Kulonga 34
34
Mabwe aakulembela
(Ciibalusyo 10.1-5)
1Lino Mwami Leza wakati kuli Mozesi, “Beza mabwe obilo aali mbubonya mbuli aakusaanguna, nkabela ndizoolemba alingawo majwi ngoonya aakalembedwe amabwe mataanzi ngookapwaya. 2Uzoolibambile juunza cifumo-fumo, uzooboole akutanta cilundu ca Sinai uzooswaangane andime ooko. 3Toelede kuletelezya muntu pe. Alimwi kutabi muntu mumbali acilundu, alimwi kutakabi niziba mbelele naa ŋombe ziyoocelela munsi acilundu eeci.” 4Nkaako Mozesi wakabeza zilembelo mabwe zyobilo zili mbuli aakusaanguna, nkabela bucica buyo wakatanta mucilundu, mbubonya mbuli Mwami Leza mbwaakamulaililide, kayumwide azilembelo eezyo zyaakabeza.
5Lino Mwami Leza wakaseluka mukkumbi, wazooima anguwe aawo, wakalibanda azina lyakwe mwini. 6Mwami Leza wakainda kumbele lyakwe akupozomoka wati, “Mwami Leza, Mwami Leza, ngo Leza sinkumbu, silubomba uutafwambaani kunyema. 7Ulabamba cisyomezyo cakwe ncaakasyomezya kuzyuulu-zyuulu zyabantu alimwi ulalekelela, insotoko, azinyonyoono, pele takooyooleka naa kutasubula bana abazyukulu mane kuyoosika kuzyalani lyatatu alyane akaambo kazibi zyabamawisi.” 8Amvwe boobo Mozesi wakakotama akukomba. 9Wakati, “Kuti naa koboteledwe ncobeni andime, ndakukumbila kuti uunke andiswe O Mwami Leza. Bantu aaba mbaasicinguni pele ulekelele ndubizyo zyesu, azinyonyoono zyesu, tutambule kuti tube bantu bako beni.”
Cizuminano cabambwa alimwi
(Kulonga 23.14-19; Ciibalusyo 7.1-5; 16.1-17)
10Lino Mwami Leza wakaamba kuti, “Ndiyoopanga cizuminano andinywe. Kabaliwo abantu banu boonse ndiyoocita milimo mipati iitanacitidwe munyika yoonse abantu bamisyobo yoonse. Bantu boonse bayoobona nzyakonzya kucita Mwami Leza, nkaambo ndiyoomucitila cintu cipati kwiinda. 11Mwiiswiililisye milawo njetimupe sunu. Mebo ndiyooinda kumbele lyanu akuyootanda Baamoli, Bakenani, Bahiti, Bapelezi, Bahivi, alimwi a Bajebusi mucisi. 12Mucenjele kuti mutapangi cizuminano abantu banyika ooko nkomuya, nkaambo eeci camubeda kakole. 13Pele nywebo mweelede kuyoomwaya zipaililo zyabo, akupwayaula misemo yamabwe amituni yabo ya Asyela.
14“Mutakakombi baleza bambi, nkaambo ndi Leza uutalekeleli bakomba baleza bambi. 15Mutakapangi cizuminano abantu banyika eeyo, nkaambo baakupaila baleza babo akutuula zipo kulimbabo inga bayoomutamba kulya zilyo zyabo zyakapaizigwa, eelyo inga mulaba nomucita buvuule ambabo. 16Alimwi inga mwacita kuti bana banu bakwate bana babo, nkabela aabo bakaintu bakunze inga baakutalika kucita buvuule mukukomba baleza babo, akuyoosolweda bana banu mukutasyomeka kulindime kutalika kukomba baleza babakaintu aabo.
17“Mutakabumbi baleza.
18“Mukabambe pobwe lyacinkwa citakwe mimena, mbubonya mbuli mbwindakamulailila, muleelede kulya cinkwa citakwe mimena kwamazuba aali ciloba mumwezi wa Abibu, nkaambo mumwezi ooyu nimwakazwa mu Ijipiti.
19“Mulombe woonse naa munyama uuvubidwe wakusomona nguwangu. 20Pele muyoobanununa bana bakusomona boonse bambongolo zyanu kwiindila mukupa kabelele kulindime mubusena bwabo. Kuti naa tamubanununi boobo, mukatyole nsingo zyabo. Muyoomunununa woonse mwana mulombe wakusaanguna. Taakwe muntu uuzoolibonya kumbele lyangu acinkwamaanza.
21“Muyoobeleka kwamazuba aali cisambomwe, pele tamweelede kubeleka mubuzuba bwaciloba. Tamweelede kubeleka mubuzuba oobu nikuba muciindi cakulima naa kutebula.
22“Pobwe lyabutebuzi mukalibambe, mwaakutebula zilyo zitaanzi zyamaila, alimwi apobwe lyakutebula micelo mukalibambe kumamanino amwaka.
23“Kwaziindi zyotatwe mumwaka, boonse baalumi bakalibonye kulindime nde Mwami Leza wa Isilayeli. 24Ndaakumana kwiitanda misyobo yoonse kuzwa mucisi, akukwakwabula cisi canu, taakwe muntu uuyoosola kulwana cisi canu ciindi camapobwe aaya otatwe aa Mwami leza wanu.
25“Tamukoonoobelesya cinkwa cakabikkwa mimena mwaakupaizya munyama kulindime, munyama woonse wajailwa pobwe lya Kwiindilila, tamweelede kumulazika mane buce pe.
26“Mukalete muŋanda ya Mwami Leza wanu zintu zibotu kwiindilila. Zyakutebula zitaanzi zizwa mumyuunda yanu.
‘Mutajiki kana kambelele naa kampongo mumukupa wabanyina.’”
27Mwami Leza wakati kuli Mozesi, “Ulembe majwi aaya, nkaambo ngangawo majwi aaya ngindapanzya cizuminano ayebo a Baisilayeli.” 28Mozesi wakakkala ooko a Mwami Leza kwamazuba amasiku aali makumi one, kakutakwe ancalya naa ncanywa. Wakaalemba amabwe aayo majwi aacizuminano, milawo iili kkumi.
Mozesi mbwaakaseluka acilundu
29Lino aawo Mozesi naakaseluka kuzwa mucilundu ca Sinai kayumwide amabwe obilo aaciibalusyo, taakwe naakazi kuti busyu bwakwe bwakali kumweka akaambo kakuti wakali kwaambaula aa Mwami Leza. 30Nkabela Aloni abantu boonse bakamulanga Mozesi akubona kuti busyu bwakwe bulamweka, eelyo bakayoowa kuswena kulinguwe. 31Pele Mozesi wakabaita, mpoonya Aloni abasololi bamwi bakaya kulinguwe, eelyo Mozesi wakaambaula ambabo. 32Kuzwa waawo boonse Baisilayeli bakasika aafwiifwi. Lino Mozesi wakabapa yoonse milawo eeyo njaakamulailila Mwami Leza naakali mucilundu ca Sinai. 33Nkabela Mozesi naakamana kwaambaula ambabo, wakavumba busyu bwakwe acisani. 34Kwakali kunga Mozesi aya mutente kumbele lya Mwami Leza kuti akaambaule anguwe, wakali kuvumbula cisani eeco ncaakali kulivumba kubusyu kusikila naakazwa mutente. Nkabela wali kunga azwa oomo wakali kwaambila Baisilayeli zyoonse eezyo nzyaakalaililwa kuti aambe. 35Nkabela abalo bakali kubona kuti busyu bwakwe bulamweka. Nkaako wakali kubuvumba busyu kusikila nayoobweeda alimwi kuyooambaula a Mwami Leza.
Currently Selected:
Kulonga 34: Tonga96
Highlight
Share
Compare
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
