Luka 6

Juba ja Sabado

(Mateo 12:1-8; Mako 2:23-28)

1 # Mpitu 23:25 Juba jimo ja Sabado, Yesu byo apichilenga mu bujimi, baana banji babwanga bayilenga na kuchimuna mitwe ya kajo, kasa bavingila mu maboko abo ne kuja. 2Pakuba Bafaliseo bamo baipwizhe amba, “Mambo ka kyo mubena kuubila kyazhila mu juba ja Sabado?”

3Yesu wibakumbwile amba, “Anweba nanchi kechi mwatangilepo byaubile Davida byo aumvwine nzala ne abo boajinga naabo pamo nenyi? 4#Levi 24:9#1 Sam 21:1-6 Byo atwelele mu nzubo ya Lesa ne kutoola ne kuja bashinkwa ba ku meso a Lesa, bashinkwa bazhila kujako kanatu bang'anga, kabiji Davida wapelepo ne bo ajinga naabo” 5Ne aye wibambijile amba, “Mwana Muntu ye Nkambo wa juba ja Sabado.”

Muntu wajinga na kuboko kwapapa

(Mateo 12:9-14; Mako 3:1-6)

6Juba jikwabo ja Sabado, Yesu watwelele mu shinagoga na kufunjisha, kabiji monkamwa mwajinga ne muntu wajinga na kuboko kwa kilujo kwapapa. 7Kabiji banembeshi ne Bafaliseo bamutajilenga amba, bamone kana usa kumubuka mu juba ja Sabado, pakuba amba, bamone mwa kumushiina. 8Bino aye wayukile milanguluko yabo, wamwambijile muntu wajinga na kuboko kwapapa amba, “Iyai mwimane kuno.” Ne aye waishile ne kwimana konka. 9Ponkapo Yesu wibambijile amba, “Ne mwipuzhe kino, nanchi mizhilo yaswisha kuuba byawama nangwa kuuba byatama mu juba ja Sabado? Kupulusha mweo nangwa kumonauna nyi?” 10Ne pa kwibatala bonse wamwambijile muntu amba,#6:10Wamwambijile muntu amba: Amo ma buku muji amba Wa ambile na bukaji “Tanyikai kuboko kwenu.” Ne aye waubile byonkabyo, ne kuboko kwanji kwabwelele ke kutuntulu. 11Pakuba abo bayujilwe na bukaji kabiji ne kwamba ba ambang'ene bene na bene bya kumuba Yesu.

Yesu byo asalulwile batumwa jikumi na babiji

(Mateo 10:1-4; Mako 3:13-19)

12Mu oa moba Yesu wayile ku mutumba na kulomba, ne bufuku bonse waikajile na kulomba kwi Lesa. 13Byo bwakiile lukeelo waichile baana banji babwanga kabiji wasajilemo jikumi na babiji, bo atumbile amba batumwa, 14Shimona, ye atumbile amba Petelo ne Andeleo mulongo wanji; Yakoba ne Yoano, Filipa ne Batolomo, 15Mateo ne Tomase, Yakoba mwana Alefesa, ne Shimona ye batongwele amba, Muzelote, 16ne Yudasa mwana Yakoba, ne Yudasa Isakaliota yenka wamusolwele Yesu.

Yesu byo afunjishe ne kubuka bakolwa

(Mateo 4:23-25)

17Yesu byo akunkulukile na baana banji babwanga waimene pa mushiji waesakana na jibumba jikatampe ja baana banji babwanga. Ne jibumba jikatampe ja bantu bamu Yudea ne bamu Yelusalema ne ba ku musezho wa mema aku Tila ne Shidona, 18baishile na kumvwa kwi aye ne kubukiwa ku bikola byabo. Kabiji ne boba bakatazhiwe na mipashi yabipa nabo babukilwe. 19Ne jibumba jonse jasakilenga kumukwata pa mubiji, mambo bulume bwamulupukilenga ne kwibabuka bonse.

Lusekelo ne bulanda

(Mateo 5:1-12)

20Ne aye wainwine meso anji ku baana banji babwanga, ne kwamba amba,

“Mwatokwa anweba balanda;

mambo bufumu bwa Lesa bo bwenu!

21Mwatokwa anweba mwaumvwa nzala pano,

mambo mukekuta!

Mwatokwa anweba mujila pano,

mambo mukaseka!”

22 # 1 Pe 4:14 “Mwatokwa anweba umvwe bantu bemushikwa ne kwabana nenu ne kwimwambila mwenga ne kusuula jizhina jenu nobe jibi, na mambo a Mwana Muntu! 23#2 Moba 36:16; Byu 7:52Mukasekele mu joja juba, ne kukilauka na lusekelo, mambo talai mfweto yenu yo ikatampe mwiulu; mambo ne bashakulu babo nabo baubanga byonkabyo ku bangauzhi.

24“Bino malwa enu anweba banonshi;

mambo mwatambwila jimo lutekenesho lwenu!

25Malwa enu anweba mwaikuta pa kino kimye;

mambo mukafwa nzala!

Malwa enu anweba mubena kuseka pa kino kimye;

mambo mukooba bulanda ne kujila!

26“Malwa enu anweba inge bantu bonse bamba byawama pe anweba! Mambo bashakulu babo baubilenga byonkabyo ku bangauzhi ba bubela.

Butemwe bwa kutemwa balwanyi

(Mateo 5:38-48; 7:12a)

27“Bino amiwa nemwambila anweba mubena kumvwa namba, temwai balwanyi benu, bobilai byawama aba bemushikwa, 28peshai boba bemufinga, ne kwibalombelela aba bemumanyika. 29Kabiji ne yewa wakupuma ku jibuta jimo, muleke akupume ne kujikwabo; kabiji ne yewa wakwangata munkukumba wobe, umuleke asende ne mukangyo wobe pamo. 30Panai ku bonse bemulomba, ne kwiyewa wakwangata bintu byobe kechi wibisake jibiji ne. 31#Mat 7:12Bobilai bakwenu abya byo musaka anweba amba bantu bemubile.

32“Umvwe mwatemwatu bantu bonka bemutemwa, mukamwenamo ng'anyi kintu? Mambo ne bandengamambo batemwa bonka be batemwa! 33Kabiji umvwe mwibobila byawama aba bemubila byawama, mukamwenamo ng'anyi kintu? Mambo ne bandengamambo nabo boba byonkabyo. 34Kabiji umvwe mwakongweshatu ku boba bomwaketekela kutambulako, mukamwenamo ng'anyi mfweto? Mambo ne bandengamambo nabo bakongwesha ku bakwabo bandengamambo amba bakebwezhezhe byonse byo batambwile. 35Bino temwai balwanyi benu, ne kwibobila byawama, kabiji panai kwakubula kuketekela kutambulako nangwa kimo ne, ne mfweto yenu ikekala ikatampe, kabiji mukekala ke baana ba Mwine Wakila, mambo aye wibobila lusa babula kusanta ne babi. 36Ikalai ba lusa, byonka byo aji wa lusa aye Shenu.

Kuzhachisha bakwenu

(Mateo 7:1-5)

37“Kechi muchibe mambo ne, ne anweba kechi bakemuchibilao ne; kuzhachisha ne, ne anweba kechi bakemuzhachisha ne, lekelai mambo, ne anweba bakemulekelao. 38Panai, ne anweba kikemupewa. Kipimo kyawama, kyo bashindaika, ne kusunkenya kasa kichika, kyo bakemupa mu kyaji kyenu. Mambo kyonkakyo kipimo kyo mupiminako kyo kyo mukapiminwako ne anweba.”

39 # Mat 15:14 Kabiji wibatayile ne kishimpi amba, “Mpofu wakonsha kutangijila mpofu mukwabo nyi? Kechi bonse babiji bakaponena mu kimbo nenyi? 40#Mat 10:24,25; Yoa 13:16; 15:20 Mwana wabwanga kechi wakila shanji jabwanga ne, bino yense mwana wabwanga, inge wafunjishiwa bulongo, ukapasha shanji jabwanga.

41“Mambo ka kyo utajila ka kibalabala kaji mu jiso ja mukwenu, bino kechi ulanguluka mwamba uji mu jiso jobe obewa mwine ne? 42Wakonsha kumwambila byepi mulongo wobe amba, ‘Lekai ne mufumye ka kibalabala kaji mu jiso jenu,’ bino obewa mwine kasa uji na mwamba uji mu jiso jobe? Obewa kamfutumfutu, patanshi fumya mwamba uji mu jiso jobe, bino umone bulongo pa kufumya ka kibalabala kaji mu jiso ja mulongo wobe.

Kichi ne bipangwa byakyo

(Mateo 7:16-20; 12:33-35)

43“Kafwako kichi kyawama kipanga bipangwa byatama ne, nangwa kichi kyatama kipanga bipangwa byawama ne. 44#Mat 12:33Mambo kichi kyonse bekiyukila ku bipangwa byakyo. Kechi mwapa makuyu ku kichi kya miba ne, nangwa kwapa mang'anzang'anza ku kichi kya mwiiba ne. 45#Mat 12:34 Muntu wawama mu butala bwa bya bunonshi bwa mu muchima wanji usolola byawama, ne muntu mubi naye mu bya bunonshi bwanji bubi usolola bibi, mambo kanwa kamba monka mu kuvula kwa biji mu muchima.

Bantungi babiji

(Mateo 7:24-27)

46“Mungichila ka amba, ‘Nkambo, Nkambo,’ bino kuuba byo nemubula ne? 47Yense wiya kwi amiwa ne kumvwa byambo byami ne kwibyuba, nsa kwimubula ye apasha. 48Wapashang'ana na muntu ushimika nzubo, wapoyile mwazhika ne kwala kitendekesho pa jibwe. Ne muyulo byo aishile, ne mikwe yapomokele ku yoya nzubo ne kukonsha kwiisunkenya ne, mambo yashimikilwe bulongo. 49Pakuba awa umvwatu ne kwibyuba ne, bakamupashang'anya nobe muntu watungile nzubo pa mushiji pabula kitendekesho. Mukwe byo aishile ne kwipumako, ponkapotu yaponene, ne lonaiko lwa yoya nzubo lwajinga lukatampe.”

Currently Selected:

Luka 6: KNTP

Highlight

Copy