Luka 5

Yesu byo aichile baana babwanga batanshi

(Mateo 4:18-22; Mako 1:16-20)

1 # Mat 13:1,2; Mako 3:9,10; 4:1 Juba jimo, Yesu kasa aimana ku kitulu kya kizhiba kya Ngenasaleta, jibumba ja bantu japwijile ko aji amba bomvwe mambo a Lesa. 2Wamwene maato abiji aji ku kitulu; bakwata masabi bafuminemo, kasa bovwa makonde abo. 3Yesu wakanjijile mu bwato bumo bwajinga bwa kwa Shimona, wamwambijile amba ebushinjike pacheche, kufuma ku kitulu. Kepo Yesu aikajile mu bwato na kufujisha jibumba.

4Byo apwishishe kwamba, wamwambijile Shimona amba, “Shinjikai bwato muye kwazhika, ne obewa ne bakwenu mute makonde enu mukwate.” 5#Yoa 21:3Ne Shimona wamukumbwile amba, “Nkambo, twajikukabakana bufuku bonse ne kukwata nangwa kamotu ne! Byonkabyo na mambo a jiwi jenu nsakwiata makonde” 6#Yoa 21:6Ne abo bateele makonde abo kabiji, bakwachile masabi akatampe avula bingi, ne makonde abo keasake ne kuchibaika. 7Kebalabaule ne bakwabo bajinga mu bwato bukwabo amba beye bebakwasheko. Ne bakwabo baishile, kabiji bayuzhizhe mato onse abiji, kyakuuba amba ke basake ne kuloba mu mema. 8Pakuba Shimona Petelo byo amwene kyaubiwe, waponene ku maulu a Yesu ne kwamba amba, “Fumai kwi amiwa Nkambo! Mambo amiwa ne ndengamambo.”

9Mambo Shimona ne bonse bo ajinga naabo bakuminye pa kumona masabi obakwachile. 10Ne Yakoba ne Yoano baana ba kwa Zebede naabo pamo bo bajinga mu lumvwang'ano lumo ne Shimona. Ne Yesu wamwambijile Shimona amba, “Kuuba moyo ne; mambo kufuma ku ja leelo mukekala ke bakukwata bantu.”

11Kabiji byo bakokejile maato abo ku kitulu, bashiile byonse ke bamulondele.

Kubukwa kwa muntu wa mbumba

(Mateo 8:1-4; Mako 1:40-45)

12Kabiji Yesu kasa akiji mu muzhi umo, kwaishile muntu wa kumbene mbumba mubiji yense, ne byo a mumwene Yesu, waponene kinkuvumene ne kumulomba amba, “Nkambo, umvwe mwaswa, mwayuka kumbuka!” #5:12Nkambo, umvwe mwaswa, mwayuka kumbuka: akye kikola ba ambanga amba kyalengelanga muntu kwikala wazhila wabula kufwainwa kwikala pamo na bantu bakwabo ne. 13Ne Yesu watanyikile kuboko kwanji ne kumukwata, amba “Naswa, mubukiwe.” Ne ponkapotu wabukilwe ku mbumba. 14#Levi 14:1-32 Ne aye wamukambizhe amba “Kubuula muntu nangwa umo ne, bino yanga ukemweshe obewa mwine kwi ng'anga wa Lesa, ne kupana mulambo mambo a kubukwa kobe, monka mwakambizhizhe Mosesa, kikale ke kiyukilo ku bantu.”

15Bino nangwa byonkabyo nkuwa yanji yayile konse, ne mabumba akatampe apwijile na kumumvwa ne kubukiwa ku bikola byabo. 16Ne aye mwine wafumineko ne kuya mungye na kulomba.

Kubukwa kwa muntu wa kalepu

(Mateo 9:1-8; Mako 2:1-12)

17Mu juba jimo ja mu ao moba, byo afunjishenga Bafaliseo ne bafunjishi ba mizhilo baikele konka, baishile kufuma mu mizhi yonse ya mu Ngalilea ne ya mu Yudea ne mu Yelusalema. Ne bulume bwa Nkambo wajinga pe aye bwa kubuka bakolwa. 18Kabiji talai, banabalume bamo baleetele muntu wa kalepu pa mwanya, ne abo basakile kumutwezha ne kumufikizha mu kyenyi kya Yesu. 19Bino byo babujile kumona mwa kumutwezhezha mambo a jibumba, bakanjijile pa mutenge ne kumwikizha panshi pa mwanya wanji mu kyenyi kya Yesu kupichila mu kipenze kya matafwali. 20Ne Yesu byo amwene lwitabilo lwabo, wamwambijile awa muntu amba, “Mambo enu alekelwa.”

21Ne banembeshi ne Bafaliseo batatwile kwiipuzha, amba, “Nanchi ye ng'anyi we, wamba mwenga! Kanatu Lesa ye wakonsha kulekela mambo!”

22Yesu byo ayukile milanguluko yabo, wibambijile amba, “Mulangulukila ka byobyo mu michima yenu? 23Nanchi kyepi kyapeela, kwamba amba, mambo enu alekelwa, inyi kwamba amba, imanai mwende? 24Pakuba namba muyuke amba Mwana Muntu uji na luusa pano panshi lwa kulekela mambo” wa ambijile awa muntu wa kalepu amba, “Ne mwambila namba, imanai, shikulai mwanya wenu muyenga ku nzubo yenu.” 25Ponkapotu waimene ku meso abo ne kushikula kyo alajilengapo ne kuya ku nzubo yanji, kasa atumbijika Lesa. 26Ne bonse bakuminye bingi, ne kutumbijika Lesa kabiji moyo wibakwachile, ne kwamba amba, “Twamona bintu bya kukumya leelo.”

Yesu wa mwita Levi

(Mateo 9:9-13; Mako 2:13-17)

27Pakupita bino, Yesu walupukile kabiji wamwene musonkeshi umo jizhina janji Levi, kasa aikala po basonkesesha. Ne aye wamwambijile amba, “Ndondelai.” 28Ne aye Levi washiile byonsetu kabiji waimene kamulondele.

29Ne Levi wamutekejile Yesu kijiilo kikatampe mu nzubo yanji, kabiji kwajinga ne jibumba jikatampe ja basonkeshi ne bakwabo baikajile ku tebulu naabo. 30#Lu 15:1,2 Bino Bafaliseo ne banembeshi babo banyinyichilenga ku baana banji babwanga amba, “Mambo ka kyo mujiila ne kutoma na basonkeshi ne na bandengamambo?” 31Ne Yesu wibakumbwile amba, “Batuntulu kechi basaka shayuka wa michi ne, kana bonka bakolwa. 32Amiwa kechi naiya na kwita baoloka ne poso bandengamambo namba balapile.”

Mambo a kuzhikilwa na nzala

(Mateo 9:14-17; Mako 2:18-22)

33Kabiji bamo ba mwambijile Yesu amba, “Baana babwanga bakwa Yoano bazhikilwa na nzala javula ne kulomba, ne baana babwanga ba Bafaliseo nabo byobyo boba; bino anweba baana benu babwanga bajatu ne kutoma.”

34Kumvwa Yesu wibambijile amba, “Mwakonsha kwibekajika na nzala bakabaala ba musongoshi, mwine musongoshi kasa akiji naabo nyi? 35Bino moba akeya o bakebangata musongoshi, kepo bakazhikilwa na nzala mu oo moba.”

36Kabiji aye wibatayile kishimpi amba, “Kafwako muntu utabulako kikamba kufuma ku kisapi kya katataaka ne kwikitupika pa kisapi kyakala ne. Mambo umvwe wauba byobyo, ukalengela akya kya katataka kutabula kya kala, mambo kikamba kyafuma kukya katataaka kechi kikaswang'ana na kya kala ne. 37Kabiji kafwako muntu nangwa umo ulonga binyu bya katataaka mu biseba bya kala ne. Inge wauba byobyo, binyu bya katataaka bikasaba bafukuta kabiji bikechika, ne bafukuta bakonaika. 38Bino binyu bya katataaka byafwainwa kulongwa mu bafukuta bakatataaka. 39Kabiji kafwako muntu nangwa umo uba pa kupwisha kutoma binyu byakala usaka bya katataaka ne, mambo wamba amba, ‘Byakala byo byawama.’ ”

Currently Selected:

Luka 5: KNTP

Highlight

Copy