Bapaizi 2
2
Zituuzyo zya maila
1“Lino muntu wapa cituuzyo camaila ku Mwami Leza, uleelede kutuula busu bunante. Abikke amafuta alimwi atununkilizyo ali mbubo, 2ndendilyo natilete kubana ba Aloni mupaizi. Aawo mupaizi ulabuula mujanza busu bunante bweelede amafuta atununkilizyo atole akatente acipaililo kuti cibe ciibalusyo cakuti coonse capegwa kuli Leza. Cibe cipaizyo cabweema bubotelezya ku Mwami Leza. 3Lino busu bwasyaala bube bwa Aloni abana bakwe. Eeco ncipaanzi cisalalisya casyaala kucipaizyo cakutentela Mwami Leza.
4“Kuti naa wapa cinkwa capangilwa muoveni, citavwelwi amimena pe, pele civwelwe amafuta aaoliva abusu, kuti katuli tunkwa tupapalete tunanikidwe mafuta atala. 5Kuti naa wapa cinkwa cakangwa acikangilo, cileelede kuba cabusu bunante buvweledwe mafuta, pele kacitajisi mimena pe. 6Ucikomone-komone akucitila mafuta. Eeco ncituuzyo camaila. 7Kuti naa wapa cinkwa cakangilwa mumpani, cileelede kuba cabusu bunante buvweledwe mafuta. 8Lino ucilete kuti cibe cituuzyo kuli Leza, ucipe kumupaizi, walo acitole kucipaililo. 9Wamana mupaizi awalo uyootola acipaanzi caciibalusyo, cakuti coonse capegwa ku Mwami Leza. Acitente acipaililo kuti cibe cipaizyo cabweema bubotelezya ku Mwami Leza. 10Nkabela casyaala cilaba ca Aloni abana bakwe. Ncipaanzi cisalalisya casyaala kucipaizyo cakutentela Mwami Leza.
11“Taakwe zituuzyo zyamaila zipegwa ku Mwami Leza zyeelede kuvwelwa mimena. Tamweelede kupaizya cijisi mimena nibuba buci ku Mwami Leza. 12Maila mataanzi kutebulwa mwaka amwaka aleelede kuletwa ku Mwami Leza, pele atatentwi mbuli cipaizyo cibotelezya acipaililo pe. 13Amulunge munyo kumaila ngomupa nkaambo munyo utondezya cizuminano cili akati kanu a Leza. Amulunge munyo kuzituuzyo zyanu zyoonse. 14Nomuleta busu bwamaila mataanzi ku Mwami Leza, abube busu bwamaila aakangwa aaziidwe. 15Buvwelwe amafuta atununkilizyo, eeco ncituuzyo camaila. 16Lino mupaizi uyootenta cipaanzi caciibalusyo cabusu amafuta, atununkilizyo, cibe cipaizyo citentelwa Mwami Leza.
Currently Selected:
Bapaizi 2: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.