Luka 21

Mulambo wa mwanamukazhi wafwilwa

(Mako 12:41-44)

1Yesu wainwine meso ne kumona banonshi kasa batayamo bya bupe byabo monka mu kilambwilo, 2kabiji aye wamwene ne mwanamukazhi mulanda wafwilwa byo atayilemo tumali tubiji tucheche. 3Ne aye wa ambile amba, “Kine nemwambila namba, uno mwanamukazhi wafwilwa mulanda wabiikamo byakila bya bonse. 4Mambo abo bonse babiikamo mu kilambwilo mwayila kuvula kwa bunonshi bwabo, pakuba aye mu buyanji bwanji wabiikamo byonse byo ajinga naabyo mwa kwikajila.”

Kwambilwa jimo na mambo a konaika kwa nzubo ya Lesa

(Mateo 24:1-21,29-31; Mako 13:1-19,24-27)

5 Bamo byo ba ambile mambo a nzubo ya Lesa, ne byo yanengezhiwa na mabwe awama, ne bya bupe bipanwa kwi Lesa, Yesu wa ambile amba, 6“Abye byo mubena kumona, moba abena kwiya, kechi pakashaala jibwe jikatentakana pa jikwabo jo bakabula kupalang'anya ne.”

Makatazho ne bya malwa

7Ne abo bamwipwizhe amba, “Mufunjishi, ng'anyi mwaka ye bikobiwa abyo bintu? Kabiji ng'anyi kayukilo ka kuyukilako amba bino bintu ke biji pepi kufika?”

8Yesu wibambijile amba, “Jimukai mwakatwalwa mungi. Mambo bavula bakeya mu jizhina jami amba, ‘Amiwa yami iye!’ Kabiji amba, ‘Mwaka wafika kala!’ Kechi mukebalondele ne. 9Kabiji byo mukomvwa makondo ne bya malwang'ano kechi mukoobe moyo ne, mambo abye bintu kyafwainwa bifike patanshi, bino mpelo kechi ikafika ponkapotu ne.”

10Kabiji aye wibambijile amba, “Mukoka ukemeena mukoka mukwabo, ne bufumu bukemeena bufumu bukwabo. 11Kukekala ne bitentanshi bikatampe, kabiji kwavula kukekala bipowe bya nzala ne myalo. Kabiji kukekala ne bilenga moyo ne biyukilo bikatampe kufuma mwiulu. 12Kabiji bino byonse kasa bikyangye kufika bakemukwata, ne kwimupata, ne kwimufikizha mu mashinagoga ne mu tuleya, ne kwimuleeta ku meso a bamfumu ne bandamakyalo na mambo a jizhina jami. 13Kikekala ke mwa kwibasapwila mambo. 14#Lu 12:11,12 Byonkabyo pwishishai jimo mu michima yenu amba kechi tukalangulukile jimo mwa kulondolwela ne, 15mambo amiwa nkemupa byambo ne maana, ne bonse bemushikwa kechi bakayuka mwa kwibyalulwila nangwa kwibilengulula ne. 16Bakemusolola ku bansemi, nangwa ku balongo, nangwa ku bakwenu, nangwa ku balunda nenu, ne anweba bamo bakemwipaya. 17Ne anweba bakemushikwa ku bonse na mambo a jizhina jami. 18Bino kafwako nangwa kalusuki kamo ka ku mutwe wenu ka konaika ne. 19Mukapulusha myeo yenu monka mu kutekanya kwenu.”

Yesu byo a ambijile jimo na mambo konaika kwa Yelusalema

(Mateo 24:15-21; Mako 13:14-19)

20“Bino byo mukamona Yelusalema kasa bamuzhokoloka ku mazhita, kepo mukayuka amba, lonaiko lwanji ke luji pepi. 21Byonkabyo baji mu Yudea bakanyemene ku mitumba, kabiji aba baji mukachi ka muzhi balupukemo, ne baji pangye mu majimi kechi bakatwelemo ne. 22#Hos 9:7Mambo ao ke moba a kushinkanya amba, byonse bintu byanembelwe bifike. 23Kabiji malwa kuboba bakekala na memi ne bakamwishanga baana mu oa moba! Mambo kukekala malwa akatampe panopantanda, ne bukaji pabano bantu. 24Kabiji bakebepaya na mpoko, ne kwibatwala mu buzha mu mikoka yonse ya bantu, ne Yelusalema bakamunyantaula ku Bangentila, poso myaka ya Bangentila ikafikizhiwe.”

Kwiya kwa Mwana Muntu

(Mateo 24:29-31; Mako 13:24-27)

25 # Isa 13:10; Ezi 32:7; Yoe 2:31; Lum 6:12,13 “Kabiji kukekala biyukilo ku juba, ne ku ng'ondo, ne ku tubangabanga. Ne ba mikoka ya bantu pano pantanda bakasusubala pa kumona malwa, bakekala na moyo mambo a kubuluma kwa mema a kalunga ne manyaki. 26Bantu bakapungila na moyo, pa kupembelela kwa abya bibena kwiya pano pantanda. Mambo bya bulume bya mwiulu bikasunkeena. 27#Dan 7:13; Lum 1:7 Ponkapo bakamona Mwana Muntu kasa eya mu makumbi na bulume ne lukumo lukatampe. 28Bino bintu pa kutatula kumweka, imanai, ne kwinuna mitwe yenu, mambo bukuuzhi bwenu ke buji pepi.”

Byakufunda ku kichi kya mukuyu

(Mateo 24:32-35; Mako 13:28-31)

29Ne aye wibatayile kishimpi amba, “Akitalai ku mukuyu ne ku bichi byonse. 30Byonka byo bisapuka, anweba mwibimona ne kuyuka anweba bene amba, pano mayoo aji pepi. 31Byonkabyo ne anweba, byo mukamona bino bintu kasa bibena kumweka, yukai amba, bufumu bwa Lesa buji pepi.”

32“Kine nemwambila namba, kino kisemi kechi kikapite ne, poso bino byonse bikafike. 33Jiulu ne ntanda bikapita, pakuba byambo byami kechi bikapite nangwa pachechetu ne.”

Kulaba ne kukenkenta

34“Bino iketai anweba bene, kuchiina amba, michima yenu yakanemenwa na bya kujajaja, ne kupendwa, ne na bya kutabataba bya buno bumi, ne aja juba jakemufikila kwakubula kuketekela. 35Mambo jikebafikila nobe kakose bonse bekala pano pantanda. 36Bino jimukai anweba moba onsetu ne kulomba mukakonshe kupuluka ku byobya byonse bikafika ne kwimana ku meso a Mwana Muntu.”

37 # Lu 19:47 Kabiji moba onse mute Yesu wafunjishenga mu nzubo ya Lesa, pakuba bufuku walupukilenga na kulaala pa Mutumba wa olivi. 38Ne bantu bonse bakelejilenga lukeelo mo ajinga monka mu nzubo ya Lesa na kumumvwa.

Currently Selected:

Luka 21: KNTP

Highlight

Copy