यूहन्‍ना 19

1ऐस पुर पिलातुसै सपाई जो हूक्म दिकरी यीशु जो कोड़ै लगवाए। 2सपाई कण्ड़ै रा मुकुट बणाई करी तसेरै मुण्डा पुर रखू, अतै तैसिओ बैंगणी रंगा रै ओढण लगाये, 3अतै तैस बलै ईच्ची करी बलणा लगै, “हे यहूदी रै राजा, प्रणाम!” अतै तैसिओ थप्पड़ भी मारै।

4ता पिलातुसै फिरी बाहर निकळी करी मणु जो बल्लू, “हेरा, अऊँ ऐसिओ तूसु बलै फिरी लैईन्दा; ताकि तुहै जाणन कि अऊँ ऐस मन्ज कोई भी दोष ना पान्दा।” 5तैहणै यीशु कण्ड़ै रा मुकुट अतै बैंगणी रंगा रै ओड़णा लाई करी बाहर कड्‍डू; अतै पिलातुसै तैस सोगी बल्लू, “हेरा, ऐह मणु!”

6जैहणै प्रधान याजकै अतै सपाई सो हेरू, ता जोरै जोरै बलणा लगै, “ऐसिओ क्रूस पुर चढ़ा, क्रूस पुर!” पिलातुसै तियां सोगी बल्लू, “तुहै ही ऐसिओ क्रूस पुर चढ़ा, क्ओकि अऊँ ऐस मन्ज कोई भी दोष ना पान्दा।”

7यहूदी अगुवै जवाव दिता, “इन्दै भी नियम हिन अतै तियां नियमा अनुसार ऐह मारनै योग्य हा, क्ओकि ईनी अपणै आपा जो प्रमात्मैं रा पुत्र बणाऊँ हा।”#लैव्य. 24:16.

8जैहणै पिलातुसै ऐह गल्ल हुणी ता सो होर भी ड़री गो, 9अतै फिरी किलै अन्दर चली गो अतै यीशु सोगी बल्लू, “तू कड़ीया रा हा?” पर यीशुऐ तैसिओ कुछ भी जवाव ना दिता। 10ऐस पुर पिलातुसै तैस सोगी बल्लू, “मिन्जो सोगी कजो ना बलदा? कै तू ना जाणदा कि तिजो छड़ी दिणै रा हक्क मिन्जो बलै हा, अतै तिजो क्रूस पुर भी चढ़ाणै रा हक्क भी मिन्जो हा।”

11यीशुऐ जवाव दिता, “अगर तिजो प्रमात्मां ना दिन्दा ता तेरा मिन्जो पुर कोई हक्क ना भुन्दा; ठेरैतांये जिनी मिन्जो तेरै हत्थै पकड़ाऊ हा तसेरा पाप मता हा।”

12ऐस पुर पिलातुसै तैसिओ छड़ी दिणा चंऊ, पर यहूदी मणुऐ चिल्लाई चिल्लाई करी बल्लू, “अगर तू ऐसिओ छड़ी दिला, ता महाराजा कैसर रा मित्र निय्आ। जैडा कोई अपणै आपा जो राजा बणान्दा सो कैसर रा विरोध करदा हा।”

13ये गल्ला हुणी करी पिलातुस यीशु जो बाहर लैईआ अतै तैहा जगह अक्क चबूतरा थू जैतियो इब्रानी मन्ज गब्बता बलदै थियै, तैड़ी न्याय आसन पुर बैही गो। 14ऐह फसह री तैयारी रा दिन थू, अतै ऐह लगभग दफारा रा टैमं थू। तैहणै तैस सोगी यहूदिये बल्लू, “हेरा तून्दा राजा!” 15पर सो चिल्लाणा लगै, “लेई गा! लेई गा! ऐसिओ क्रूस पुर चढ़ा!” पिलातुसै तियां सोगी बल्लू, “कै अऊँ तून्दै राजै जो सूली पुर चढ़ाऊ?” प्रधान याजकै जवाव दिता, “कैसर जो छड़ी करी इन्दा होर कोई राजा निय्आ।” 16तैहणै तिनी यीशु तंयारै हत्था मन्ज सौंपी दिता ताकि सो तैसिओ क्रूस पुर चढ़ान।

यीशु जो क्रूस पुर चढ़ाऊ

(मत्ती 27:32-44; मरकुस 15:21-32; लूका 23:26-43)

17ता सपाई यीशु जो लेई गै, अतै तिनी अपणा क्रूस चुकुरा थू, सो तैसा जगहा तक बाहर गो, जैड़ी “खोपड़ी री जगह” या इब्रानी भाषा मन्ज जैतियो गुलगुता बलदै हिन। 18तैड़ी तियैं तैसिओ अतै तैस सोगी दोई होर मणु जो क्रूस पुर चढाए, अक्की जो ऐरा अतै दूये जो औरा, अतै मन्जै यीशु जो।

19पिलातुसै अक्क दोषपत्र भी तख्ती पुर लिखीकरी क्रूस पुर लगाई दिता, अतै तैत मन्ज ऐह लिखुरी थू, “नासरत रा यीशु, यहूदी रा राजा।” 20ऐह दोषपत्र मतै सारै यहूदिये पढु, क्ओकि सो जगहा जैड़ी यीशु क्रूस पुर चढाऊरा थू नगर रै नेड़ै थू; अतै ऐह पत्र इब्रानी अतै लतीनी अतै यूनानी भाषा मन्ज लिखुरा थू। 21तैहणै यहूदी रै प्रधान याजकै पिलातुस सोगी बल्लू, “‘यहूदी रा राजा’ मत लिखै पर ऐह लिख कि ‘तिनी बल्लू, अऊँ यहूदी रा राजा हा’।”

22पिलातुसै जवाव दिता, “मैंई जैडा लिखी दिता, सो लिखी दिता।”

23जैहणै सपाही यीशु जो क्रूस पुर चढ़ाई बैईठा, ता तसेरै ओड़णा लेई करी चंऊर हिस्से करै, हर सपाही तांयें अक्क हिस्सा, अतै कुरता भी लैऊ, पर कुरता सियुरा ना थू पर ऊपरा थऊँ लेई थला तक गुड़ियूरा थू।

24ठेरैतांये तियैं अप्पू मन्ज बल्लू, “अहै ऐसिओ छकन ना पर, ऐस पुर पर्ची पान्दै कि ऐह कसेरा भोला।” ऐह ठेरैतांये भूआ कि पवित्रग्रन्था मन्ज जैडा कणैऊरा सो पुरा भोआ,

“तियैं मेरै औढ़ण अप्पू मन्ज बण्ड़ी लै

अतै मेरै औढ़णा पुर पर्ची पाई।”#भज. 22:18.

अतै सपाईये ईयां ही करू।

25यीशु रै क्रूस बलै तसेरी माता, अतै तसेरी माता री बैहण, क्लोपास री घरावाळी मरियम, अतै मरियम मगदलीनी खडूरी थी। 26जैहणै यीशुऐ अपणी माता, अतै तैस चेलै जो जैस सोगी यीशु प्‍यार रखदा थू नेड़ै खडुरै हेरू ता अपणी माता सोगी बल्लू, “हे जनानी, हेर, ऐह तेरा पुत्र हा।” 27ता तिनी चेलै सोगी बल्लू, “ऐह मेरी माता हा।” अतै तैस टैमां थऊँ सो चेला तैहा जो अपणै घरा जो लेई गो।

यीशु री मौत

(मत्ती 27:45-56; मरकुस 15:33-41; लूका 23:44-49)

28ऐत थऊँ बाद यीशुऐ ऐह जाणी करी कि अबै सब कुछ पुरा भूच्ची गो हा, ठेरैतांये पवित्रग्रन्था मन्ज जैडा हा सो पुरा भोआ, बल्लू, “अऊँ त्रिहणा हा।” 29तैड़ी सिरकै रा अक्क भरूरा भाण्डा रखूरा थू, ता तियैं सिरकै मन्ज रूंई डुबाई करी तैहा रूंई जो जूफे रै डंडै पुर रखी करी तसेरै मुँहा मन्ज लाऊ।#भज. 69:21. 30जैहणै यीशुऐ सो सिरका लैऊ, ता बल्लू, “पुरा भुआ” अतै मुण्डा झुकाई करी तूणा बलदै ही प्राण निकळी गै।#लूका 23:46; मर. 15:37.

31ठेरैतांये कि ऐह शुक्रवार रा दिन थू अतै फसह रै त्यौहार री तैयारी चलुरी थी, यहूदिये पिलातुस सोगी बिनती करी की तंयारी जंघा भनी करी सो उतारै गान, ताकि विश्रामदिन ऐह क्रूस पुर ना रैहन, सो यहूदी तांयें अक्क खास बड़ा दिन थू।#मर. 15:42; व्य. 21:22-23. 32ता सपाईये ईच्ची करी तैस पैहलै मणु री पैहलै जन्गा भनी फिरी दूये री भी, जैड़ै तैस सोगी क्रूस पुर चढाऊँरै थियै; 33पर जैहणै यीशु बलै ईच्ची करी हेरू कि सो मरी गच्छुरा हा, ता तसेरी जन्गा ना भनी। 34पर सपाई मन्ज अक्कीयै बरछे सितै तसेरी प्रहि बिन्नि, अतै तैत मन्ज झट खून अतै पाणी निकळू। 35जिनी ऐह हेरू, तिनी गवाही दिती हा, अतै तसेरी गवाही सच्ची हा; अतै सो जाणदा हा कि सो सच बलदा कि तुहै विस्वास करा। 36ऐह गल्ला ठेरैतांये भूई कि पवित्रग्रन्था मन्ज जैडा बलुरा हा सो पुरा भोआ, “तसेरी कोई हड्डी ना त्रोड़णी हा।”#निर्ग. 12:46; गिण. 9:12; भज. 34:20. 37पवित्रग्रन्थ मन्ज अक्की होरी जगह ऐह लिखुरी, “जैसियो तियैं बिन्‍नुरा, तैस पुर तंयारी नजरा भूणी हिन।”#जक. 12:10.

यीशु रा दाह-संस्कार

38ईयां गल्ला थऊँ बाद अरमतियाह ग्राँ रा यूसुफ जैडा यीशु मसीह रा चेला थू। पर यहूदी अगुवै रै डरा रा ऐसा गल्ला जो छुपाई रखदा थू, तिनी पिलातुस सोगी बिनती करी कि, कै सो यीशु री लाशा जो नी सकदा हा। पिलातुसै तसेरी बिनती हुणी अतै, सो ईच्ची करी तसेरी लाशा जो लेई गो। 39नीकुदेमुस भी, जैडा पैहलै यीशु बलै राती गो थू, लगभग 33 किलो मिलुरा गन्धरस अतै एलोवेरा लेई आ। 40ता तियैं यीशु री लाश लेई, अतै यहूदी री दबाणै री रिता रै अनुसार तैसिओ सुगन्ध द्रव्य सोगी कफणा मन्ज लपेटु। 41तैहा जगह जैड़ी यीशु क्रूस पुर चढाऊरा थू, अक्क बगीचा थू, अतै तैस बगीचे मन्ज अक्क नोई कब्र थी जैत मन्ज कोई भी ना रखूरा थू। 42ठेरैतांये अगला दिन यहूदी त्यौहार फसह री तैयारी रै दिन री वजह थऊँ तियैं यीशु जो तैत मन्ज ही रखू, क्ओकि सो कब्र नेड़ै थी।

Currently Selected:

यूहन्‍ना 19: GBKNT

Highlight

Copy