Kulonga 25

Zipo zyakukombela Mwami Leza

(Kulonga 35.4-9)

1Lino Mwami Leza wakati kuli Mozesi, 2“Baambile Baisilayeli kuti bandiletele milumbo. Yebo nduwe unoonditambwida milumbo eeyo kuzwa kumuntu oonse uuyanda kupa. 3Njeeyi milumbo njonootambula, ngolida, nsiliva, mukuba, 4masani aacijulu-julu, aacisombo, aasalala pyu, alimwi amasani aandeketela, aaboya bwampongo, 5zikutu zyabagutu zyakanyikwa mucisila, zikutu zyakasukwa kabotu, mapulanga aamulombe, 6mungwimba wamumalambe, tununkilizyo twamafuta aakunana atwakuumpilila, 7mabwe aamakwalala aacibize, alimwi a mabwe amwi aakuti ubikke akabaki kabupaizi amabwe meebesi aakubikka akasani kaacamba kabupaizi. 8Alimwi bakandiyakile tente kutegwa nkakkale akati kabo. 9Tente eelyo aziyandika zyalyo mukaziyake mbuli mbwetikamutondezye.

Bbokesi lyacizuminano

(Kulonga 37.1-9)

10“Bakapange bbokesi lyazisamu zyamulombe, bulamfu bwalyo kabuli tukokola tobilo acisela, bwamba bwakali kakokola komwe acisela, bulamfu bwakuya mujulu bwakali kakokola komwe acisela. 11Mukalizilulule angolida mukati aanze, alimwi mukalyeenge akeengwe kangolida kulizingulusya lyoonse. 12Mwamana mukabambe tuninga tone twangolida twakuliyumwida, mukatulamatike kumaulu aalyo one, tuninga tobilo kulubazu lomwe-lomwe. 13Mukabambe tukulisyo twamulombe, mukatuzilulule angolida. 14Eelyo tukulisyo mukatusekke mutuninga kubbazu limwi alimwi lyabbokesi, tukabe twakuliyumwida. 15Eelyo tukulisyo tuleelede kukkalilila kutuninga tutakagwisigwi pe. 16Mubbokesi oomo mukabikke zilembelo zyamilawo eeyo njeyoomupa.

17“Mukapange civunisyo cangolida iini-ini, cilampa tukokola tobilo acisela, abwamba bwakakokola komwe acisela. 18Kumamanino aacivunisyo mukabikke zikozyanyo zyobilo zyabakelibu bobilo bangolida yoondedwe ansando, 19umwi aumwi kulubazu lumwi. Ukababumbe cakuti kabanamatide kucivunisyo. 20Nkabela mababa aabakelibu aabo aleelede kunooyoobabamukide kabavumbilide civunisyo, balo lwabo kabayoolangene, meso aaumwi aumwi wabo kaayooduneme acivunisyo. 21Civunisyo eeco mukacivunike abbokesi nkabela mukati mubbokesi mukabikke mabwe aamilawo eeyo njeyoomupa. 22Ndinoooswaangana anywebo ooko. Atala aacivunisyo alimwi akati kabakelibu bobilo aaba bali abbokesi, ndiyoomupa milawo yangu yoonse ku Baisilayeli.”

Itebule lyacinkwa cituulwa kuli Leza

(Kulonga 37.10-16)

23“Mukapange tebule amapulanga aamulombe, kalilampa tukokola tobilo, bwamba bwakali kakokola komwe, abulamfu buya mujulu bwakakokola komwe acisela. 24Mukalizilulule angolida iini-ini akweenga keengwe kangolida kaizingulukide. 25Mwamana mukalizingulusye amubalo uuli mbuli bwaasa bwajanza nkabela mukeenge amubalo ooyo keengwe kangolida. 26Alimwi mukabambe tuninga tone twangolida twakuliyumwida, akuyootunamatika muziswi zyone oomo mukkede maulu. 27Tuninga twakuliyumwida tebule tuleelede kubikkwa munsi aamubalo mupati. 28Mukabeze tukulisyo twamulombe akutuzilulula angolida tebule kaliyumunwa antuto. 29Mukabumbe mitiba, nkomeki alimwi azyakubikkila tununkilizyo, tunongo ankomeki zimwi zyakutuuzizya zyakunywa. Zyoonse eezi zileelede kuti zikabumbwe angolida iini-ini. 30Nkabela atebule eelyo kumbele lyangu muyoobikka zinkwa zituulwa kulindime lyoonse.”

Cikkalilo calambe

(Kulonga 37.17-24)

31“Mukapange cikkalilo calambe cangolida iini-ini. Tako amusemo waco zibe zyangolida yoondedwe ansando. Alimwi malanga-langa amaluba-luba aaco aakucibotya, kubikkilizya azisyuukila amatu aaco kaayoojisini acikkalilo cini. 32Kumabazu aaco cinoojisi mitiba iili cisambomwe, yotatwe kubbazu limwi alimwi. 33Omwe-omwe wamitabi eeyo iili cisambomwe unoojisi malanga-langa amaluba-luba aakubotya otatwe aali mbuli aaalumondi, kaajisi azisyuukila amatu. 34Musemo waco cikkalilo calambe unoojisi nkomeki zyone zili mbuli maluba-luba aaalumondi, zijisi malanga-langa amaluba-luba aakubotya. 35Kunooli cisyuukila comwe munsi lyaimwi yobilo mitabi iikkede aamwi. 36Zisyuukila alimwi amitabi zinoojisini aamwi, acikkalilo calambe, cinooli cintu comwe buyo angolida yoondedwe ansando. 37Mukapange malambe aali ciloba aacikkalilo calambe mukaabikke cakuti kaanamatide kumbele. 38Mukapange lumano ankaye zyangolida iini-ini. 39Mukabelesye ngolida iilema talenta lyomwe mukupanga cikkalilo calambe azibelesyo zyaco zyoonse mukabelesye ngolida iilaabulemu bwatalenta lyomwe. 40Ukabonesye kuti zintu eezi zyoonse wazicita kwiindila munzila njootondezegwa acilundu.”

Currently Selected:

Kulonga 25: Tonga96

Highlight

Compare

Copy