NITRITI 19
19
Timiei Sodom nya ide sisar
1Niabiati malaikati ibou can pima icem kep Abraham tu lene yuug ei Sodom bikrau mem mmun. Mpe dima lene Lot di gwam kui dimbou hui ei minu ndig dima ngat yok lene kiju biya um yok. Lene kuk no biba ningwak bikik dihyei, 2bipai biyok “Andigpoi jen, ma jikwei ba, yuug ei ditde ig bei nsi. Ba, jipiap jimig leu api jibong bit da. Njap di hyep bu gino jingon kanti jimbut nut bu leu api jikiju bijimbut ug.”
Noro ibuhup “Nok ug e. Asindui sut nye binibong hak ei mpia di jo bas hak ei minu ndig dini.”
3Noro Lot bidip huk yok kikau bicigit yok kui nide ig leu api ice. Lene Lot tin ei njita di mmau bikang roti nindak poi cem mem yok bigyem.
4Nipou tirigi ibong ibongti bigyo lene mben Sodom andigpoi nya kin pinai pilei nya yahagom ei minu ndig dima induk yam binggai ig tut Lot nya. 5#Hak. 19:22-24 Lene ijem Lot bihig ser noni “Yo di ikwei bong bit na ritou ug i? Ma akes yok ei nyeni ninda nsi lewo nye di pinai Sodom nya ningon pri kep yok binijou yok.”
6Gima rino Lot hei ug ei bisai binggam mbou ser yok bei ninghim. 7Lene noni cuon ser yok bipai “Disut bat jen, diba dingon gom bicuon ser je bipia ma jibon mun di kinei bibor dini au. 8Jimiap e, dibon dipmisop di igwam itta pilei ibou can. Midikes yok ei jindati ba, jijou yok bit leu jingon kanti. Noro ma jingget pinai cin di dicigit yok kui ditde ig au lewo suar dinyohou yok mungkun kei.”
9Noro mben Sodom dima imbrua ser nihyet bipai “Aya bileu! Nani ne ngkiai ba, anyeng tak kep nye bi. Aya bileu! Leu mbigom minimbuk tut na nindig bibor dor njiriek pinai cin dima.” Lene irok Lot ei itta bibisau ndam dimbou binggek. 10Noro pinai cin pima isu inda bibrim Lot hanyen kwei ei ig bei nsi binggam mbou ser yok. 11#2Raj. 6:18 Lene ibindei ba, yo di igya nisai ma kwei yahagom igyai tu ser apino bit bon ingat dimbou heisi dima nijoti bi.
Lot nang leu Sodom
12Lene yo cin pima ipai bak Lot “Gino abon apmot bat nya kin apmisop bat nya hi e, he sijjep ade nya kin agnyot bat nya hi e, he ade bat nindigsi nya hi e, yahagom ingat rin ei minu ndig dini lene suar abuwak yok ba, jinang leu minu dini. 13Lewo minicok tut minu ndig dini ningwig ug ri. Timiei minu ndig dini inghapti di kinei bibor tibim ei tuhan nitingou nsi tu ba, Noni cuk nye kwei leu binhyepo nicok tut Sodom bihigom.”
14Gima rino Lot bisau buug ngat pinai cin di igyok wa kep nipmisop bat cin lene bidip huk yok bipai “Suar jibipbur ba, jinang leu sirini lewo tuhan micok tut hagom ug ri.” Noro ikan bigya noni cat eisi he.
15Dideu njapti rino malaikati cin dima ibisau huk Lot bipai “Abipbur ba, abrim amig bitut atnem kin apmisop bat cin bijinang bihigom leu sirini leu binhyepo jimai ba, jingwig tirigi nicok tut minu ndig dini bi.” 16#2Ptr. 2:7 Noro Lot hig ningon eisi. Lene tuhan ningon nggriu sut noni apino yo cin dima ibrim noni kin nitnem kin nipmisop bat cin inda leu api yehei sut yok leu Sodom. 17Lene malaikati gom cuk yok bipai “Jinang bihigom leu minu dini leu binhyepo jingwes ngun! Jitou kep jinghim dip ba, jiya hak jiyati ei mbang briep dini au! Suar jinang kikau bijillu ug ei cet him dima leu binhyepo jimai bi!”
18Noro Lot srep bipai “Ayo! Andigpoi e, acuk nye bininang ug ei cet him dima au. 19Ampu da nindig bibor bidingwes ngun tu. Noro cet him dima ne minu ting rin ba, hukum dino akes ei Sodom dip mahatap da ei sirima ri. Apino midimai ei puig sinon nipou tirigi duug krau cet him dima bigyo. 20Angat minu mien dideu bibor dinu e? Akes da bidinang ug ei sirima leu binhyepo dingwes ngun.”
21Lene malaikati buhup “Nna ba dice tut angon kanti dima apino midicok tut minu mien dima bi. 22Abipbur haninyai ba, abrim amig lewo bit bon diyai dibou tut bigyo bibou aug krau minu dima nipou leu ug e.”
Lot ndat minu dima bipia minu mien. Gima rino tungwatu nya ijem minu dima ninyeng Zoar.
tuhan cok tut Sodom kin Gomora
23Hammi tirigi mpia pri bicom nimig rino Lot ug krau Zoar. 24#Mat. 10:15, 11:23-24; Luk. 10:12, 17:29; 2Ptr. 2:6; Yud. 7 Lene tuhan kes hum kin belerang di cig-cai kros leu mpia-bbed him kep Sodom kin Gomora. 25Ba, cok tut minu ndig dima hacem bitut mbang briep dima hagom bitut tungwatu nya kin mun di hei ei dihyeisi cem ba, hagom sar bingwig. 26#Luk. 17:32 Noro Lot nitnem kiek no bitou kep bei ninghim dip hanyen apino noni nok cou nsim.
27Njap di hyep bu rino Abraham kiju ba, bipbur buug ei mpia po ya ei tuhan Noho bei annani pima. 28Lene noni cap ser mbang briep mo jug ndam Sodom kin Gomora bingat lo, hum mmup brou noyam kin hum di yem baham kikau bikui ug ei mpia-bbed him. 29Gima rino tirigi Allah cok tut minu ndig nya ei mbang briep dima hagom bitut Lot de biyati cem bingwig lene ningon prion ser Abraham bi. Lewo Noni sindui sut Lot binang biningwes ngun leu su.
Mben Moab kin mben Amon ide pung di intun him
30Lene Lot ttin tut gima bong ei Zoar kikau. Gima rino buwak nipmisop bat cin binang ug ei cet him pima leu api ibong ei hak mihyeti gom. 31Mpe di gom lene nipmisop mighumbou pai bak nikinjoi “Arig ninghim koi su ba, minu dini kou bon pinai nya hi dima ibuwak sa nok itnem bat nya leu binhyepo siyai simunggwom bi. 32Akwei ba, sibindei arig bidut mun di pu noni nindig bibor leu api misibong gom bit noni leu binhyepo siyai simunggwom hi bintun arig him.” 33Mmun dima lene yuhug ba anggur ngei di pu tungwatu bak icig bidut leu api nipmisop mighumbou ris nicig bibong gom bit. Noro nicig kan tut tirigi cut tut nipmisopti kin nipmisop nikiju leusi cem bi lewo ba anggur ngei pu noni bibor tu.
34Njap di hyep bu lene nipmisop mighumbou pai bak nikinjoi “Himmun di aponi dibong bit arig tu! Akwei ba, ariman mmun lene ma sibindei arig bidut ba anggur ngei di pu no hanyen bu leu api abong gom bit noni. Apino sahacem sigwam tut simunggwom hi bintun arig him.” 35Mmun dima lene yuhug ba anggur ngei di pu tungwatu bak icig bidut leu api nipmisop mien ris nicig bibong gom bit. Noro nicig kan tut tirigi cut tut nipmisopti kin nipmisop nikiju leusi cem bi lewo ba anggur ngei pu noni bibor tu. 36Gima rino Lot nipmisop bat cin yahacem inghop tug hon icigya. 37Nipmisop mighumbou yai nipmot bijem ninyeng Moab ba, noni nok pung di mben Moab intun him ei nijam dini. 38Lene nipmisop mien cem yai nipmot bijem ninyeng Ben-Ami ba, noni nok pung di mben Amon intun him ei nijam dini.
Currently Selected:
NITRITI 19: HAD
Highlight
Share
Copy
Want to have your highlights saved across all your devices? Sign up or sign in
