Luka 13
13
Lapilai ku bubi bwenu
1Mu kyonkakya kimye kwajinga bamo bamubujile na mambo abena Ngalilea bamo boavwangile Pilato mashi abo na bitapisho byabo. 2Ne aye wibakumbwile amba. “Anweba mwalanguluka amba, abo bena Ngalilea bakizhizhemo kuuba bubi kukila bonse bena Ngalilea, mambo bamwene ano malwa nyi? 3Ine, amiwa nemwambila namba ne anweba umvwe ne kulapila ne, bonse mu konaika. 4Nangwa aba jikumi ne batanu na basatu bo kyaponejile kyamba kya Shiloma ne kwibepaya? Mwalanguluka amba, bakizhizhemo kutama kukila bonse baikalanga mu Yelusalema nyi? 5Ine, Amiwa nemwambila namba ne anweba umvwe ne kulapila ne, bonse mu konaika byonkabyo.”
Kishimpi kya mukuyu wabujile kupanga
6Ne aye wibatayile kino kishimpi amba, “Muntu umo wajimbile kichi kya mukuyu mu bujimi bwanji, kabiji waishile na kukeba bipangwa ne kwibitanako ne. 7Kepo a ambijile wingila mu bujimi amba, ‘Tala, ino ke myaka isatu yonaiya na kukeba bipangwa ku uno mukuyu, ne kutanako nangwa kimo ne. Kiteme! Mambo ka kyo kibena kutamishishatu mushiji?’ 8Ne aye wamukumbwile amba, mwane akikilekai ne uno mwaka, mpoyauleko ne kubikako mbolesha. 9Kana kikapanga bipangwa mwaka wiya, kyawama; bino umvwe ne, mukekiteme.”
Kubukwa kwa mwanamukazhi walemana mu juba ja Sabado
10Kabiji Yesu wafunjishenga mushinagoga imo mu juba ja Sabado. 11Kabiji mwajinga mwanamukazhi umo wajinga na mupashi wabiipa wa bulema myaka jikumi ne itanu na isatu. Wakonkomene ne kukonsha kwinuka ne. 12Yesu byo a mumwene wamwichile amba iya kuno konji ne kumwambila amba, “Inetu, mwakasuluka ku bulema bwenu!” 13Ne aye wabikile maboko anji pe aye, ne ponkapotu waolokele, katumbijike ne Lesa.
14 #
Lupu 20:9,10; Mpitu 5:13,14 Bino mukulumpe wa shinagoga wazhingijile mambo Yesu wabukile muntu mu juba ja Sabado, ne kwamba wiambijile mabumba amba, “Kuji moba atanu na jimo obafwainwa bantu kwingijilamo. Samwiya mu onka a moba amba betubuke, kechi mu juba ja Sabado ne.”
15Pakuba Nkambo wamukumbwile amba, “Anweba ba kamfutumfutu! Bonse kechi mukasulula ng'ombe wenu nangwa mbongolo wenu mu kipaka ne kumutwala ku mema mu juba ja Sabado nenyi? 16Ne uno mwanamukazhi, byo aji mwana Abulahama ye bakashile kwi Satana, pano ke myaka jikumi ne itanu na isatu, kechi wajikufwainwa kukasululwa kuye uno lufungwa mu juba ja Sabado nenyi?” 17Byo a ambile bino bintu, bonse balwanyi banji ba umvwine bumvu, ne bantu bonse basekejile na mambo a byonse bya lukumo byo aubile.
Kishimpi kya kalukunwa ka mastate
(Mateo 13:31-33; Mako 4:30-32)
18Ponkapo Yesu waipwizhe amba, “Lelo bufumu bwa Lesa bwapashang'ana na ka? Nkebupashang'anya na ng'anyi kintu? 19Buji nobe kajipeke ka Masitate ko atolele muntu ne kwikabyala mubujimi bwanji mwine, ne kukoma kakomene ne kwaluka ke kichi, ne bang'onyi bapita mwiulu balengele binsa byabo pa misampi yakyo.”
Kishimpi kya mbizho
(Mateo 13:33)
20Kabiji wa ambile jibiji amba, “Nanchi nkapashang'anya bufumu bwa Lesa na ka? 21Buji nobe mbizho yashikwile mwanamukazhi ne kwiifya mu bunga bwa bipimo bisatu, poso bwatutumuka bonse.”
Kibelo kyakepa
(Mateo 7:13-14,21-23)
22Kabiji wayilenga pa lwendo lwanji kasa apita mu mizhi ikatampe ne icheche, na kufunjisha kasa aya ku Yelusalema. 23Ne umo wa mwipwizhe amba, “Nkambo, aba bapuluka bakekala bacheche nyi?”
Ne aye wibambijile amba, 24“Kosakanai mutwele pa kibelo kyakepa. Mambo bavula, nemwambila namba bakasaka kutwela bino kechi bakakonsha ne. 25Kana mwine mwina nzubo waimana ne kushinka kibelo, ne anweba mwafika kwimana pangye ne kukonkonsha pa kinzhilo, ne kwamba amba, ‘mwane betushinkwileko!’ Ponkapo ukemukumbula anweba amba, ‘Kechi nayuka komwafuma ne!’ 26Ponkapo ne anweba mukatatula kwamba amba, ‘Twajilenga ne kutoma ku meso enu, ne anweba mwafunjishenga mu mikwakwa yetu’ 27#Sala 6:8 Bino aye ukamba amba, ‘Ne mwambila namba, kechi nayuka komwafuma ne! Mfumai anweba banguba bibi!’ 28#Mat 22:13; 25:30#Mat 8:11,12Amwa mukekala kujila ne kwisuma ku meno byo mukamona Abulahama ne Izaka ne Yakoba ne bonse bangauzhi mu bufumu bwa Lesa bino anweba bene kasa mwataiwa pangye. 29Ne bantu bakeya kufuma ku musela ne ku muzhika, bakafuma ne ku kabeta ka bulenge ne ku kabeta ka ku buyeke, bakekala na kuja mu bufumu bwa Lesa. 30#Mat 19:30; 20:16; Mako 10:31Kabiji talai, bapelaako bakekala ke batanshi, ne batanshi bakekala ke bapelaako.”
Butemwe bwa Yesu bwa kutemwa Yelusalema
(Mateo 23:37-39)
31Pa kyonkakya kimye bamo Bafaliseo baishile ne kumwambila amba, “Fumai kuno, mambo Heloda wasaka kwimwipaya.”
32Ne aye wibakumbwile amba, “Yainga mukamubuule awa lubwala amba, ‘Talai, amiwa mbena kupangamo bademona ne kubuka leelo ne keesha, ne kupwisha mu juba ja busatu. 33Nangwa byonkabyo kyamfwainwa kwenda leelo ne keesha, ne jakeshaja, mambo kechi kyafwainwa ngauzhi konaikila kungi ne, kana monka mu Yelusalema.’
34“Obewa Yelusalema, Yelusalema! Wipaya bangauzhi ne kwibaasa mabwe aba bo bemutumina! Javula bingi jo nasakile kwibakonkenya baana bobe pamo nobe kyaje ukonkenya twana twanji mwine mu byapi byanji, kabiji anweba kechi mwaswile ne! 35#Sala 118:26 Talai nzubo yenu imushajila ke masala. Mambo nemwambila namba, kechi mukammona ne poso mukambe amba, ‘Atotwe awa wiya mu jizhina ja Nkambo.’”
Currently Selected:
Luka 13: KNTP
Highlight
Share
Copy
Want to have your highlights saved across all your devices? Sign up or sign in
The Kaonde New Testament © The Bible Society of Zambia, 2019.
