Kulonga 2

Kuzyalwa kwa Mozesi akufutulwa kwakwe

1Muntu umwi wamusyobo wa Levi wakakwata mukaintu Mulevinyina.

2Mukaintu ooyo wakamita akuzyala mwana mulombe. Nkabela naakabona kuti mwanaakwe wakali mubotu, wakamusisa kwamyezi yotatwe. 3Naakabona kuti mwana tacikwe busise, wakabweza cinzuma cakalukwa amatete, wakacisingulula abunzuka kuti kacitanjilwi maanzi. Wakamubikka mumo mwana, akuyoobikka cinzuma eeco mumatete malamfu munkomwe yamulonga. 4Mucizi wakwe wakaliimvwi aalaale kalindilila mwana kubona citicitike kulinguwe.

5Eelyo mwana musimbi wa Falo wakaza kumulonga ooko kuti asambe, nkabela aabo bakamusindikila bakali kweendeenda mumbali aamulonga.

Lino ooyo mwanaa Falo wakacibona cinzuma mumatete eelyo wakatuma mubelesi wakwe kuti akacilete. 6Naakacivununa, wakajana mwana mumvwanda mulombe, wakali kulila. Musimbi wakeetezegwa akaambo kamwana, wakaamba kuti, “Nkokuti ooyu mwanaa Muhibulu.” 7Lino ooyo mucizi wamwana wakabuzya mwanaa Falo kuti, “Sena ngunke ndikakweetele mukaintu Muhibulu uunyosya kuti akakulelele mwana ooyu?” 8Mwanaa Falo wakati, “Mbubo koya.” Nkabela musimbi ooyo wakainka waakwiita mbabonya banyina mwana. 9Eelyo mwanaa Falo wakati kumukaintu ooyo, “Mutole mwana ooyu ukandilelele, ndizookubbadela mukucita mulimo ooyo.” Aboobo mukaintu wakatola mwana akuyoomulela. 10Mwana ooyo naakakomena, wakamutola kumwanaa Falo musimbi, walo wakamucita kuti abe mwanaakwe. Wakamuulika kuti ngu Mozesi. Nkaambo wakati, “Ndakamununa mumaanzi.”

Mozesi mbwaakatijila kunyika ya Midiyani

11Nikwakainda ciindi cili mbocibede, Mozesi kakomenede, wakainka kuyooswaya bantu bokwabo, wakaakubona mbuli mbubakali kusungilizigwa kucita milimo miyumu. Alimwi wakabona Muijipiti umwi kauma Muhibulu. 12Wakalanga-langa koonse-koonse, lino naakabona kuti taakwe muntu uumbi, wakajaya Muijipiti akumuzikka mumusenga. 13Nibwakaca wakabweeda alimwi, lino wakabona Bahibulu kabalwana mulicabo. Nkabela wakaambila ooyo uulubizizye wakati, “Ino umuumina nzi mweenzinyoko?” 14Walo wakaingula kuti, “Ino nguni wakakupa buleli abubetesi alindiswe? Sena uyanda kundijaya ambebo mbuli mbookajaya Muijipiti uulya?” Amvwe boobo Mozesi wakayoowa, wakayeeya kuti, “Nkokuti bantu balizi ncindakacita.”

15Lino Falo naakamvwa makani aaya, wakasoleka kuti ajaye Mozesi, pele Mozesi wakatija kuzwa kuli Falo, nkabela wakaakukkala munyika ya Midiyani, kumbali aamukalo wamaanzi.

16Lino mupaizi waku Midiyani wakali abana basimbi bali ciloba. Balo bakaza kuzooteka maanzi, bazuzya zinywido zyabutanga bwambelele bwawisi. 17Pele beembezi bamwi bakasika akubatanda. Lino Mozesi wakasika akuvuna basimbi aabo, wakabanywisizya butanga bwabo. 18Nibakabweeda kuli Luweli wisi, wakababuzya kuti, “Ino mwafwambaana buti kupiluka sunu?” 19Balo bakati, “Umwi muntu Muijipiti watuvuna kubeembezi, alimwi ngoonya watutekela maanzi akutunywisizya butanga bwesu.” 20Mpawo wisi wakababuzya kuti, “Ino muntu ooyu uli kuli? Nkaambo nzi nimwamusiya kusokwe? Kamuya mukamwiite tuzoolye aawe.” 21Mozesi wakazumina kukkala amukwasyi ooyu, nkabela Luweli wakamupa mwanaakwe musimbi, Zipola kuti akwate. 22Mukaintu ooyu wakazyala mwana mulombe. Aawo Mozesi wakayeeya kuti, “Mebo ndili muzwakule munyika yabantu,” aboobo mwana ooyo wakamuulika kuti Gesyomu.

23Nikwakainda ciindi cili mbocibede, mwami Waijipiti wakafwa. Pele Baisilayeli bakacili kupenga mubuzike bwabo alimwi bakali kulililaukila kuti kwabula uubagwisya.

Leza wakamvwa kulila kwabo, 24amatongoosi aabo, eelyo wakayeeya cizuminano ncaakapanga a Abulahamu, a Izaka alimwi a Jakobo. 25Leza wakabona buzike bwa Baisilayeli amapenzi aabo.

Currently Selected:

Kulonga 2: Tonga96

Highlight

Compare

Copy