Bapaizi 23
23
Mapobwe aakusekelela Mwami Leza
1Lino Mwami Leza wakaambila Mozesi 2kuti aambile Baisilayeli malailile aaya aamapobwe aakusekelela Mwami Leza ciindi Baisilayeli nobeelede kuswaangana kukomba. Wakati, 3“Mulijisi mazuba aali cisambomwe aakumana milimo yanu, pele muleelede kubamba buzuba bwa Sabata, bube buzuba bwakulyookezya. Mubuzuba oobo tamweelede kubeleka pe, pele buyo kuti muswaangane akukomba. Buzuba bwa Sabata mbwa Mwami Leza, taakwe makani naa nkuli nkobede. 4Amwaambilizye mapobwe aaya muziindi zyeelede.
Pobwe lya Kwiindilila alyacinkwa citakwe mimena
(Myeelwe 28.16-26)
5“Pobwe lya Kwiindilila lya Mwami Leza lilatalika ciindi zuba nolibbila mubuzuba bwakkumi aane bwamwezi mutaanzi. 6Mubuzuba bwakkumi aasanu bwamwezi ooyu mbobutalika pobwe lya Mwami Leza lyacinkwa citakwe mimena. Kwamazuba aali ciloba mweelede kunoolya zinkwa zitakwe mimena. 7Lino mubuzuba butaanzi muswaangane mbuli mbungano iisalala, mukombe, tamweelede kubeleka pe. 8Amukape zipaizyo zyakutenta ku Mwami Leza kwamazuba aali ciloba. Alimwi mubuzuba bwaciloba muswaangane mbuli mbungano iisalala tamweelede kubeleka pe.”
9Lino Mwami Leza wakaambila Mozesi kuti 10aambile Baisilayeli kuti, “Ciindi mwaakusika munyika Leza njayoomupa mbomuyootebwida buyo, mukape musunta mutaanzi kumupaizi. 11Walo mupaizi uyoouzumbaanya ku Mwami Leza, kutegwa utambulike mubusena bwanu. Mupaizi uyoouzumbaanya bwaakwiinda buzuba bwa Sabata. 12Mubuzuba oobo mukapaizye akagutu katakwe kampenda kamwaka omwe ku Mwami Leza. 13Lino mukabikke cipaanzi casanu calusuwo lwabusu bunante buvweledwe amafuta aaoliva. Cibe cabweema bubotelezya ku Mwami Leza. Alimwi mupedelezye alufulu lwa waini. 14Mutakalyi zinkwa niciba ciwaya naaba makunka matete kamutanaleta cipaizyo canu citaanzi ku Mwami Leza. Malailile aaya aleelede kutobelwa mane alili.
Pobwe lya kutebula
(Myeelwe 28.26-31)
15“Kuzwa buzuba bwakatobela buzuba bwa Sabata nimwakaleta musunta wakuzumbaanya, mukabale mvwiki zili ciloba.
16“Lino mubuzuba bwamakumi osanwe buzuba butobela Sabata yaciloba mukape cituuzyo camaila mapya ku Mwami Leza. 17Mukwasyi umwi aumwi ulete cinkwa cakuzumbaanya ku Mwami Leza. Cinkwa eeco cileelede kupangwa abusu bunante buzula nsangwa buvweledwe mimena, cibe cituuzyo ku Mwami Leza. 18Acinkwa eeco bantu bapedelezye ku Mwami Leza tubelele tuli ciloba twamwaka omwe, kapoho komwe, abagutu bobilo zyoonse kazitakwe kampenda zibe cipaizyo cakutenta ku Mwami Leza, antoomwe azituuzyo zyamaila azyazyakunywa. Cipaizyo eeci ciyooba cabweema bubotelezya ku Mwami Leza. 19Alimwi mukapaizye sijembwe omwe, abe cipaizyo cakugwisya zinyonyoono atubelele tobilo tulaa mwaka omwe, tube cipaizyo calumvwano. 20Lino mupaizi uyoozumbaanya cinkwa atubelele twakupaizya ku Mwami Leza kuti zibe cipego cisalala cabapaizi. 21Mubuzuba oobo tamweelede kubeleka milimo miyumu, ccita buyo kuswaangana akukomba. Balunyungu lwanu baleelede kutobela malailile aaya aatamani alili.
22“Ciindi nimutebula myuunda yanu, mutasiki kumalomu, alimwi mutavululi pe. Bacete abamasi bakavulule mbabo. Ndime Mwami Leza wanu.”
Pobwe lyamyeembo
(Myeelwe 29.1-6)
23Lino Mwami Leza wakaambila Mozesi kuti aambile Baisilayeli kuti, 24“Mubuzuba butaanzi bwamwezi waciloba muyoolyookezya, muswaangane mbuli mbungano iisalala mukombe ciindi myeembo yalila. 25Mutabeleki mubuzuba oobo, nkabela mukape cipaizyo cakutenta ku Mwami Leza.”
Buzuba bwacipaizyo cakukombelezezya zinyonyoono
(Myeelwe 29.7-11)
26Lino Mwami Leza wakaambila Mozesi kuti, 27“Mubuzuba bwakkumi bwamwezi waciloba, oobo buli mbobuzuba bwaciyanza cakusalazya bantu, mubuzuba oobo mukaliimye kulya, amukaswaangane akukomba, mukape cipaizyo cakutenta ku Mwami Leza. 28Mutakabeleki mulimo nuuba buti mubuzuba oobo, nkaambo mbuzuba bucitwa ciyanza cakukombelezezya zinyonyoono kumbele lya Mwami Leza wanu. 29Kufumbwa wataliimya kulya mubuzuba oobo taakwe nayoobalwa limbi akati kabantu ba Mwami Leza. 30Alimwi kuti naa umwi wabeleka mubuzuba oobo, Leza mwini uyoomunyonyoona. 31Mulawo ooyo ulajatikizya lunyungu lwanu kwalyoonse, taakwe makani naa bakkala kuli. 32Kutalikila nolibbila mubuzuba bwafuka bwamwezi kusikila nolibbila mubuzuba bwakkumi, mulyookezye akuliimya kulya.”
Pobwe lyazivuka
(Myeelwe 29.12-40)
33Lino Mwami Leza wakaambila Mozesi kuti, 34“Pobwe lyazivuka litalika mubuzuba bwakkumi mwaasanu mumwezi waciloba, nkabela lilatola mazuba aali ciloba. 35Lino mubuzuba butaanzi muswaangane mbuli mbungano iisalala, mukombe. Mutakabeleki pe. 36Buzuba bomwe-bomwe mumvwiki eeyo mukape cipaizyo cakutenta ku Mwami Leza. Alimwi mubuzuba bwalusele muswaangane mbuli mbungano iisalala mukombe, mukape acipaizyo cakutenta ku Mwami Leza. Oobo buyooba buzuba bwakukomba, mutabeleki pe.
37“Aaya ngamalailile aaamba zyamapobwe aa Mwami Leza, mwaabambe mbuli mbungano iisalala akupa zipaizyo zyakutenta ku Mwami Leza antoomwe azituuzyo zyamaila azyazyakunywa zyeelede buzuba abuzuba. 38Mapobwe aaya ayungizigwa atala aa Masabata aanu, alimwi zipaizyo eezi zyayungizigwa atala aazipego zyanu zimwi zyoonse ku Mwami Leza.
39“Lino mubuzuba bwakkumi mwaasanu mumwezi waciloba wakutebula, mukabambe pobwe ku Mwami Leza kwamazuba aali ciloba. Buzuba butaanzi mbwakulyookezya, abwalo buzuba bwalusele buyooba buzuba busalala bwakulyookezya. 40Lino mubuzuba oobo mukatole micelo yanu mibotu kapati kwiindilila, mukatole amalala aatukunka atutabi twamisamu imwi. Mwamana mukabambe pobwe mukulemeka Mwami Leza wanu. 41Mukalibambe pobwe eeli kwamazuba aali ciloba mwaka amwaka. Lunyungu lwanu luleelede kuyoobamba malailile aaya. 42Kwaciindi eeco Baisilayeli boonse banookkala muzivuka, 43mukuti lunyungu lwanu lukazibe kuti ndime ndakacitya kuti Baisilayeli bakkale muzivuka ciindi nindakabagwisya mu Ijipiti. Ndime Mwami Leza wanu.”
44Mbombuboobu Mozesi mbwaakakananina Baisilayeli kuti babambe mapobwe aakabikkwa a Mwami Leza.
Currently Selected:
Bapaizi 23: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.