Luka 22
22
Kukeba mwa kumwipayila Yesu
(Mateo 26:1-5; Mako 14:1,2; Yoano 11:45-53)
1 #
Lupu 12:1-27
Kimye kya Kijiilo kya Bashinkwa ba kubula Mbizho kya fwenyenye pepi, kyo bateela amba Kijiilo kya Lupitailo. 2Ne bang'anga bakatampe ne ba nembeshi ba Mizhilo basakilenga mwa kumwipayila, mambo bachiine bantu.
Yudasa byo aswile kumusolola Yesu
(Mateo 26:14-16; Mako 14:10,11)
3Ponkapo Satana watwelele mwi Yudasa yebatela amba Isakaliota umo wabajilwe mu ba jikumi na babiji. 4Ne aye wafuminepo ne kuya na kumvwang'ana na bang'anga bakatampe ne bakulumpe ba bakalama mwa kwibasolwelaye. 5Ne abo basekejile, kabiji baswile kumupa mali. 6Ne Yudasa waitabile ne kusaka mwa kwibasolwelaye pabula jibumba.
Kunengezhezha jimo kijiilo kya lupitailo
(Mateo 26:17-25; Mako 14:12-21; Yoano 13:21-30)
7Kabiji juba ja Bashinkwa ba kubula Mbizho jafikile, jonkaja jo bafwainwa kutapisha mwana mukooko wa Lupitailo. 8Onkao mambo Yesu watumine Petelo ne Yoano amba, “Yainga muketunengezhezhe kijiilo kya Lupitailo tukaje.”
9Kepo abo bamwipwizhe amba, “Musaka tukanengezhezhe kwepi?”
10Kumvwa aye amba, “Talai, pa kutwela mu muzhi, mukasambakana mwanamulume wasenda mulondo wa mema. Kamulondelai kufika ne mu nzubo mo akatwela. 11Ne kumwambila mwine mwina nzubo amba, ‘Mufunjishi wa amba kwi anweba amba, nzubo ya bwenyi iji pi, mo nkajiila Kijiilo kya Lupitailo na baana bami babwanga?’ 12Ne aye ukemumwesha nzubo ikatampe ya peulu yo banengezhezha jimo, monkamwa momo mukanengezha.” 13Kabiji bayile bakataine byonka byo ebabujile, ne abo banengezhezhe jimo kijiilo kya Lupitailo.
Kijiilo kya Nkambo
(Mateo 26:26-30; Mako 14:22-26; 1 Kolinda 11:23-25)
14Kabiji kimye byo kyafikile, Yesu waikajile kutebulu pamo na batumwa. 15Ne aye wibambijile amba, “Naji kusakisha bingi kuja nenu kino kijiilo kya Lupitailo kasa nkyangye kumanama! 16Mambo nemwambila namba, kechi nke kija ne poso byo kikafikizhiwa mu bufumu bwa Lesa.”
17Ne aye washikwile katomeno, ne pa kusanta wa ambile amba “Tambulai kano mushilang'ene anweba bene na bene. 18Mambo nemwambila namba kufuma ku ja leelo kechi nkatoma a bipangwa bya ming'anzang'anza ne, poso byo bukafika bufumu bwa Lesa.” 19Ne aye washikwile shinkwa, ne pa kusanta, watebwile ne kwibapa amba, “Uno ye mubiji wami wimupainwa anweba. Kasa muba bibye mu kundanguluka amiwa.” 20#Yele 31:31-34Byonkabyo ne katomeno pa kupwisha kuja amba, “Kano katomeno lo lulayang'ano lupya mu mashi ami, emwichikila anweba.”
21 #
Sala 41:9
“Bino talai! Kuboko kwa ukansolola kuji ne amiwa pa tebulu. 22Mambo Mwana Muntu uya monka mo kyafukwilwa, bino malwa kwiyewa muntu ukamusolola!”
23Ne abo batatwile kwiipuzha bene na bene amba, kana ng'anyi wa mwi abo waya obe kino kintu.
Kupachika na mambo a bukulumpe
24 #
Mat 18:1; Mako 9:34; Lu 9:46 Kabiji mwabuukile lupata mu baana babwanga amba, ng'anyi wa mwi abo ye bafwainwa kulanguluka amba ye mukulumpe. 25Ne aye wibambijile amba, “Ba mfumu ba Bangentila be bobila bunkambo bantu babo, ne abo baji na luusa pe abo bebatela amba, ‘Bangubabiiya.’ 26#Mat 23:11; Mako 9:35#Mat 20:25-27; Mako 10:42-44 Bino kechi byobyo kyafwainwa kwikala anweba ne. Aye mukulumpe wa mwi anweba wafwainwa kwikala nobe mwanyike, ne aye ntangi nobe kalume. 27#Yoa 13:12-15 Mambo mukulumpe ye ng'anyi, awa waikala na kuja, inyi yewa ubena kumwingijila? Kechi yenkawa waikala na kuja nenyi? Bino amiwa nji mukachi kenu nobe wamwingilo.”
28“Anweba mwi boba bakelwa ne amiwa mu lweseko lwami; 29kabiji nemutongwela bufumu, byonka byo bantongwejile bataata. 30#Mat 19:28Namba mukaje ne kutoma ku tebulu wami mu bufumu bwami; kabiji mukekala pa matanda na kuchiba mambo a mikoka jikumi na ibiji ya bena Isalela.”
Kwambilwa jimo amba Petelo ukamukana Yesu
(Mateo 26:31-35; Mako 14:27-31; Yoano 13:36-38)
31“Shimona, Shimona, talai, Satana wimusakile bonse amba emululule nobe kajo. 32Bino amiwa nakulombelela obewa namba, lwitabilo lobe kechi lupwe ne. Ne obewa, pa kwaluluka jibiji, ukoseshe bakwenu.”
33Kumvwa aye amba, “Nkambo, naswila jimo kuya nenu mu kaleya ne ku lufu!”
34Kumvwa Yesu amba, “Petelo, na kwambila namba, ja leelo shikombwe kasa akyangye kukookola usakunkana jisatu amba, kechi wangyuka ne.”
Kikwama, fukuta, ne mpoko
35 #
Mat 10:9,10; Mako 6:8,9; Lu 9:3; 10:4 Kabiji aye wibambijile amba, “Byo nemutumine ne kikwama ne, nangwa fukuta ne, nangwa makwabilo ne, mwakajilwe kintu nyi?”
Kumvwa abo amba, “Ine.”
36Ne aye wibambijile amba, “Pakuba pano, awa uji na kikwama asende, ne uji nafukuta naye mo monka. Ne awa wabulabyo apoteshe kivwalo kyanji, apote mpoko. 37#Isa 53:12Mambo nemwambila namba, kino kyanembwa amba, ‘Ne aye bamubajile pamo na batupondo,’ kyafwainwa kimfikile amiwa. Mambo bintu byanembejilwe amiwa byafwainwa bifikizhiwe.”
38Ne baana banji babwanga ba ambile amba, “Nkambo, talai, mapoko abiji ano.”
Kumvwa aye amba, “Byonkabyo kilekai.” #22:38Byonkabyo kilekai; nangwa amba, byonkabyo
Lulombelo lwa Yesu pa Mutumba wa olivi
(Mateo 26:16-46; Mako 14:32-42)
39Yesu walupukile mu muzhi, ne kuya ku Mutumba wa olivi, byonka byo akelwanga kuuba; ne baana banji babwanga bamulondejile. 40Kabiji byo afikile konka wibambijile amba, “Lombainga kuchiina amba, mwakatwela mu lweseko.”
41Kabiji wibashiile waendeleko musinso pakonsha kufika jibwe ja kutaya; ne aye wafukamine panshi kalombe. 42Amba, “Taata, kana anweba mwaswa, mwikamfumye kano katomeno. Byonkabyo kechi kyaswa muchima wami ne, poso kyaswa muchima wenu kyubiwe.” 43Kabiji kwamumwekejile malaika kufuma mwiulu na kumukosesha. 44Na bulanda bwine bukatampe aye kalombeshe ne kulombesha; ne masulwila anji a alukile nobe miso ikatampe ya mashi kasa inokela panshi.
45Kabiji byo aimene po alombelenga, waishile ku baana banji babwanga wibataine kasa balaala mutulo twabulanda. 46Ne aye wibambijile amba, “Mwalajila ka? Bukai lombainga kuchiina amba mwakatwela mu lweseko.”
Kukwatwa kwa Yesu
(Mateo 26:47-56; Mako 14:43-50; Yoano 18:3-11)
47Byo akyambilengatu, ponkapo kwaishile jibumba na yewa watelelwe amba Yudasa, umo wa mu ba jikumi na babiji, kasa ebatangijila. Kabiji aye wafwenyenye pepi kwi Yesu na kumufyompa. 48Pakuba Yesu wamwambijile amba, “Yudasa, nanchi usolola Mwana Muntu na kumufyompa nyi?”
49Ne abo boajinga naabo byo bamwene bisaka kumweka, ba ambile amba, “Nkambo, twibakampe na mpoko nyi?” 50Ne umo wa mwi abo wamukampile kalume wa ng'anga mukatampe kabiji wamukopwele ne kutwi kwa ku kilujo.
51Bino Yesu wa ambile amba, “Byonkabya lekai.” Kabiji aye wakwachile ku kutwi kwa awa kalume ne kumubuka. 52Byonkabyo Yesu wibambijile bang'anga bakatampe ne bakulumpe ba bakalama ba ku nzubo ya Lesa, ne bakulumpe, bonka baishile na kumukwata amba, “Mwaiya nobe mwaiya kulwa na kapondo na mapoko ne tukonkolo? 53#Lu 19:47; 21:37 Byo najinga nenu moba onse mu nzubo ya Lesa, kechi mwatanyikile maboko enu amba munkwate ne, pakuba pano kyo kimye kyenu ne kya luusa lwa mfishi.”
Petelo byo amukaine Yesu
(Mateo 26:57,58; 26:67-75; Mako 14:53-54,65-72; Yoano 18:12-18,25-27)
54Kabiji bamukwachile ne kumuleeta mu nzubo ya ng'anga mwine mukatampe. Kabiji Petelo walondejilenga katwezhimina. 55Kabiji byo ba banzhile mujilo mukachi ka kipango, ne kwikala pamo, Petelo naye waikajile naabo. 56Ponkapo muzha umo kamwale pa kumumona kasa aikala mu kyeya kya mujilo, kamutajishe amba, “Uno naye wajinga nanji.”
57Pakuba Petelo wakaine amba, “Obewa mwanamukazhi leka! Kechi namuyuka ne.”
58Pakupita ka kimye kacheche ne mukwabo wamumwene, ne aye amba, “Ne anweba nenuwa mwi bamo.”
Kumvwa Petelo amba, “Anweba bantu, aha, amiwa ne.”
59Kabiji byo papichile awala umo mukwabo naye wa ambile na lupata amba, “Kine ne uno naye wajinga nanji; mambo ye mwina Ngalilea.”
60Pakuba aye Petelo amba, “Anweba bantu, amiwa kechi nayuka byo mubena kwamba ne.”
Byo akyambilenga, ne shikombwe wakokwele. 61Kepo Nkambo waalulukile ne kumutala Petelo. Ne Petelo wavulukile byambo bya ambile Nkambo amba, “Ja leelo jino shikombwe kasa akyangye kukookola, usakunkana jisatu.” 62Ponkapo walupukile, ne kujila bingi.
Kumanyikwa ne kupumwa kwa Yesu
(Mateo 26:67,68; Mako 14:65)
63Ne aba banabalume bamulaminenga Yesu, bamwendelekelenga ne kumupuma, 64Kabiji bamuvwetele kisapi pa meso ne kumwipuzha amba, “Aulanga, ing'anyi wakupuma?” 65Kabiji bamunenenenga ne bintu byavula bikwabo ne kumuuba mwenga.
Yesu byo bamuletele ku kije kikatampe
(Mateo 26:59-66; Mako 14:55-64; Yoano 18:19-24)
66Byo bwakiile, kije kya bakulumpe ba bantu kyapwijile pamo, bonse ne bang'anga bakatampe ne banembeshi; bamutwajile mukije kyabo amba, 67“Tubuulai umvwe mwi Kilishitu.”
Kumvwa aye amba, “Umvwe nemubuule kechi musakwitaba ne; 68kabiji kana nemwipuzha, kechi musakunkumbula ne. 69Pakuba kufuma pa kino kimye Mwana Muntu ukekala ku kuboko kwa kilujo kya bulume bwa Lesa.”
70Kumvwa bonse amba, “Anweba nanchi mwi Mwana Lesa nyi?”
Kumvwa aye amba, “Monkamo momwa ambila yami iye.”
71Kumvwa abo amba, “Nanchi kikwabo kyo tusaka kya kumushiina kika? Mambo twiumvwina atweba bene kufuma mu kanwa kanji mwine!”
Currently Selected:
Luka 22: KNTP
Highlight
Share
Copy
Want to have your highlights saved across all your devices? Sign up or sign in
The Kaonde New Testament © The Bible Society of Zambia, 2019.
