Luka 4

Kwesekwa kwa Yesu

(Mateo 4:1-11; Mako 1:12-13)

1Ne Yesu, kasa ayulwa na Mupashi Wazhila, wabwelele kufuma ku Yodano watangijilwe na Mupashi mungye, 2moba makumi ana, na kwesekwa kwi Diabola. Kabiji kechi wajiilepo kintu nangwa kimo mu oa moba ne. Byo apwile aa moba, waumvwine nzala.

3Kepo Diabola wamwambijile amba, “Inge wi Mwana Lesa, ambila aje jibwe jaluke ke shinkwa.”

4 # Mpitu 8:3 Kumvwa Yesu wamukumbwile amba, “Kyanembwa amba, muntu kechi ukamwena bumi mu shinkwa yenka ne.”

5Kepo Diabola wamutwajile ne peulu ne kumumwesha bufumu bonse bwa pano pantanda mu kakimye kacheche. 6Kabiji Diabola amba, “Obewa nsakukupa luusa lonse ne lukumo lwa bino byonse, mambo byapewa kwi amiwa, ne amiwa nakonsha kumupa yenka ye nasaka. 7Byonkabyo inge obewa waswa, kumpopwela amiwa, byonse bikekala ke byobe.”

8 # Mpitu 6:13 Ne Yesu wamwambijile amba, “Kyanembwa amba, ‘Ukamupopwela Nkambo Lesa wobe, ne ku mwingijila aye yenka!’ ”

9Kabiji aye wamutwajile Yesu ku Yelusalema. Kabiji wamubiikile peulu ya jikonka ja nzubo ya Lesa ne kumwambila amba, “Umvwe wi Mwana Lesa, witaye obewa mwine panshi kufuma pano, 10#Sala 91:11,12mambo kyanembwa amba, ‘Ukakambizha bamalaika banji, bakakulama obewa,’ 11amba ‘Bakakusenda mu maboko abo, kuchiina amba waketuntula kuulu kobe ku jibwe.’ ”

12 # Mpitu 6:16 Kabiji Yesu wamwambijile amba, “Kyanembwa amba, ‘kechi weseke Nkambo Lesa wobe ne.’ ”

13Ne Diabola byo apwishishe kumweseka lweseko lonse, wamulekele moba amo.

Yesu byo atatwile mwingilo wanji mu Ngalilea

(Mateo 4:12-17; Mako 1:14-15)

14Ne Yesu wabwelele mu Ngalilea, na bulume bwa Mupashi Wazhila, ne nkuwa yanji yayile konse konse mumande. 15Kabiji wibafunjishenga mu mashinagoga abo, kasa atakaikwa ku bonse.

Yesu byo bamukaine ku Nazala

16Kabiji waishile ku Nazala, konka ko akomejile. Kabiji byonka byo akelwanga kuuba, wayile ku shinagoga mu juba ja Sabado, ne kwimana waimene amba atange. 17 Ne kumupa bamupele buku wa ngauzhi Isaya, wavungulwile muvungilo ne kutaana po kyanembwa amba,

18 # Isa 61:1,2 “Mupashi wa Nkambo uji pe amiwa,

mambo wanshinga manyi amba usapwile Mambo Awama ku balanda.

Wantuma kusapwila mambo a bupokolweshi ku bakaswa,

ne kutambula meso bampofu,

Ne kwibakasulula bamanyikwa,

19ne kusapwila amba mwaka wa Nkambo wafika.”

20Ponkapo Yesu wa muvungile buku ne kumupana kwi kalama ne kwikala waikele panshi. Ne bonse bajinga mushinagoga bamuzanzhile meso. 21Ne aye watatwile kwibambila amba, “Lelo kino kinembelo kyafikizhiwa mu matwi enu.”

22Kabiji bonse bamutakaikilenga ne kukumya byambo bya bupe byafuminenga mu kanwa kanji. Ne kwamba amba, “Nanchi uno kechi ye mwana Yosefwa nenyi?”

23Ne aye wibambijile amba, muka ng'ambila kino kishimpi amba, “Obewa ng'anga ibuke obewa mwine,” abya byo twaumvwine byo mwaubile mu Kapenama, mwibyube ne muno mu muzhi wenu. 24#Yoa 4:44Ne aye wa ambile amba, “Kine nemwambila namba, kafwako ngauzhi witabilwa mu muzhi wanji mwine ne. 25#1 Mfu 17:1Kine nemwambila namba, mwajinga banabakazhi bafwilwa bavula mu Isalela mu moba akwa Elaija, byo bashinkile mwiulu myaka isatu ne bang'ondo batanu na umo, ne kipowe kyakumbene ntanda yonse, 26#1 Mfu 17:8-16ne Elaija kechi bamutumine, nangwa ku umo mu Isalela ne, kana ku Zelefwata, mu kyalo kya Sidona, ku mwanamukazhi wafwilwa. 27#2 Mfu 5:1-14Kabiji mwajinga bambumba bavula mu Isalela mu moba akwa Elisha ngauzhi, kafwako nangwa umo wabukilwe ne, poso Nemani mwina Silya.”

28Byo baumvwine bino bintu, bonse bajinga mushinagoga baubile bingi bukaji. 29Ne kwimana baimene ne kumupanga mu muzhi ne kumutwala kwapela mutumba patungilwe muzhi wabo, amba bamutaye munshi ya mutumba. 30Pakuba aye wapichile mukachi kabo, kaye.

Muntu wajinga na mupashi wabiipa

(Mako 1:21-28)

31Kabiji wakunkulukile ku Kapenama, muzhi wa mu Ngalilea. Ne aye wibafunjishenga mu juba ja Sabado, 32#Mat 7:28,29ne abo bakuminye bingi kufunjisha kwanji, mambo aye wafunjishenga na luusa. 33Kabiji mu shinagoga mwajinga muntu wajinga na mupashi wabiipa, ne kubijika wabijikile na jiwi jikatampe amba, 34“Mamo! Leelo musaka kuubaka ne atweba, Yesu mwina Nazala? Leelo mwaiya na kwitonauna atweba nyi? Nemuyuka byo muji, anweba mwi Wazhila wa Lesa.”

35Bino Yesu wamukainye amba, “Zhindama, fumamo mwi aye!” Ne demona wamuponeshe panshi mukachi kabo, ne kufuma wafuminemo, ne kumukozha nangwa pachechetu ne.

36Ne bonse bakuminye ne kwambang'ana bene na bene amba, “Ng'anyi musango wa bino byambo? Mambo na luusa ne na bulume ukambizha ne mipashi yabipa, nayo ifumamo!” 37Ne nkuwa ya Yesu yakumbene konse konse mu kyokya kyalo.

Yesu wa buka bantu bavula

(Mateo 8:14-17; Mako 1:29-34)

38Ne aye waimene ne kulupuka mu shinagoga ne kutwela wakatwelele mu nzubo ya kwa Petelo. Ne muko wanji Shimona wakolelwe kikola kya mubiji mashika, ne abo bamusashijile na mambo a aye. 39Kabiji wayile ne kwimana ku mwanya wanji ne kukambizha kikola kya mubiji mashika kumuleka. Ne aye wabukilwe, ponkapo waimene ne kwingila ke ebengijile. 40Pa kuzhika juba bonse bajinga na balongo babo bakolelwenga bikola bya misango ne misango bebaleetele kwi Yesu, ne aye wibatentekele maboko anji ne kwibabuka bonse. 41Ne bademona nabo bafumine mu bantu bavula, kasa babijika amba, “Anweba mwi Mwana Lesa!” Bino aye wibakambizhe ne kwibakanya amba kechi bambe ne, mambo bamuyukile amba ye Kilishitu.

Kusapwila kwa Yesu mu mashinagoga

(Mako 1:35-39)

42Ne byo bwakiile lukeelo, walupukile ne kuya mungyetu mwa bunke bwanji. Kabiji bantu bamukebele ne kwiya ko aji, ke basake kumukanya amba kechi ebashe ne, 43kepo aye ebambijile amba, “Amiwa nafwainwa kusapwila Mambo Awama a bufumu bwa Lesa ne ku mizhi ikwabo pamo; mambo kino kyo kyo bantumijile.”

44Kabiji wasapwijilenga mu mashinagoga a mu Yudea.

Currently Selected:

Luka 4: KNTP

Highlight

Copy