ka mȧtir ma Sakaraya ɔwan ka Barakaya ɔwe nǝ dif kǝtɔŋ ka ȧŋseth ŋa Kuru yi ȧŋbɛsɛ. 36Tɛntɛnɛ i kanɛ nu, mȧtȧy ame bɛ mǝ ba tǝ kǝder ka rȧkomra are.
37O Yerusalɛm, Yerusalɛm, munɔ mǝ difǝth aŋnabi, ɔwa mǝ lǝmǝs ŋa mǝsar aŋa a som ro mu, amɔlɔ ɛlɔkɔ naŋ i fela tǝ kǝthoŋkla aŋwuth a mu dɛr rɔkin, mɔ kȧbɛt mɔ thonkla aŋwuth ŋɔŋ ka ɛkufna yɔŋ ratha, kɛrɛ mǝ selɔ hɛ. 38Kǝla, a tey ȧŋseth a mu yeŋ. 39Tiyȧŋ i kanɛ nu, nǝ ba hɛ kǝnǝŋk mi kǝtǝp ka-ake haŋ nǝ pa, Uruba wɔŋ ɔwe mǝ der ka ȧŋes ŋa ɔMarki.
Currently Selected:
Mathiu 23: TMNNT
Highlight
Share
Copy
Want to have your highlights saved across all your devices? Sign up or sign in
Themne New Testament © The Bible Society of Sierra Leone, 2009.
