Luka 20

Byo bamwipwizhe Yesu mambo a luusa lwanji

(Mateo 21:23-27; Mako 11:27-33)

1Juba jimo, Yesu byo afujishenga bantu mu Nzubo ya Lesa ne kusapwila Mambo Awama, kwaishile bang'anga bakatampe ne banembeshi ba mizhilo, baishile pamo na bakulumpe, 2ne kumwambila amba, “Tubuulai na ng'anyi luusa lomubilamo bino bintu? Nangwa ng'anyi wimupele luno luusa?”

3Yesu wibakumbwile amba, “Lekai ne amiwa ne mwipuzhe kino. Pano mbulai, 4nanchi lubatizhilo lwa Yoano lwafumine mwiulu nyi inyi ku bantu?” 5Kepo baambang'ene abo bene na bene amba, “Umvwe twambe namba, ‘Lwafumine kwiulu,’ usa kwamba amba, ‘mambo ka o mwabujile kumwitabila?’ 6Kabiji umvwe twambe namba, ‘Lwafumine ku bantu,’ bonse bantu basa kwitwasa mabwe, mambo bonse baitabishatu amba, Yoano wajinga ngauzhi.” 7Byonkabyo bakumbwile amba, “Kechi twayuka ko lwafumine ne.”

8Kumvwa Yesu naye wibambijile amba, “Nanchi ne amiwa kechi nemubuule luusa lo ngubilamo bibye ne.”

Kishimpi kya bujimi bwa ming'anzang'anza

(Mateo 21:33-46; Mako 12:1-12)

9 # Isa 5:1 Ne aye watatwile kwibabula bantu kino kishimpi amba; “Muntu umo wajimine bujimi bwa ming'anzang'anza, ne kwibusha ku bakalama, wayile lwendo lwalepa ku ntanda ingi, wakabanjileko. 10Kimye byo kyafikile, aye watumine kalume ku bakalama amba, akatambuleko bipangwa ku bamingilo. Pakuba bakalama bamupumine ne kumwimanya mabokotu. 11Kabiji aye watumineko kalume mukwabo. Bino aye naye bamupumine ne kumulengesha bumvu, ne kumwimanya mabokotu. 12Kabiji watumine ne wa busatu. Uno naye bamwashile ne kumutaya pangye. 13Ponkapo mwina bujimi wa ambile amba, Lelo pano ngube byepi? Nsakutuma mwanami yenatemwisha, kampe bakamunemeka aye. 14Pakuba bakalama byo bamumwene, ba ambile bene na bene amba, ‘Uno ye nswanyi. Twayai tumwipaye, pakuba amba buswanyi bwikale ke bwetu!’ 15Kabiji bamutayile pangye ya bujimi ne kumwipaya.”

“Lelo nanchi awa mwina bujimi ukeboba byepi? 16Aye ukeya ne kwibonauna aba bakalama, ne bujimi ukebupana ku bakwabo.”

Byo ba umvwine bino, ba ambile amba, “Abyo ne!”

17 # Sala 118:22 Bino Yesu wibatajile ne kwamba amba, “Lelo kino kyanembwa kyayila muka?”

“‘Jibwe jo balengulwile bashimika,

jo jaalukile ke mutwe wa jikonka.’

18Yense ukaponena pa joja jibwe ukachimauka; pakuba awa ye jikaponena, jikamuvingakanya.”

Mambo a kupana misonko

(Mateo 22:15-22; Mako 12:13-17)

19Banembeshi ne bang'anga bakatampe basakile kumukwata pa kyonkakya kimye mambo bayukile amba, bo boatayila kino kishimpi, bino bachiine bantu. 20Kabiji bamusopelenga, ne kutuma bemwesheshenga nobe bakishinka amba bamukwate mu byambo byanji, bamone mwa kumufikizhizha ku ba bulume ne luusa lwa ndamakyalo. 21Byonkabyo abo bamwipwizhe amba, “Mufunjishi, twayuka byo mwamba ne kufunjisha byaoloka, kabiji kechi mutala ku kilungi kya muntu ne, pakuba kine mufunjisha jishinda ja Lesa. 22Kana kyawama kusonka kwi Kesala, nangwa ine?”

23Bino aye wamwene bujimbijimbi bwabo, ne kwibambila amba, 24“Aki mmweshai ndenali. Iji na kipasha ne kinembelo bya kwa ng'anyi?”

Ne abo amba, “Bya kwa Kesala.”

25Kabiji aye wibambijile amba, “Nanchi panai kwi Kesala bintu bya kwa Kesala, ne kwi Lesa bintu bya kwa Lesa.”

26Kabiji kechi bakonsheshe kumona kyambo kya kumukwachila mu byo a ambile ku meso a bantu ne, kabiji bakuminye moebakumbwijile ne kuzhindama bazhindaminepo.

Kwipuzha pa mambo a lusanguko

(Mateo 22:23-33; Mako 12:18-27)

27 # Byu 23:8 Basadusea bamo baishile kwi Yesu, bonka bakana amba kafwako lusanguko, 28#Mpitu 25:5kabiji bamwipwizhe jipuzho amba “Mufunjishi, Mosesa witunembejile amba, kana koloja muntu wafwa, washa mukazhi kwakubula baana ne, kyafwainwa nkasanji amusongole mukazhanji ne kubuusha lukunwa wa kolojanji. 29Pano kwajinga baana bankazhi batanu na babiji; mubeji wasongwele mukazhi, ne kufwa kwakubula baana ne. 30Ne wa bubiji wamusongwele awa mwanamukazhi, 31ne wa busatu naye wamusongwele, byonkabyo bonse batanu na babiji, ne abo bafwile ne kusha baana ne. 32Kyapeleleko ne mwanamukazhi naye wafwile. 33Onkao mambo mu lusanguko ukekala muka ng'anyi? Mambo bonse batanu na babiji bamusongwele?”

34Kabiji Yesu wibambijile amba, “Baana bamu ino myaka basongola, ne kusongolwa, 35pakuba aba bo baketaba amba bafwainwa kufika ku yoya myaka ne ku lusanguko lwa mu bafu, abo kechi bakasongola nangwa kusongolwa ne. 36Mambo abo kechi bakonsha kufwa jibiji ne, mambo baesakana pamo na bamalaika; kabiji bo baana ba Lesa, byo baji baana ba lusanguko. 37#Lupu 3:6 Bino mambo a bafu byo basanguka, ne aye Mosesa wamwesheshe byonkabyo ponka poanemba na mambo a kipuupu byo amutela Nkambo amba, Lesa wa Abulahama, ne Lesa wa Izaka, ne Lesa wa Yakoba. 38Pano aye kechi ye Lesa wa bafu ne, poso wa bomi, mambo kwi aye bonse bo bomi.”

39Banembeshi bamo ba ambile amba, “Mufunjishi, wa amba bulongo.” 40Mambo bachiine kumwipuzha mepuzho akwabo.

Kilishitu ye mwana Davida nyi?

(Mateo 22:41-46; Mako 12:35-37)

41Kabiji Yesu wibambijile amba, “Nanchi bamba byepi byo bamba amba, Kilishitu ye mwana Davida? 42#Sala 110:1 Mambo aye mwine Davida mu Buku wa Masalamo wa amba amba,

“Nkambo wa ambijile Nkambo yami amba,

Ikala ku kilujo kyami,

43poso ngalule balwanyi bobe ke kyakutulapo maulu obe.

44Byonkabyo Davida wamutelele amba, ‘Nkambo.’ Leelo kabiji ye mwananji byepi?”

Yesu wibajimuna na mambo a bafunjishi ba mizhilo

(Mateo 23:1-36; Mako 12:38-40)

45Ne aye wibambijile baana banji babwanga bantu bonse kasa ba bena kuteleka, 46“Jimukai na banembeshi, batemwa kupitang'ana mu mikangyo yalepa, ne kutemwa lwimu mu bisankane, ne bipona bya buneme mu mashinagoga, ne bifulo bya buneme ku bijiilo; 47bo bangata mazubo a banabakazhi bafwilwa, ne na mambo a kwimwesha ku bantu amba bawama, balepesha milombelo yabo! Abo bakamona luzhachisho lwakila.”

Currently Selected:

Luka 20: KNTP

Highlight

Copy