Luka 12

Lujimuno na mambo a bukamfutumfutu

(Mateo 10:26-27)

1 # Mat 16:6; Mako 8:15 Pa kyonka kino kimye mabumba a biumbi bya bantu bavula, ba kuuba ke benyantaule bene na bene, aye Yesu patanshi watatwile kwibambila baana banji babwanga amba, “Anweba jimukai ku mbizho ya Bafaliseo, ayo bo bukamfutumfutu. 2#Mako 4:22; Lu 8:17Mambo kafwako kyavwetwa kikabulwa kusololwa ne; nangwa kyafyamika kikabulwa kuyukanyikwa ne. 3Byonkabyo byonse byo mwa amba mu mfishi bikomvwanyika patoka; ne kyokya kyo mwanongotela mu kutwi mu mazubo a mukachi kikatayiwa mbila pa mutenge.”

Ye mwafwainwa kwakamwa

(Mateo 10:28-33; 12:32; 10:19-20)

4“Amiwa nemwambila anweba balunda naami namba, kechi muchiine aba bepaya mubijitu, bino palutwe kafwapo kikwabo kyo bakonsha kuuba ne. 5Nanchi nsa kwimubuula ye mwafwainwa kuchiina. Chiinai yewa uba pa kupwisha kwipaya, uji na luusa lwa kutaya mu Ngehena. Kine nemwambila namba, muchiinai aye!”

6“Lelo tung'onyi tutanu, kechi tupotwa na tumali tubiji nenyi? Kabiji mwi ato kechi muji nangwa kamo kafyamika ku meso a Lesa ne. 7Kabiji ne nsuki yenu yonse ya ku mitwe beibala. Kechi mube moyo ne, mambo mwanema kukila tung'onyi twavula.”

Kwitaba ne kumukana Kilishitu

(Mateo 10:32,33; 12:32; 10:19,20)

8“Nemwambila namba, awa ukangitabila ku meso a bantu, ne aye naye bakamwitaba ku Mwana Muntu ku meso a bamalaika ba Lesa. 9Bino awa wankana ku meso a bantu, naye bakamukaana ku meso a bamalaika ba Lesa.”

10 # Mat 12:32; Mako 3:29 “Kabiji awa ukamwambila bibi Mwana Muntu, mambo anji akalekelwa; pakuba awa umunena mwenga Mupashi Wazhila, mambo anji kechi akalekelwa ne.”

11 # Mat 10:19,20; Mako 13:11; Lu 21:14,15 “Kabiji byo bakemuleeta mu mashinagoga, ne ku bandamakyalo, ne ku ba luusa, kechi mukakamwe amba, leelo tusakwibakumbula byepi, nangwa amba tusa kwamba ka, ine. 12Mambo Mupashi Wazhila ukemufunjisha mu kyonkakya kimye byo mwafwainwa kwamba.”

Kishimpi kya munonshi wakosama

13Kabiji umo wa mu jibumba wamwambijile amba, “Mufunjishi, ambilai mulongo wami twabane nanji bya buswanyi.”

14Kumvwa aye wamwipwizhe amba, “Obewa muntu, ng'anyi wantongola kwimuchibila mambo, nangwa kwimwabenya bintu anweba?” 15Kabiji wibambijile amba, “Tekanyai, ilamai ku lunkumbwa lonse, mambo bumi bwa muntu kechi buji mu kuvula kwa bintu byo a nonka ne.”

16Ne aye wibatayile kishimpi amba, “Mushiji wa munonshi umo wameneshe bingi bulongo. 17Ne aye walangulukile mu muchima wanji amba, ‘Lelo pano ngube byepi, mambo nabula ne mwa kubiika kajo kami?’ 18Kabiji aye amba, ‘Nsakuuba bibye, nkundule matala ami, nshimike akwabo abaya; monkamwa mo nkabiika kajo kami konse, ne bipe byami. 19Kabiji nkambila muchima wami namba, obewa muchima, uji na bintu byawama byavula byakutujilwa myaka yavula. Ukokoloke, ujenga ne kutoma, usangalale.’ 20Pakuba Lesa wamwambijile amba, ‘Obewa kilubi! Bonka buno bufuku mweo wobe wasakiwa, pano byonse byo uji naabyo bikekala bya kwa ng'anyi?’”

21“Kabiji byo byo aji awa witujila bintu mwine, ne kwikala na bya bunonshi mwi aye Lesa ne.”

Kuketekela mwi Lesa

(Mateo 6:25-34)

22Kabiji aye wibambijile baana banji babwanga amba, “Onkao mambo kyokyo nemwambila namba, kechi mubambishe muchima na mweo wenu na byomukaja, nangwa na bivwalo bya mibiji yenu ne. 23Mambo mweo wakila kajo, ne mubiji naye wakila bivwalo. 24Langulukai ku ba bikwangala; abyo kechi bi byala nangwa kunowa ne, kechi biji na mwa kubiika, nangwa butala ne, bino nangwa byonkabyo Lesa wibijisha! Anweba kechi mwakijishatu bang'onyi mu kuneema nenyi? 25Kabiji ng'anyi mukwenu pa kubambisha muchima wakonsha kunungako nangwa kacheche ku kimino kyanji? 26Kabiji umvwe mwabula kukonsha kuuba kintu kichechetu kya byonkabyo, nanchi mubambishisha kika michima na bikwabo? 27#1 Mfu 10:4-7; 2 Moba 9:3-6Langulukai buluba byo bukoma, kechi bwingila mwingilo nangwa kuluka kisapi ne. Pakuba nemwambila namba, nangwa Solomone mu lukumo lwanji lonse kechi wavwajilenga pamo ne abo ne. 28Nanchi umvwe Lesa wiivwika byonkabyo nsono ya mungye, ikalatu leelo, kesha yatayiwa mu mujilo, leelo nanchi kechi akakizhepo kwimuvwika anweba ba kalwitabilo kacheche nenyi?”

29“Kabiji kechi mukatazhiwe ne kuuba kijikila na byomukaja nangwa byo mukatoma ne. 30(Mambo abye bintu byonse bebisaka ku mikoka yonse ya panopantanda.) Pakuba Shenu wayuka amba, bino bintu byonse bimufwainwa. 31Byonkabyo, kebeshai bufumu bwanji ne aye ukemumwena bino bintu byonse. 32Kechi mube moyo ne, anweba kajitanga kacheche, mambo kyo kyamuwamina ku muchima Shenu kya kwimupa bufumu. 33Kapoteshai byo muji naabyo, ne kupana ku balanda. Imwenai bafukuta babula kufwa, ne nsabo ya mwiulu ibula kupwa, mo mu bula kufika ngivi, nangwa kilongolo kechi kyonauna ne. 34Mambo kuji nsabo yenu, ko kuji ne michima yenu.”

Kulaba ne kukenkenta

(Mateo 24:45-51)

35 # Mat 25:1-13 “Mwikale bapimpa ne kwinyingila jimo, ne malampi enu atemenenga jimo, 36#Mako 13:34-36kabiji anweba bene mwikale nobe bantu babena kupembelela nkambo yabo byo abena kubwela kufuma ku kijiilo kya masongola. Amba pakufika ne kukonkonsha, ponkapo bakamushinkwilako. 37Batokwa aba bakalume, boakatana nkambo yabo pa kwiya kasa balaba. Kine, nemwambila namba, ukapimpa ne kwinyinga aye mwine, ne kwibekazha amba baje, kabiji mwine ukeya ne kwibengijila. 38Kabiji umvwe waiya pa kilo kya bubiji, nangwa kya busatu, ne kwibataana kasa balaba, batokwa aba bakalume! 39#Mat 24:43,44Bino yukai kino amba umvwe mwina nzubo wayukijile jimo pa kimye pasakwishila ngivi, inge kechi walekele nzubo yanji amba beisabe ne. 40Ne anweba tengelai, mambo Mwana Muntu ukeya pa kimye kyo mwabula kuketekela.”

Kalume wakishinka nangwa kalume wabula wakishinka

(Mateo 24:45-51)

41Petelo wa ambile amba, “Nkambo, mwa ambila kino kishimpi atweba nyi, inyi bonse?”

42Kumvwa Nkambo amba, “Lelo nanchi ing'anyi kalama wakishinka ne wa maana, ye akapa bukulumpe bwa bantu banji, amba ebapenga kajo pa bimye byafwainwa? 43Watokwa awa kalume uba, nkambo yanji pa kwiya, wamutaana kasa oba byonkabyo! 44Kine nemwambila namba, ukamupa bukalama bwa bintu byonse byo aji naabyo. 45Bino umvwe kalume walanguluka mu muchima wanji amba, ‘Nkambo yami wabanda kwiya,’ ne kutatula kupuma bazha ba balume ne ba bakazhi, kaje ne kutoma ne kupendwa, 46nkambo ya yewa kalume ukeya mu juba jo abula kuketekela ne mu kimye kyo abula kuyuka, kabiji ukamututaula bingi ne kumutongwela kumanyikwa pamo na babi. 47Kabiji awa kalume wayukile kyasaka nkambo yanji, ne kunengezhezha jimo ne, nangwa kuuba mwayila muchima wanji ne, awa bakamupuma bipumo byavula. 48Pakuba awa wabujile kuyuka, nangwa wauba byafwainwa bipumo, bakamupuma bipumo bicheche. Kabiji awa wapewa byavula, kwi aye bakasaka byavula, kabiji kwiyewa ye bafikizhizha byavula, naye bakamwipuzha byavula byakila.”

Yesu ye ulenga lwabano

(Mateo 10:34-36; 16:2,3; 5:25-26)

49“Naishile kutaya mujilo pano pantanda, kabiji kyo nasakisha namba inge wa ambuka kala! 50#Mako 10:38Bino amiwa nji na lubatizhilo lo nafwainwa kubatizhiwa naalo; kabiji maama byo kyankatazha poso byo lukafika! 51Anweba amba, naiya kuleeta mutende pano pantanda nyi? Amiwa nemubula namba, ine, poso lonka lwabano. 52Mambo kufuma ku ja leelo mukekala batanu mu nzubo imo kasa ba abana, aku basatu aku babiji, kabiji aku babiji aku basatu. 53#Mika 7:6 Shanji ukabana na mwana, kabiji mwana ukabana na shanji; kabiji inanji ukabana na mwana wamukazhi, ne mwana wamukazhi ukabana na inanji; kabiji ne inanjivyala ukabana na mulokazhi wanji, ne mulokazhi ukabana na inanjivyala.”

Kuyuka bimye

(Mateo 16:2,3)

54Ne aye wa ambijile mabumba amba, “Byo mumona jikumbi kasa jifuma kumuzhika, ponkapo anweba amba mvula usakunoka, kine mo monka. 55Kabiji pa kumona lubesha wafuma ku kabeta ka ku bulenge, anweba amba, kusa kuuba kyuya, kabiji kine mo monka. 56Anweba ba kamfutumfutu! Mukonsha kuyuka mwayila ntanda ne jiulu; nanchi kika kimukanya kuyuka mwayila kino kimye?”

Pwishai na ye muji nanji na kikoloto

(Mateo 5:25,26)

57“Kabiji i kika kimukanya kuchiba mambo mo aolokela anweba bene? 58Pakuba byo ukiya naukukenda mambo ku mutonyi, utesheko muchima kupwisha nanji mambo mu jishinda monka; kuchiina amba wakakufikizha ku mutonyi, mutonyi naye wakakufikizha ku muota, muota naye wakakutaya mu kaleya. 59Nakubuula namba, kechi ukafumamo ne, poso wafuta jali jonsetu ja pelaako.”

Currently Selected:

Luka 12: KNTP

Highlight

Copy