Mako 16

Kusanguka kwa Yesu

(Mateo 28:1-8; Luka 24:1-12; Yoano 20:1-10)

1Kabiji pakupita juba ja Sabado, Maliya waku Magadala ne Maliya inaji Yakoba, ne Salome bapotele binunka bulongo amba bakayeko bakamushinge. 2Ne pa juba jitanshi ja mulungu abo baimene lukelokelo, pa kuseela juba kebaye ku kilende. 3Ne abo ba ambang'enenga bene na bene amba, “Ng'anyi usa kwitwalumwinako jibwe ku kibelo kya kilende?” 4Kabiji pa kutalako bamwene, jibwe jaalumukako kala, pakuba jajinga jikatampe bingi. 5Kabiji pa kutwela mu kilende bamwene nsongwalume kasa aikala ku kilujo, kasa avwala kivwalo kyalepa kitoka, ne abo baumvwine moyo.

6Ne aye wibambijile amba, “Kuchiina ne. Nayuka namba mubena kukeba Yesu wa ku Nazala ye bapopele. Wasanguka! Kechi uji muno ne. Talai pantu po bamulajikile! 7#Mat 26:32; Mako 14:28Pano yainga mukebabule baana banji babwanga, ne Petelo, amba watangilako ku Ngalilea. Akwa ko mukamumona, byonka byo emubujile.”

8Ne byo balupukile banyemeneko ku kilende, mambo bazakaminenga ne kukumya bingi, ne kwamba kechi ba ambile kintu nangwa kimo ku muntu ne, mambo baubile moyo.

Byapelaako bya ku ano Mambo Awama#16:9 Ma buuku amo a mu kigiliki kechi aji na maveleshi kufuma pa veleshi 9-20 ne.

16:9-20

Yesu wamweka kwi Maliya waku Magadala

(Mateo 28:9-10; Yoano 20:11-18)

9Kabiji byo asangukile lukelokelo pa juba jitanshi ja mulungu, wamwekele patanshi kwi Maliya wa ku Magadala, yeapangilemo bademona batanu na babiji. 10Aye wayile na kwibabula a ba baendanga ne Yesu. Byo bajijilenga ne kuuba mabingo, 11bino abo pakumvwa amba mumi, waji kumweka kwi aye, balengulwile.

Yesu byo amwekele ku baana babwanga babiji

(Luka 24:13-35)

12Bino byo byapichile, wamwekele mu musango ungi, ku babiji bakwabo byo ba endelenga mu jishinda kuya mu kyalo. 13Kabiji ne abo babwelele na kwibabula bonse, ne abo nabo kechi be betabile ne.

Yesu byo amwekele ku ba jikumi na umo

(Mateo 28:16-20; Luka 24:36-49; Yoano 20:19-23; Byubilo 1:6-8)

14Kabiji palutwe wamwekele ku ba jikumi na umo byo baikele na kuja, ne aye wibanenene mambo a kubula lwitabilo ne kukosa kwa michima yabo, mambo kechi baitabile a ba bamumwene byo asangukile ne. 15#Byu 1:8 Ne aye wibambijile amba, “Yainga pantanda ponse, mukasapwile Mambo Awama ku bilengwa byonse. 16Aye waitabila ne kubatizhiwa ukapuluka, pakuba awa wabula kwitabila ukazhatwa nao. 17Ne bino biyukilo bikebalondelanga baitabila. Mu jizhina jami bakapangilangamo bademona, bakambanga na njimi ingi, 18bakashikula milolo, kabiji nangwa batoma bya bulembe kechi bikebalengela kukolwa ne; kabiji bakabiika maboko abo pa bakolwa, ne abo baka bukiwa.”

Kuya kwa Yesu mwiulu

(Luka 24:50-53; Byubilo 1:9-11)

19 # Byu 1:9-11 Byo apwishishe Nkambo Yesu kwamba naabo, watwajilwe mwiulu ne kwikala waikajile ku kilujo kya Lesa. 20Baana babwanga bayile na kusapwila konse konse, ne Nkambo waingijilenga naabo mukufikizha ne kwikajika aa mambo na biyukilo bya londankene na byambo byabo.

Currently Selected:

Mako 16: KNTP

Highlight

Copy