Matalikilo 31

Jakobo mbwaakatija kuzwa kuli Labani

1Lino Jakobo wakamvwa bana ba Labani kabaamba kuti, “Jakobo watola lubono loonse lwataata. Lubono loonse ndwajisi lwakali lwataata.” 2Alimwi Jakobo wakabona kuti awalo Labani tacimuyandisyi mbuli mbwaakali kumuyanda kaindi. 3Aawo Mwami Leza wakaambila Jakobo kuti, “Jokela kunyika yabasikale bako kunzubo zyako. Ndiyooba aayebo.”

4Aboobo Jakobo wakaita Lacelo a Leya kuti baboole kuzoobonana anguwe ooko kwakali butanga bwakwe. 5Lino wakabaambila kuti, “Ndabona kuti uso tacindilangi kabotu pe mbuli mbwaakali kucita kaindi, Leza wataata buyo nguuli aandime. 6Anywebo lwanu mulizi kuti ndamubelekela uso anguzu zyangu zyoonse. 7Pele walo wakandicenga kwiindila mukusandaula-sandaula kuvola kwangu kwaziindi zili kkumi, nikuba boobo Leza taakamuzumizya kuti andicise. 8Ciindi Labani naakaamba kuti, ‘Impongo zyamabala-mabala ziyooba zyako.’ Butanga boonse bwakazyala zyamabala-mabala. Alimwi naakati, ‘Impongo zyamyeengwe-myeengwe ziyooba zyako.’ Butanga boonse bwakazyala zyamyeengwe-myeengwe. 9Leza wakanyanga uso matanga aakwe akwaapa kulindime.

10“Lino ciindi mpongo nizyakali kutantwa ndakalota kuti ndabona basijembwe bamyeengwe-myeengwe abamabala-mabala ababusasaasa kabatanta. 11Mungelo wa Leza wakandaambila muciloto kuti, ‘Jakobo!’ Ndakati, ‘Mwami.’ 12Wakati, ‘Bona, boonse basijembwe batanta mbamabala-mabala, myeengwe-myeengwe, abusasaasa.’ Ndime ndacita kuti cintu cili boobu cicitike nkaambo ndabona zyoonse nzyacita Labani. 13Majwi aa Leza ngaaya, ‘Ndime Leza wakalibonya kulinduwe ku Beteli, ooko nkookaimika bbwe lyaciibalusyo ndyookatila mafuta, alimwi nkookakonkela. Lino libambile, usiye nyika iino, ujokele kunyika yokwanu nkookazwida.’”

14Lacelo a Leya bakaingula bati, “Swebo taakwe ncotuyookona kuli taata pe. 15Nkaambo swebo utulanga mbuli kuti tuli banasinakooma! Wakatuuzya alimwi mali oonse ngaakajana mukukwatwa kwesu wakaasangaula. 16Loonse lubono oolo Leza ndwaakanyanga taata, sunu ndulwesu abana besu. Yebo kocita buyo mbubonya mbuli Leza mbwaakakulailila.”

17Nkaako Jakobo wakalibambila kubweeda kuli wisi Izaka kunyika ya Kenani. Wakatantika bana abakaintu bakwe ankamela. 18Wakabinga matanga aakwe oonse azintu zyoonse nzyaakajana mucisi ca Padanalamu. 19Ciindi eeco Labani wakali kukugela mbelele zyakwe, lino mukuti taakaliwo Lacelo wakabba mituni yawisi yakali muŋanda. 20Mbombuboobu Jakobo mbwaakaunina Labani Mualamu naatakamwaambila kuti uyanda kweenda. 21Wakatola zyoonse nzyaakajisi waloboka. Wakaakuzubuka mulonga wa Yufuletisi ngooyo watozya kucisi catulundu-lundu ca Giliyadi.

Labani mbwaakatobela Jakobo

22Lino nikwakamana mazuba otatwe, Labani wakaambilwa kuti Jakobo wakaloboka. 23Nkabela Labani wakatola bantu bakwe akutalika kutobela Jakobo. Wakamutobela kwamazuba aali ciloba, wakaakumujana kucisi catulundu-lundu ca Giliyadi. 24Masiku aayo ngoonya Labani wakalota. Leza wakasika kulinguwe akumwaambila kuti, “Ucenjele kuti utakongi Jakobo munzila niiba buti.” 25Lino Labani wakeenzya Jakobo mutulundu oomo mwaakayakide zivuka zyakwe, Labani walo wakayaka zivuka zyakwe kucilundu ca Giliyadi.

26Kumane Labani wakaambila Jakobo kuti, “Ino nkaambo nzi ncookandicenga akutola bana bangu mbuli kuti bakajatwa munkondo? 27Ino wakandeenena nzi akuloboka kotalayi pe? Kuti nookandaambila nitwakalayana cakukondwa, nindakaimba nkelizya nsakalala akalumbu. 28Alimwi nkaambo nzi ncootakati ndayane abazyukulu bangu abana bangu nkebamyonta? Ncobeni wakacita cabufuba-fuba! 29Ndilijisi nguzu zyakuti ndikupenzye munzila imwi, pele masiku aaya aainda, Leza wauso wandaambila kuti, ‘Utakabi noyookonga Jakobo munzila niiba buti.’ 30Ndilizi kuti ncookeenda boobu wakali kuyandisya kubweeda kulindinywe, pele ino nkaambo nzi ncookabbidilizya abaleza bangu?”

31Lino Jakobo wakaingula kuti, “Ndakayoowa, nkaambo ndakali kuyeeya kuti ulandinyanga bana bako canguzu. 32Pele naa ulajana kuti kuli umwi aano uujisi baleza bako, ooyo uleelede kuti ajaigwe. Mbaaba abantu boonse besu mbabakamboni, kolangaula, eelyo kufumbwa ncotijane kuti ncicako utole.” Jakobo taakwe naakazi kuti Lacelo wakabbide baleza bawisi.

33Eelyo Labani wakanjila mutente lya Jakobo waakulangaula, amane wakaya muli Leya, amutente lyabakaintu bazike ba Jakobo bobilo, pele taakwe naakajana baleza bakwe. Kuzwa aawo wakanjila mutente lya Lacelo. 34Lacelo wakabikkide baleza bawisi munkomo yacikkalilo cikkalwa watanta ankamela, nkabela walo wakalikkede alincico. Labani wakalangaula mumatente oonse, pele taakwe naakajana baleza bakwe. 35Lino Lacelo wakaambila wisi kuti, “Utandinyemeni pe, taata, nsikonzyi kuti inga ndanyamuka aano kumbele lyako, nkaambo ndili kuya bakaintu.” Aboobo Labani wakalangaula, pele taakwe naakajana baleza bamuŋanda yakwe.

36Mpoonya Jakobo wakanyema, wakatalika kwaambila Labani cabukali, wakati, “Ino mulandu nzi ngundakacita? Mulawo nzi ngundakatyola ooyo uukuzumizya kundivwima boobu? 37Lino tee walangaula muzintu zyangu zyoonse, ino cintu nzi cako ncoojana? Kocibikka antangalala aawa kuti bantu bangu bacibone, nkabela balaziba naa nguni uuluzi akati kesu tobilo. 38Mebo ndakakkala ayebo kwamyaka iili makumi obilo, mbelele zyako ampongo zyako taakwe nizyakali kusowa pe, alimwi taakwe nindakalya bagutu bazwa mubutanga bwako pe. 39Ciindi niyakali kunga imwi yambelele yalumwa abanyama bamusokwe, ndakali kubbadela. Nsiindakali kwiileta kulinduwe kuzookuzibya pe, kusweekelwa kwakaba kwangu ndemwini. Kuli zeezyo zyakabbigwa sikati naaba masiku, yebo wakali kundibbadelesya. 40Muziindi zinji ndakali kupenga kupya zuba sikati akwaandwa mpeyo masiku. Nketooni pe. 41Oobu mbobwakabede buumi bwangu ciindi coonse ncendakakkede ayebo. Ndakakubelekela myaka iili kkumi aine kuti nkwate bana bako bobilo aaba. Ndakabeleka aimbi myaka iili cisambomwe kubelekela butanga. Nikuba boobo zyakuvola zyangu wakazisandaula-sandaula ziindi zili kkumi. 42Kuti Leza wataata, Leza wa Abulahamu uukomba Izaka, naatakali aandime, yebo nonditandide kale acinkwamaanza. Pele walo wakabona mapenzi aangu amulimo ngwendakacita, nkankakaako ncaakucenjezya masiku aasunu.”

Jakobo a Labani mbubakapanga cizuminano

43Lino Labani wakaingula Jakobo kuti, “Bana aabo mbokwete mbibangu, abana babo boonse mbibangu, amatanga oonse ngaangu. Zyoonse eezi nzyobona nzizyangu. Pele inga ndilacita buti kubana bangu akubana babo? 44Ncibotu atupange cizuminano, yebo ambebo, alimwi tulundike cilwi camabwe kuti cibe ciibalusyo kulindiswe.”

45Mpoonya Jakobo wakaimika bbwe. 46Eelyo wakaambila bantu bakwe kuti balundike cilwi camabwe, mpawo bakalundika. Bamane bakalya zilyo aawo mumbali acilwi camabwe. 47Nkabela busena oobo Labani wakabuulika kuti, Jegaasahaduta, Jakobo wakabwiita kuti, Galeedi. 48Amane Labani wakati, “Aaya mabwe aalundikwa ayooba ciibalusyo kulindiswe.” Ncenciceeco busena oobu ncibwakaitwa kuti Galeedi. 49Labani wakati, “Mwami Leza atubambe ciindi ncotunooandeene.” Busena oobo bwakaulikwa alimwi kuti Mizipa. 50Labani wakacili kwaamba, “Kuti utakabaleli kabotu bana bangu, nikuba kuti ukakwate bambi bakaintu nikuba kuti mebo nsikoonoozi makani aayo, koyeeya kuti Leza ulitubwene toonse.” 51Nkabela Labani wakaambila Jakobo kuti, “Mabwe aaya ndaalundika akati kesu tobilo, abbwe lyaciibalusyo eeli. 52Zyoonse eezi nzyaciibalusyo. Mebo taakwe nezooindilila cilwi camabwe eeci akuza kulinduwe kuti nkulwane pe, ayebo tokoozooindilila cilwi eeci kuti uzoondilwane pe. 53Leza wa Abulahamu uuli ngo Leza wa Nahoo akabeteke akati kesu.” Lino Jakobo wakakonka muzina lya Leza wa Izaka ngwaakali kukomba. 54Wakapaizya acilundu, wakatamba bantu bakwe kuti balye, bamane bakoona acilundu aawo. 55Buce buyo cifumo-fumo, Labani wakamyonta bazyukulu bakwe, abana bakwe bakaintu akubaleleka, wati, “Amweende kabotu.” Eelyo wakajokela kumunzi wakwe.

Currently Selected:

Matalikilo 31: Tonga96

Highlight

Copy