Kulonga 4
4
Leza mbwaakapa Mozesi nguzu zigambya
1Mozesi wakaingula kuti, “Ino kuti batakandizuminini Baisilayeli, naa kuswiilila nzyentikaambe, pele bakaambe kuti, peepe taakwe naakalibonya Mwami Leza kulinduwe, ino ndikacite buti?” 2Mwami Leza wakabuzya kuti, “Ino ujisi nzi mujanza lyako?” Mozesi wakaingula kuti, “Mmusako.” 3Eelyo Mwami Leza wakati, “Uwaale ansi!” Lino Mozesi naakuuwaala ansi, musako wakaba nzoka. Mpawo Mozesi wakatija. 4Mpoonya Mwami Leza wakati kuli Mozesi, “Kotama wiibwezele kumucila.” Nkabela Mozesi wakakotama akwiijata, eelyo yakasanduka alimwi waba musako mujanza lyakwe. 5Mwami Leza wakati, “Ukacite boobu kuti bakazumine kuti Mwami Leza wauso, Leza wa Abulahamu, Leza wa Izaka, Leza wa Jakobo, nguwakalibonya kulinduwe.”
6Mwami Leza wakaambila Mozesi alimwi kuti, “Bikka janza munkwa yako.” Mozesi wakacita oobo, nkabela naakaligwisya lyakaba acinsenda, lyakatuba buu mbuli lukobo. 7Leza wakati, “Linjizye alimwi.” Wakacita oobo, nkabela naakaligwisya, lyakaba kabotu alimwi, mbubonya mbuli mubili wakwe oonse. 8Mwami Leza wakati, “Kuti naa batakakuzuminini nikuba kulamwa kucitondezyo citaanzi, bayoozumina akaambo kacitondezyo cabili. 9Nkabela kuti naa batakazumini nikuba kuzitondezyo eezi zyobilo, naa kuswiilila ncotikaambe, ukateke maanzi mumulonga, ukaatile anyika njumu. Maanzi aayo ayooba bulowa.”
10Lino Mozesi wakaambila Mwami Leza kuti, “O Mwami wangu, mebo tiindali kukonzya kwaamba kabotu, nikuba ciindi eeci ncolikwaambaula andime, taakwe nindakonzya kwaambaula kabotu pe, ndilaakamaama.”
11Pele Mwami Leza wakati kulinguwe, “Ino nguni uupa muntu mulomo? Nguni uumupa kubona, naa kumucita moofu? Nguni uumucita kuti abe musinkematwi naa syaataambi? Sena nsili ndime nde Mwami Leza? 12Lino koya buyo, ndiyookugwasya mukwaambaula, alimwi ndiyookwaambila ncotikaambe.” 13Pele Mozesi wakati, “O Mwami wangu, akaka tuma uumbi kufumbwa ngoyanda kutuma.”
14Lino Mwami Leza wakanyemena Mozesi, amane wakati, “Ino mbuti mwanookwanu Aloni, Mulevi? Ndilizi kuti walo ulakonzya kwaambaula kabotu. Lino aano uli munzila kuzookucingauzya, uyoobotelwa kapati kuzookubona. 15Ulakonzya kuyooambaula anguwe akumwaambila nzyatikaambe. Ndiyoomugwasya nyoonse mukwaamba akumwaambila nyoonse mbomweelede kucita ooko. 16Walo unooyookwaambilila kubantu, uyooba ngomutoloki wako, yebo uyooba mbuli Leza kunoomwaambila zyakwaamba. 17Tolelela musako ooyu, ngoyoocitizya zigambya.”
Mozesi mbwaakabweeda ku Ijipiti
18Lino Mozesi wakabweeda kuli Jetulo, wisizyala akuyooti kulinguwe, “Mebo ndikumbila kuti undizumizye kuti ndibweede kubantu bokwesu mu Ijipiti kuti ndikabone naa bacipona.” Mpoonya Jetulo wakati kuli Mozesi, “Weende kabotu.”
19Lino Mwami Leza wakaambilide Mozesi kacili mu Midiyani kuti, “Ono bweeda ku Ijipiti, nkaambo aabo boonse bakali kuyanda kukujaya bakafwa.” 20Eelyo Mozesi wakatolelela mukaintu abana bakwe, wakabatansika ambongolo, wabweeda ku Ijipiti. Wakabweza amusako Leza ngwaakati atolelele.
21Mwami Leza wakaambila Mozesi kuti, “Ono mboobweeda ku Ijipiti, ubone kuti ukacite zigambya zyoonse kuli Falo eezyo nzindakakupa nguzu zyakucita. Pele ndiyoocita kuti Falo akayume moyo, takooyoobazumizya bantu kuti bainke. 22Mpoonya yebo ukati kuli Falo, ‘Mboobu mbwaamba Mwami Leza, Isilayeli mmwanaangu wakusaanguna. 23Ndakwaambila kuti umuleke mwanaangu ainke akandikombe, pele kuti ukake, ndiyoojaya mwana mulombe wako wakusaanguna.’”
24Lino Mwami Leza wakaswaangana a Mozesi abusena bwakulyookezezya akusola kumujaya. 25Mpoonya Zipola muka Mozesi wakabweza bbwe libosya wapalula mwanaakwe, amane lukanda oolo wakagumya maulu aa Mozesi akuti, “Masimpe uli mwaalumi wabulowa kuli ndime.” 26Mpoonya aawo Mwami Leza wakaleka kuyanda kujaya Mozesi. Zipola wakati “Ncobeni yebo uli sibwiinga wangu wabulowa.” Nkaambo kakupalulwa ooku Zipola wakaita Mozesi kuti, “Sibwiinga wabulowa.”
27Kumane ceeci Mwami Leza wakaambila Aloni kuti, “Koya munkanda ukacingauzye Mozesi.” Eelyo wakainka baakuswaangana kucilundu ca Mwami Leza, nkabela baswaangane buyo, wakamumyonta. 28Eelyo Mozesi wakaambila Aloni zintu zyoonse nzyaakaamba Mwami Leza ciindi naakamutuma. Wakamwaambila azigambya zyoonse eezyo nzyaakamulailila Mwami Leza kuti akazicite. 29Mpawo Mozesi a Aloni bakainka baakubunganya basololi ba Baisilayeli boonse antoomwe. 30Aloni wakabaambila zintu zyoonse Mwami Leza nzyaakaambila Mozesi, alimwi Mozesi wakacita zyoonse zigambya bantu kabalangilila. 31Nkaako bantu bakazumina. Nkabela nibakamvwa kuti Mwami Leza wakabona mbuli mbobakali kupenzegwa, bakakotamika mitwe bakomba.
Currently Selected:
Kulonga 4: Tonga96
Highlight
Share
Compare
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
