Luka 14
14
Kubukwa kwa muntu wajinga na kikola kya kuvimba
1Juba jimo ja Sabado, Yesu byo atwelele na kuja mu nzubo ya umo wa mu bakulumpe wa Bafaliseo, bamuzanzhile bingi meso. 2Kabiji talai, kwajinga muntu ku meso anji wajinga na kikola kya kuvimba. 3Ne Yesu wibepwizhe bafunjishi ba mizhilo ne Bafaliseo amba, “Kana kyazhila kubuka muntu mu juba ja Sabado nyi, nangwa ine?”
4Bino abo bazhindaminetu nzo. Ponkapo wamusendele ne kumubuka, kabiji wamulekele kaye. 5#Mat 12:11Ne aye wibambijile amba, “Ng'anyi mwi anweba, uji na mwananji nangwa ng'ombe waponena mu mushima mu juba ja Sabado, ukabula ponkapotu kumutuntulamo?”
6Kabiji abo bakankelwe mwa kukumbwila bino bintu.
Kwipelula ne kutambwila benyi
7Kabiji aye wibatayile kishimpi aba bo baichile ku kijiilo, pa kumona byo besalulwijile bipona bya buneme, wibambijile amba, 8#Maana 25:6,7“Umvwe ba kwita ku muntu ku kijiilo kya masongola, kechi wikale mu kipona kya buneme ne, apo kampe kuji mukwabo mo mwaichilwa wanema ku kukila, 9ne aye wimwita bonse babiji wakeya ne kwimwambila amba, ‘Fumaipo, pekale babe.’ Ponkapo ne obewa ukatatula kumvwa bumvu pa kutuntulukila pa kyapelaako. 10Bino byo bakwita, yanga wikale pa kipona kyapelaako, bino pa kwiya mwine wakwita akwambile amba, ‘Mukwetu, tuntulukila pa kyawama.’ Abyo mukanemekwa ku meso a bonse bo mwaikala naabo na kuja. 11#Mat 23:12; Lu 18:14Mambo yense witumbijika ukapelulwa, ne yewa wipelula ukatumbijikwa.”
12Kepo Yesu a ambijile yewa wamwichile amba, “Inge mwateeka kijiilo kya mute nangwa kya mabanga, kechi mwite balunda nenu nangwa bakwenu nangwa balongo benu ne, nangwa banonshi bo mwikala naabo ne, kuchiina amba, nabo bakeya kwimwita ne kwi mufweta abya byo mwibapele. 13Bino pa kuteeka kijiilo, itai balanda, balemana, basunkuta ne bampofu, 14ne anweba mukatokwa, mambo abo kechi baji nabyo bakemubwezhezha ne. Ba kemubwezhezhabyo mu lusanguko lwa baoloka.”
Kishimpi kya kijiilo kikatampe
(Mateo 22:1-10)
15Kabiji umo ye aikajile nanji na kuja, byo a umvwine byo byo, wamwambijile amba, “Watokwa awa ukaja kajo mu bufumu bwa Lesa!”
16Kepo Yesu a mwambijile amba, “Muntu umo wateekele kijiilo kikatampe ne kwibeta bantu bavula. 17Kabiji pa kimye kya kuja aye watumine kalume wanji na kwibeta boalayile, amba, ‘Iyai, mambo byonse byapya kala!’ 18Bino abo bonse na jiwi jimotu batatwile kwamba bya kukainamo. Mutanshi wamwambijile amba, ‘Napota bujimi, nafwainwa kuya nkebumone. Mwane bandekeleko mambo.’ 19Ne mukwabo naye amba, ‘Napota bang'ombe bamubikonkoji bitanu, kabiji nasaka kuya na kwibeseka. Mwane bandekeleko mambo.’ 20Kabiji mukwabo naye amba, ‘Nasongolatu katataka, na mambo a kino kechi nakonsha kwiya ne.’”
21“Ne awa kalume waishile na kumubuula abya byambo nkambo yanji. Ponkapo mwina nzubo wazhingijile ne kumwambila kalume wanji amba, ‘Yanga bukiji mu mikwakwa ne mu mashinda a mu mizhi, ukebalete kuno balanda ne balemana ne bampofu ne basunkuta.’ 22Ne kalume wamwambijile amba, ‘Nkambo, byo mwaji kunkambizha bya ubiwa kala, ne pano mpuzha koikiji.’ 23Ne nkambo yanji wamwambijile kalume amba, ‘Yanga mu mikwakwa ya mungye ne mu mashinda ukebakanjikizhe bantu batwele, amba nzubo yami iyuletu paa. 24Pakuba nemwambila namba, kafwako nangwa umo wa mu boba bonalayile ukajako nangwa pacheche ku kijiilo kyami ne!’”
Kyakatazha kwikala mwana wabwanga
(Mateo 10:37-38)
25Ne mabumba akatampe amulondejilenga Yesu, ne aye pa kwaluluka wibambijile amba, 26#Mat 10:37“Umvwe muntu waiya kwi amiwa kwakubula kushikwa bashanji ne bainanji ne, ne mukazhi ne baana ne, ne balongo ne banyenga yanji, ee kine ne mweo wanji ne, kechi wakonsha kwikala ke mwanami wabwanga ne. 27#Mat 10:38; 16:24; Mako 8:34; Lu 9:23Awa wabula kusenda musalabu wanji mwine ne kundondela amiwa ne, kechi wakonsha kwikala ke mwana wabwanga ne.
28“Mambo ng'anyi mwi anweba, wasaka kushimika kyamba, ubula kwikala panshi ne kubajila jimo mali akataikilapo, kana uji nao a kwikipwisha nyi? 29Kuchiina amba, byo apwisha kwala kitendekesho wakankalwa kupwisha, ne bonse pa kwikimona bakatatula kumuseka, 30amba, ‘Uno muntu watatwile kushimika bino wakankalwa kupwisha.’”
31“Nangwa ng'anyi mfumu uba, byo asaka kuya na kulwa na mukwabo mfumu, ubula kwikala panshi ne kulangulukila jimo kana wakonsha kulwa na bantu biumbi jikumi nayewa wiya na bantu biumbi makumi abiji nyi? 32Kabiji kana kuuba byonkabyo ne, usa kukatuma bantomesha ku mukwabo kasa akiji kwalepa ne kusaka mwa kuletela mutende. 33Byonkabyo, awa wa mwi anweba wabula kuleka byonse byo aji naabyo kechi wakonsha kwikala ke mwanami wabwanga ne.”
Mukele
(Mateo 5:13; Mako 9:50)
34“Mukele wawama, bino inge mukele wa aluka ke wasamuka, ukamubwezha byepi mu bu mukele bwanji? 35Kechi wawama kubiika mu mushiji nangwa kwikala mbolesha ne. Ke bya kutayatu. Uji na matwi a kumvwa, omvwe!”
Currently Selected:
Luka 14: KNTP
Highlight
Share
Copy
Want to have your highlights saved across all your devices? Sign up or sign in
The Kaonde New Testament © The Bible Society of Zambia, 2019.
