Luka 19

Yesu ne Zakyasa

1Yesu watwelele mu Yeliko ne kupita monka. 2Kabiji monkamwa mwajinga mwanamulume jizhina janji Zakyasa, aye wajinga mukulumpe wa basonkeshi, kabiji wajinga munonshi. 3Wasakilenga kumumona Yesu byo aji, bino wakankelwe na mambo a jibumba, kabiji mambo wajinga mwipi. 4Kepo anyemejile kulutwe, ne kukanjila ku kichi kya mukuyu amba amumone, mambo Yesu wapichilenga mu jonkaja jishinda. 5Kabiji Yesu byo afikile ponka, watajile kwiulu ne kumwambila amba, “Zakyasa, ikilai bukiji, mambo ja leelo kyafwainwa amiwa mfikile mu nzubo yenu.”

6Ponkapo Zakyasa waikijile lubilo, kabiji wamutambwijile na lusekelo. 7Kabiji byo bamwene byobya, bonse kebanyinyite amba, “Waya na kufikila bwenyi ku mwanamulume ndengamambo!”

8Kabiji Zakyasa waimene, ne kumwambila Nkambo amba, “Talai, Nkambo! Mwanzo umo wa nsabo yami nsakupana ku balanda, kabiji inge namwangachile muntu kintu kyanji mu lunkanankana, nsakumulubwila bina pa kimo, bina pa kimo.”

9Ne Yesu wamwambijile amba, “Jino juba ja leelo lupulukilo lwafika ku yoino nzubo, mambo ne aye naye ye mwana Abulahama. 10#Mat 18:11 Mambo Mwana Muntu waiya na kwibakeba ne kwi bapulusha balubilamo.”

Kishimpi kya mali a ngolode

(Mateo 25:14-30)

11Kabiji byo ba umvwine bino, watayilepo ne kishimpi, mambo wajinga kwipi na Yelusalema, ne abo balangulukile amba, Bufumu bwa Lesa busakumweka katataka. 12Kepo a ambile amba, “Umo mwana wa mu bufumu wayile ku kyalo kwalepa, na kutambula bufumu aye mwine, ne kubwela. 13Waichile bakalume banji jikumi, wibapele mali jikumi, ne kwibambila amba, ‘Kanonkolwelaimo poso nabwela.’ 14Bino ba mu ntanda yanji bamushikilwe, batumine baluwe kunyuma yanji amba, ‘Twakana ao muntu kwikala mfumu wetu.’”

15“Byo atambwile bufumu ne kubwela, wakambizhizhe amba, ‘Kebetai bakalume bo napele mali namba, mmone byo banonkolwelamo. 16Mutanshi byo afikile, wamwambijile amba, Nkambo, mali enu namwenamo akwabo jikumi.’ 17Ne aye wamwambijile amba, ‘Wauba bulongo, obewa kalume wawama! Mambo waikala wakishinka pa tucheche, tambula luusa lwa pa mizhi jikumi.’ 18Wa bubiji naye waishile amba, ‘Nkambo, mali enu namwenamo akwabo atanu.’ 19Ne aye naye, ba mwambijile amba, ‘Ne obewa utambule luusa lwa pa mizhi itanu.’”

20“Ponkapo mukwabo waishile amba, ‘Nkambo talai, jali jenu je; jo nafiile ku kitambala. 21Mambo ne muchiine, mambo mwashinta. Mwangata ne byo mwabujile kufya, kabiji munowa ne byo mwabujile kubyala.’ 22Ne aye wamwambijile amba, ‘Obewa kalume watama! Nkakuchibila mambo obe monka mwayila byambo byobe. Obewa wayukile amba amiwa nashinta, nsenda byo nabujile kufya ne kunowa byo nabujile kubyala. 23Mambo ka kyo wabujile kutuula mali ami ku beengijisha, kabiji amiwa pa kwiya inge neatana na nsubo.’”

24“Kabiji wa ambijile baimene ponka amba, ‘Mwangatai jali, panai kwiyewa uji na mali jikumi.’ 25Bino abo amba, ‘Nkambo, uji na mali jikumi!’ 26#Mat 13:12; Mako 4:25; Lu 8:18 ‘Nemwambila namba, yense uji naabyo ukapewa ne bikwabo, kabiji awa wabulabyo bakamwangata ne bicheche byo aji naabyo. 27#Mat 25:14-30 Pakuba aba balwanyi bami, babujile kunsaka amiwa kwikala mfumu wabo, kebaleetai pano, mwibepaye ku meso ami!’”

Yesu byo atwelele mu Yelusalema kasa bamutoota

(Mateo 21:1-11; Mako 11:1-11; Yoano 12:12-19)

28Kabiji byo a ambile bibye, watangijilepo kulutwe kuya ku Yelusalema. 29Byo afwenyenye kwipi na Betefaji ne Betani, ku mutumba yebatela amba wa Maolivi, aye watumine baana banji babwanga babiji 30amba, “Yainga mu yewa muzhi ye mwatazhapo bilungi byenu, pa kutwelamo musa kutaana mwana mbongolo, ye bakasa, ye bakyangye kukanjilapo ku muntu. Mukamukasulule ne kumuleeta kuno. 31Kabiji umvwe muntu wimwipuzha amba, mwamukasulwila ka? Mukamwambile amba, Nkambo wamusaka.”

32Ponkapo abo bo atumine bayile bakataine byonka byo ebabujile. 33Kabiji byo bakikasulwilenga mwana mbongolo bene benaye bebambijile amba, “Mambo ka mubena kumukasulwila?” 34Kumvwa abo amba, “Nkambo wamusaka.” 35Kabiji bamuletele kwi Yesu. Kepo bakupikile bivwalo byabo pa mwana mbongolo, ne Yesu waikajile ponka. 36Kabiji byo ayilenga, ba anshikile bivwalo byabo mu jishinda.

37Byo bafikile pepi, kasa aki kunkuluka ku matelo a Mutumba wa olivi, jibumba jonse ja baana banji babwanga jatatwile kusekelela ne kutota Lesa na jiwi jikatampe na mambo a mingilo yonse ya bulume yo bamwene; 38#Sala 118:26amba, “Atotwe Mfumu wiya mu jizhina ja Nkambo! Mutende mwiulu ne lukumo mwiulu mwine.”

39Kabiji bamo Bafaliseo bajinga mu jibumba ba mwambijile amba, “Mufunjishi, bakanyai baana benu babwanga.”

40Aye Yesu wibakumbwile amba, “Nemubuula namba, umvwe bano bazhindemepo, mabwe asa kubijikanga.”

Yesu wamujijile Yelusalema

41Byo afwenyenye pepi, ne kumona muzhi, aye wamujijile, 42amba, “Mama! Obewa inge waji wayuka mu jino juba bilengela mutende! Pakuba pano byafyamika kumeso obe. 43Mambo moba aka kufikila, balwanyi bobe byo bakalenga nsakwa pangye yobe ne kukuzhokoloka ne kukushinkila konse konse, 44baka kuponesha panshi, obewa ne baana bobe baji mukachi kobe; kabiji kechi baka kushiilapo nangwa jibwe jimo kasa jatentakana pa jikwabo ne, mambo kechi wayukile mwaka wa kupempulwa kobe ne.”

Yesu waya ku nzubo ya Lesa

(Mateo 21:12-17; Mako 11:15-19; Yoano 2:13-22)

45Kabiji Yesu watwelele mu nzubo ya Lesa, ne kutatula kwibapangamo bapoteshengamo, 46#Isa 56:7; Yele 7:11ne kwibambila amba, “Kyanembwa amba, ‘Nzubo yami ikekala nzubo ya milombelo.’ Pakuba anweba mwiyalula ke jiyengo ja tupondo!”

47 # Lu 21:37 Kabiji aye wafunjishenga pa juba pa juba mu nzubo ya Lesa. Bino bang'anga bakatampe ne banembeshi ne bakulumpe ba bantu bakebelenga kumwipaya, 48bino bakankelwe mwakuubila, mambo bantu bonse bamubumbile na kusaka kumumvwa.

Currently Selected:

Luka 19: KNTP

Highlight

Copy