Luka 18
18
Kishimpi kya mutonyi ne mwanamukazhi wafwilwa
1Kabiji aye wibatayile kishimpi mu kwibabuula amba bafwainwa kulomba moba onse ne kukooka ne. 2Wa ambile amba, “Mu muzhi umo mwajinga mutonyi wabujile kwakamwa Lesa nangwa kunemeka muntu ne. 3Kabiji mwajinga ne mwanamukazhi wafwilwa mu yewa muzhi waishilenga javula na kumwambila amba, ‘Banchibile mambo nayewa ye twikenda nanji!’ 4Pakuba aye mutonyi wakikainenga moba amo, bino panyuma wiambijile mwine amba, ‘Nangwa mbula kwakamwa Lesa, nangwa kunemeka muntu ne, 5bino na mambo onka a uno mwanamukazhi wafwilwa wankatazha, nkamuchibila mambo anji, kuchiina amba wakankokesha na kwiyaiya kwanji!’”
6Kabiji aye Nkambo wa ambile amba, “Umvwai akya kya ambile mutonyi wabula koloka. 7Nanchi, aye Lesa kechi ake bachibile nsambu banji boasalulula bamujijila mute ne bufuku, nangwa wabanda kwibakwasha nenyi? 8Nemubuula namba, ukebachibila nsambu bukiji. Bino Mwana Muntu byo akeya kana ukataana lwitabilo pano pantanda nyi?”
Kishimpi kya mufaliseo ne musonkeshi
9Yesu watayile ne kino kishimpi ku bamo beketekejile bene amba, bo baoloka, ne kulengulula bonse bakwabo. 10Amba, “Banabalume babiji bakanjijile mu nzubo ya Lesa na kulomba; umo Mufaliseo ne mukwabo musonkeshi. 11Mufaliseo waimene ne kulombatu byanji mwine amba, ‘Lesa, nemusanchila, mambo amiwa kechi nji pamo na bantu bakwabo ne, bangata bya lunkanankana ne, nangwa na babuula koloka ne, nangwa na bankende ne, nangwa na ye uno musonkeshi ne. 12Amiwa nzhikilwa na nzala jibiji mu mulungu umo, ndambula bifikizha mu bujikumi mu byonse byo mmona.’ 13Pakuba aye musonkeshi, byo aimene kwalepa, ne kusaka nangwa kwinuna meso anji kwiulu ne, wipuminenga pa kyaji kyanji amba, ‘Lesa, mungubile lusa, ne ndengamambo!’” 14#Mat 23:12; Lu 14:11 “Nemwambila namba, uno musonkeshi wabwelele kwanji ku nzubo kasa abingishiwa, kukila Mufaliseo. Mambo awa witumbijika mwine ukapelulwa, bino awa wipelula ukatumbijikwa.”
Yesu byo ebapesheshe baana bacheche
(Mateo 19:13-15; Mako 10:13-16)
15Kabiji baletele baana ba bacheche amba, ebabike maboko. Pakuba baana banji babwanga pa kwikimona bebakainye, 16Bino Yesu wibechile ko aji, amba, “Balekai baana ba bacheche beye kwi amiwa, kwibakanya ne, mambo bufumu bwa Lesa bo bwabo baji bibye. 17Kine nemwambila namba, awa wabula kutambula bufumu bwa Lesa pamo nobe mwana wa mucheche, kechi akatwelemo nangwa pachechetu ne.”
Mwanamulume munonshi
(Mateo 19:16-30; Mako 10:17-31)
18Kabiji umo ndamakyalo wamwipwizhe amba, “Mufunjishi wawama, nanchi ikika kyo nafwainwa kuuba namba ntambule bumi bwa myaka?”
19Kumvwa Yesu wamwambijile amba, “Mambo ka mwantelela amba wawama? Kafwako wawama ne posotu yenka Lesa. 20#Lupu 20:14; Mpitu 5:18; Lupu 20:13; Mpitu 5:17; Lupu 20:15; Mpitu 5:19; Lupu 20:16; Mpitu 5:20; Lupu 20:12; Mpitu 5:16Anweba mwayuka mizhilo, kuuba bukende ne, kwipayang'ana ne, kwiba ne, kubepela mukwenu ne, nemeka bashobe ne bainobe.”
21Kumvwa aye amba, “Abye byonse nebilaminenga kufuma ne ku bwanyike bwami.”
22Yesu pakumvwa byobyo, wamwambijile amba, “Kuji kintu kimo kyo mwabulwa. Kapoteshai byonse byo muji naabyo ne kupana ku balanda, kabiji mukekala na nsabo mwiulu, kabiji mwiye mundondele.” 23Pakuba aye byo a umvwine byobyo, ne ku muchima bwi, mambo wajinga munonshi mwine.
24Ne Yesu pa kumutala wa ambile na bulanda amba, “Kyakatazha bingi banonshi kutwela mu bufumu bwa Lesa! 25Mambo kyapeela ngamela kupita mu jiso ja nguya kukila munonshi kutwela mu bufumu bwa Lesa.”
26Abo ba umvwine byobyo, ba ambile amba, “Nanchi ng'anyi wakonsha kupuluka?”
27Pakuba aye amba, “Bibula kukonsheka kubiwa ku bantu byakonsheka kubiwa na Lesa.”
28Kumvwa Petelo amba, “Talai, atweba twasha mazubo etu ne kwimulondela.”
29Ne Yesu wibambijile amba, “Kine ne mwambila namba, kafwako muntu washa nzubo, nangwa mukazhi, nangwa balongo, nangwa bansemi, nangwa baana, na mambo a bufumu bwa Lesa, 30ukabula kutambula byavula byakila mu kino kimye, kabiji ne mu myaka ikeya, namo bumi bwa myaka.”
Yesu byo a ambile jabusatu mambo a lufu lwanji
(Mateo 20:17-19; Mako 10:32-34)
31Ne aye Yesu wasendele ba jikumi na babiji, wibambijile amba, “Talai, tubena kuya ku Yelusalema, ne bintu byonse byanembelwe ku bangauzhi bikamufikila Mwana Muntu. 32Mambo bakamupana ku Bangentila, ne kumwendeleka, ne kumuyanjisha, ne kumushipila mate. 33Kabiji pa kupwisha kumututaula bakamwipaya, bino mu juba ja busatu ukasanguka.”
34Bino baana banji babwanga kechi bebikwatakenye nangwa kimo ne. Mambo kino kyambo kyafyamikile kwi abo, ne kwikiyuka akya kyaambilwe ne.
Yesu byo abukile mpofu wa lulombo
(Mateo 20:29-34; Mako 10:46-52)
35Kabiji ponkapo, byo afwenyenye kwipi na Yeliko, mpofu umo waikele ku jishinda saka alomba bintu. 36Ne pakumvwa jibumba kasa jipita, waipwizhe amba, “I kika kyo?”
37Ba mubujile amba, “Yesu mwina Nazala ubena kupita.”
38Ponkapo aye wabijikile amba, “Yesu, Mwana Davida, ngubilai lusa!”
39Ne abo batangijile kulutwe ke bamukanye amba azhindame. Pakuba aye wabijikishetu amba, “Mwana Davida, ngubilai lusa!”
40Ponkapo Yesu waimene, ne kwibakambizha amba bamuleete koaji. Kabiji byo afikile pepi, wamwipwizhe amba, 41“Lelo ikika kyo musaka amiwa kwimubila?”
Kumvwa aye amba, “Nkambo, nasaka namba mmone jibiji.”
42Kumvwa Yesu wamwambijile amba, “Tambulai meso; mwabukwa na mambo a lwitabilo lwenu.”
43Kabiji ponkapotu aye watambwile meso, kamulondele na kutumbijika Lesa. Ne bantu bonse, pa kwikimona, batotele Lesa.
Currently Selected:
Luka 18: KNTP
Highlight
Share
Copy
Want to have your highlights saved across all your devices? Sign up or sign in
The Kaonde New Testament © The Bible Society of Zambia, 2019.
