NITRITI 18
18
Allah preu kep Abraham tut munggwom pinai gom
1Lene tuhan ndo Nonti bak Abraham tirigi noni bong dideu biei pigig nghousi ei Mamre nok mpia di tungwatu nya ikuk yok bak ide kwar nya eisi. Lene Abraham gwam ser dimbou heisi ei prak meng behei mem mpia huk pijum di wam bibor. 2#Ibr. 13:2 Tirigi noni kon nibou lene ngat lo, ibou ningai itau kwei ei nide biyati. Hammi tirigi noni ngat yok rino dor um yok ba, kuk no biba ningwak bikik dihyei. 3Lene pai biyok “Andigpoi jen, nna ba jikwei cem kep da ei prak meng behei leu api midimpu je. 4Nna ba jisindui sut da biditau minyei mem gima jibipiap jimig leu api ma jikwei gwam kep jinghuisi ei biei nghousi dini. 5Midingei njita gom-gom mem jiyem kep jinggum nipou tirigi jimbut kikau bigyo. Lewo jindo tut gi jibou cut bida tug hon gi jikwei cem da.”
Lene ibuhup “Nipai sigyo nice tut ahyet dima.”
6Lene Abraham bipbur bingkwei hanyen ug ei prak meng nsi bipai bak Sara “Abipbur ba, ayai ade tepun di kei bibor kei kron gom ba, abikang roti nindak poi haninyai.” 7Lene noni bipbur buug ngat nide sapi nya ba, mig sapi pmot di nimmau ndok ningut gom bijem kwei bak nide awak ba, awak dima bipbur ba, bui bidigo mikwau haninyai. 8Gima ngwig lene Abraham ug yai sapi do ngei di tungwatu nya idut kin gi hi di ntan nidip kin mikwau di ibam pima bingei njita tut yo di ikwei cem kep noni. Lene Abraham nonti kwas njita tut yok tirigi igwam ei biei nghousi dima.
9Lene ihig ser Abraham “Atnem Sara no hantou i?”
Leu api noni buhup “Sara no gwam prak meng nsi.”
10 #
Rm. 9:9
Lene tungwagom leu ikieti simbot dat bipai “Bed muhwindatai bu#18:10: Nipas kep Bed muhwindatai bu cem kei lene nipas kep Ari bingwam gi nidipti bu ei bed di noyam kin bed dini cem kei. lene midikwei ngat je hanyen bu. Mpe dima ne atnem Sara migwam tut nipmot.”
Lene Sara ya ei ibou ningai pima inghim nyahan ei prak meng nsi dima nimbou bintu kep no dima nihyet. 11Mpe dima lene Abraham kin Sara yahacem ikoi-ka leu su ba, Sara ningkek kan mun bu bi. 12#1Ptr. 3:6 Gima rino Sara pa tut no dima nipaisi ei ningonti bikan “Sinok sindig-ndau leu su ba, sikoi-ka bibor tu. Notou misiyem njita tut sijjep bu i? Noni cem andig-ndau leu su.”
13Lene tuhan hig ser Abraham “Nggon rino Sara pa tut dipaisi bikan bipia notou noni migwam tut nimunggwom tirigi wer sindig-ndau su i? 14#Luk. 1:37 Mun mindei rino bit bon tuhan yai kan bi i? Bed muhwindatai bu lene midikwei ngat je hanyen bu ba, ei mpe dima lene Sara migwam tut nipmot bit leu nok gi dipai bina tu.”
15Noro Sara om ser bipai “Dipa tut ahyet pima bi.” Om ser nok lewo ningwes mien tut.
Lene tuhan buhup “Dikan tut bipia apa tut dihyet tu.”
Abraham ya hacan mem mben Sodom
16Leu api ibou ningai pima imbut biyuug ei nipieti gom bicap ser Sodom ba, Abraham ceu yok. 17Lene tuhan kan “Dem mem gima siku singon kanti bijo nding leu Abraham bi. 18Nide nintun him yamti di bram yam nya mporo midigek kep mpia apino inok mben di sindem bibor bi e? Mben dihyeisi dini hagom mitug ndei mun di kei leu Dani#18:18: Nipas kep mitug ndei mun di kei leu Dani: Angig ayai kep Kej. 12:3. tug hon noni bi e? 19Sidimig noni leu binhyepo noni micuk nimunggwom bat nya kin nide nintun him yamti di bram yam nya leu binhyepo ibit sihyet ba, igyai mun di igbit cem ingon sren cem. Gino igyai gima hagom nok lene misiyai bit leu nok gi sipreu ei mem noniti pima ri.”
20Lene tuhan pai bak Abraham “Tungwatu nya ipai kep mben Sodom kin Gomora inghapti ba, ningat ne ibon kep sisar nindig bibor. 21Suar da duug bisis ser yok leu binhyepo dikan tut bipia inghapti di tibim ei ditingou nsi dima igbit rin e, he igbit rin bi e?”
22Lene ibou can ikes tuhan kin Abraham leu lene yuug kikau ndam Sodom lo, tuhan ya niyati bit Abraham. 23Lene Abraham brim ningkek kep tuhan bihig ser Noni “Angon kanti ma acok tut yo di ingon ngun kin yo di ingon mui yahagom srig yamti nok gima e? 24Gino yo di ingon ngun nya ibou ningot muhwi ingat rin ei minu ndig dima lene ma acok tut yahagom ug rin e? Aluei angonti drek dip ibou ningot muhwi leu binhyepo ingwes ngun bi e? 25Dem mem gima acok tut yo di ingon ngun kin yo di ingon mui yahagom srig yamti bi. Gima igbit bi! Bit bon ayai nok gima bi! Gino ayai nok lene yo di ingon ngun nya mitug ndei hukum noyam kin yo di ingon mui nya lene gini dem tut bi. Suar no di nok nikei mem mpia-bbed him kin dihyeisi dini ba ningon sren biyai nibou tut.”
26Lene tuhan buhup “Dwai. Gino dingat yo di ingon ngun nya ibou ningot muhwi bou diyai him lene midiluei dingonti tut minu ndig dima tut yok leu api ingwes ngun.”
27Lene Abraham pai bu “Tuhan e, mbro nok gino dibrim dingkek kep Na mbigom kin bu lo, ma aom angon tut da. Dani ne tungwatu dihyeisi dini ba, dem mem gima dahap diji bi. 28Mpaba tungwatu di ingon ngun nya imangti ug ei ningot muhwi ingat rin ei minu ndig dima bi noro ibou ningot bitai ba, muhwi he lene ma acok tut yahagom drek dip gi cut leu ibou ningot muhwi ug ei ibou ningot bitai ba, muhwi dima ug rin e?”
Lene tuhan buhup “Dwai. Gino dingat yo di ingon ngun nya ibou ningot bitai ba, muhwi bou diyai him lene midicok tut minu ndig dima bi.”
29Lene Abraham pai mbigom kin bu “Gino ibou ningot bitai ingat rin lene anggon ndei yo i?”
Lene tuhan buhup “Dwai. Gino ibou ningot bitai ingat rin lene midicok tut minu ndig dima bi.”
30Lene Abraham pai bu “Gino dahap diji mbigom kin bu lene ma angon sibui sut da au. Gino ibou ningot ningai ingat rin lene notou mem yo i?”
Lene tuhan buhup “Dwai. Gino ibou ningot ningai ingat rin lene midicok tut minu ndig dima bi.”
31Lene Abraham pai bu “Tuhan e, mbro nok gino dibrim dingkek kep Na mbigom kin bu lo, ma aom angon tut da. Gino ibou ningot can ingat rin lene notou mem yo i?”
Lene tuhan buhup “Dwai. Gino dingat ibou ningot can bou diyai him lene midicok tut minu ndig dima bi.”
32Lene Abraham pai bu “Mbro nok gino dahap diji mbigom kin bu lo, ma angon sibui sut da au. Gino ibou simnai he ingat rin lene notou mem yo i?”
Lene tuhan buhup “Dwai. Gino yo di ingon ngun ibou simnai he ingat rin lene midicok tut minu ndig dima bi.” 33Tirigi tuhan kes nihyet hon bimbrap bit Abraham bu bi lene Noni ug leu lene Abraham ngkwei hanyen ug ei nide prak meng nsi.
Currently Selected:
NITRITI 18: HAD
Highlight
Share
Copy
Want to have your highlights saved across all your devices? Sign up or sign in
