NITRITI 17
17
Nibon midut sunat ndo tut Allah de nipreu eisi
1Tirigi Abram de njap ug ei ari bingwam ningot muhwindatai ba, muhwindatai lene tuhan tau kep noni bipai bak “Dani ne Allah Di Sindem Bibor ri. Ma abit dihyet ba, ayai mun bit leu dingon kanti kikau cem. 2Midibon gi preu bit nani. Midibindei ba, ade nintun him yamti di bram yam nya imang bibor.” 3Lene Abram kuk no biba ningwak bikik dihyei leu api Allah pai binoni, 4“Dipreu ei bit na bipia mporo midibindei ba, anok pung di mben imang bibor intun him. 5#Rm. 4:17 Gima rino tungwatu nya mijem anyeng Abram bu bi lewo anyeng nijep rino Abraham. 6Midibindei ba, ade nintun him yamti di bram yam nya imangti ningot ndig apino ibihi igyai inyeng nibou ndig. Midibindei ba, anok pung di mben imang bibor intun him.
7 #
Luk. 1:55
Dani midiyai bipek kep gi preu po di dipreu ei bit nani kin ade nintun him yamti di bram yam nya cem ba, gima ne gi preu di ngkiem bibor bijo ninno bijo kikau ri. Midinok ade Allah kin yo di intun nani him cem ide Allah.
8 #
Kis. 7:5
Mbro nok gino abong angkiaisi ei minu Kanaan dini lo, mporo midiyai minu dini leu nisurti-nipekti hagom binani kin ade nintun him yamti di bram yam nya bijo ninno bijo kikau bidinok ide Allah ri.”
9Lene Allah pai bak Abraham bu “Suar nani kin ade nintun him yamti di bram yam nya jahagom jikrau kep gi preu dini kikau. 10#Kis. 7:8; Rm. 4:11 Suar nani kin ade nintun him yamti di pinai nya di bram yam nya yahagom igyai nibon midut sunat. 11Suar jahagom jiyai nibon midut sunat nok mun di bindo tut Ditde gi preu di dipreu ei bit na. 12Hon kep ammani kui lene suar jipmot bat nya di ide njap ug ei njap muhwindaningai igyai nibon midut sunat ba, bitut jenti kin jide awak ei jide ig bei nsi kin awak di jiba mitiei wim yok leu ngkiai nya cem jahagom. Lewo nibon midut sunat ndo tut Ditde gi preu di dipreu ei bit je. 13Suar bikwop tungwagom-gom yai nibon midut sunat nok bindo ei jingutti di bindo bipia Ditde gi preu bit jeni dima jo kikau. 14Bikwop pinai tou rino yai nibon midut sunat bi lene noni minok Ditde limwa bu bi lewo noni krau kep gi preu dima bi.”
Allah pai sut Ishak nisrekti bak Abraham
15Lene Allah pai bak Abraham bu “Ma ajem atnem ninyeng Sarai bu au. Hon kep ammani kui lene ninyeng rino Sara. 16Midinjei mun di kei bak noni leu api dibindei ba, noni migwam tut apmot gom bina. Midinjei mun di kei bak noni ba, noni minok pung nipmem di mben imang bibor intun him apino nide nintun him yamti di bram yam nya ibihi igyai inyeng nibou ndig.”
17Lene Abraham kuk no biba ningwak bikik dihyei leu api pa tut tirigi kan “Bit bon no di nide njap ug ei ari bingwam sratus gom yai nimunggwom kan bi. Bit bon Sara di nide njap ug ei ari bingwam ningot muhwindatai yai nimunggwom kan bi.” 18Gima rino noni hig ser Allah “Nggon rino asindui sut Ismael ba, nonti ba nokep mun di apreu ei bit da bi i?”
19Noro Allah srep “Atnem Sara migwam tut apmot bina leu api ma ajem ninyeng Ishak. Midikrau kep Ditde gi preu ei bit na dima tug hon nide nintun him yamti di bram yam nya bijo ninno bijo kikau. Nipreu eisi dima ug hon nohonti bi sren. 20Dimiap ahyet tirigi ahara Da tut Ismael tu. Mporo midinjei mun di kei bak noni leu api noni bon nimunggwom bat nya ba, nide nintun him yamti di bram yam nya idigek kep mpia. Noni minok pung di minir nya ibou simnaibrimigcan intun him. Midibindei ba, nide mben idigek kep mpia. 21Noro gi po dipreu ei bit na pima mitug hon apmot Ishak ri. Sara migwam tut noni ei ari bingwam gi dip noyam kin bed dini.” 22Tirigi Allah kes nihyet hon tu lene Noni kes Abraham bimbut leu.
23Njap gom ndia lene Abraham ba sunat nipmot Ismael kin pinai nindigsi nya bitut nide awak nya ei nide ig bei nsi kin nide awak di noni ba mitiei biwim yok yahagom. 24Tirigi Abraham de njap ug ei ari bingwam ningot muhwindatai ba, muhwindatai lene noni yai nibon midut sunat. 25Ba, tirigi Ismael de njap ug ei ari bingwam simnaibrimigningai lene noni cem yai nibon midut sunat. 26Ei njap gom ndia lene yahacem igyai nibon midut sunat. 27Ba, Abraham de awak pinai nya yahagom igyai nibon midut sunat bit noni.
Currently Selected:
NITRITI 17: HAD
Highlight
Share
Copy
Want to have your highlights saved across all your devices? Sign up or sign in
